ბიზნესმენების, რინატ ახმეტოვისა და ვადიმ ნოვინსკის „მეტინვესტ ჯგუფი“ ევროპაში ახალი მეტალურგიული ქარხნის აშენებას განიხილავს. ამის შესახებ ჯგუფ „მეტინვესტის“ აღმასრულებელმა დირექტორმა, იური რიჟენკოვმა ევროპის ბიზნესასოციაციის მიერ ორგანიზებულ ივენთ Let’s Talk-ზე განაცხადა.
„მეტინვესტის“ საგარეო საინვესტიციო გეგმების შესახებ შეკითხვაზე რიჟენკოვმა უპასუხა, რომ ჯგუფი უკრაინის ფარგლებს გარეთ ფოლადის ორ ქარხანას იტალიაში, თითო-თითოს ბულგარეთსა და დიდ ბრიტანეთში, ასევე, მაღაროებს შეერთებულ შტატებში ისედაც ფლობს.
„ჩვენ დიდი სავაჭრო კომპანია გვაქვს, რომელიც პროდუქციას მთელ მსოფლიოში ყიდის. ჩვენ ინვესტიციები მთელ მსოფლიოში ჩავდეთ,“ - აცხადებს იური რიჟენკოვი.
მისი თქმით, ჯგუფს დღის წესრიგში ჰქონდა ინვესტიციების ჩადება იტალიის ახალ დიდ ქარხანაში, რომლის აშენებასაც მომდევნო 3-4 წელიწადში გეგმავდა. თუმცა პრობელმა ის არის, რომ ახალი ქარხნისთვის მასალა მარიუპოლის „აზოვსტალს“ უნდა მიეწოდებინა, ხოლო საბოლოო პროდუქტად იტალიაში გადამუშავებულიყო.
რიჟენკოვის შეფასებით, მეტალურგიული ბიზნესის განვითარებისთვის უკრაინის ერთ-ერთ წინაპირობად კრივოი როგის მადანი წარმოადგენს, რომლის გამოყენებაც სხვა ქვეყნებში წარმოების ასაშენებლად შესაძლებელია.
„ამჟამად, მაგალითად, ახალი ქარხნის აშენებას იმავე ბულგარეთში ან იტალიაში განვიხილავთ,“ - აცხადებს „მეტინვესტ ჯგუფის“ გენერალური დირექტორი.
ამისთვის, მისი თქმით, უნდა შეიქმნას გარანტია, რომ კომპანია კრივოი როგიდან ევროპის ამ ქვეყნებში მადნის მიწოდებას შეძლებს.
„ამჟამად ეს შესაძლებელია, მაგრამ გარანტირებული არ არის,“ - ამბობს რიჟენკოვი.
მისი თქმით, კომპანია სხვადასხვა სცენარს განიხილავს, ასევე, აახლებს ტექნოლოგიურ სტრატეგიას, რომელიც ითვალისწინებს ინვესტიციებს როგორც უკრაინაში, ისე სხვა ქვეყნებში.
რინატ ახმეტოვი
