უმდიდრესი უკრაინელის, რინატ ახმეტოვის ქონება 64%-ით შემცირდა, თუმცა ის კვლავ რჩება ქვეყნის უმდიდრეს მილიარდერად. უკრაინული Forbes-ის მონაცემებით, ახმეტოვმა წლის დასაწყისიდან ივლისამდე მეტალურგიული, ენერგეტიკული, სასოფლო-სამეურნეო და მედია აქტივების ნაწილი დაკარგა, ხოლო მისი ქონება 13,7 მილიარდიდან 4,9 მლრდ დოლარამდე შემცირდა.
ბიზნესმენის მთავარი აქტივის, კომპანია „მეტინვესტის“ ღირებულება, რომელიც 3 მლრდ დოლარად იყო შეფასებული, ორი-მესამედით შემცირდა. კომპანიამ ორი ძირითადი საწარმო, „აზოვსტალი“ და „ილიჩის“ სახელობის მარიუპოლის მეტალურგიული კომბინატი დაკარგა. გასულ წელს ორივე ამ საწარმომ 8,6 მილიონი ტონა ფოლადი აწარმოა, რაც „მეტინვესტის“ პროდუქციის 90%-სა და მთელი უკრაინული მეტალურგიული წარმოების 40%-ს შეადგენს.
რინატ ახმეტოვმა, ასევე, ანტიოლიგარქიული კანონის გამო მედიაბიზნესი მიატოვა. კანონის თანახმად, პირი, რომელსაც მნიშვნელოვანი გავლენა აქვს უკრაინის პოლიტიკასა და ეკონომიკაზე და ამასთან, მედიას აკონტროლებს, შესაძლოა, „ოლიგარქად“ ჩაითვალოს. ახმეტოვის მედია აქტივებს წარმოადგენდა Media Group Ukraine-ის ნაწილი, რომელიც 200 მლნ დოლარად იყო შეფასებული. მასში შედიოდა 10 სატელიტური და საეთერო არხი, ასევე, ინტერნეტრესურსი „სეგოდნია,“ ვებგვერდი და ჟურნალი Vogue, ონლაინ კინოთეატრი Oll.tv და სატელიტური პლატფორმა Xtra TV.
Forbes-ის მიხედვით, უკრაინის ენერგიის უმსხვილესი მწარმოებლის, DTEK-ის ამჟამინდელი ღირებულება 580 მლნ დოლარია. ამასთან, უმდიდრესი უკრაინელის სხვა მნიშვნელოვანი აქტივები კერძო და კომერციულ უძრავ ქონებას შეადგენს, რომლის საერთო ღირებულებაც 650 მლნ დოლარია. მის ამჟამინდელ აქტივებში, ასევე, შედის პირველი უკრაინული საერთაშორისო ბანკი, 250 მლნ დოლარითა და სატრანსპორტო კომპანია Lemtrans, 225 მლნ დოლარის ღირებულებით.
ახმეტოვის ელიტარული ტრანსპორტის ღირებულება 160 მლნ დოლარად არის შეფასებული, თუმცა იახტა Valerie გასაყიდად 89 მლნ ევროდ არის გამოტანილი. საფეხბურთო კლუბ „შახტიორის“ ღირებულება 150 მლნ დოლარამდე შემცირდა. Forbes-ის მონაცემებით, რაც დივიდენდების წინა გადახდებს ეფუძნება, ბიზნესმენის ნაღდი ფული და სხვა ლიკვიდური აქტივები, შესაძლოა, 300 მლნ დოლარს შეადგენდეს.
რინატ ახმეტოვის საინვესტიციო კომპანია „System Capital Management“-ის პრესსამსახურმა განაცხადა, რომ საომარი მოქმედებების დროს აქტივების ნებისმიერი შეფასება მცდარად ითვლება და ზარალის შეფასება მოგვიანებით მოხდება. მთლიანმა ზარალმა, შესაძლოა, ათობით მილიარდი დოლარი შეადგინოს. ივნისის ბოლოს ბიზნესმენმა რუსეთის წინააღმდეგ სარჩელი ადამიანის უფლებათა ევროპულ სასამართლოში შეიტანა. მან 17-20 მლრდ დოლარად შეფასებული ზარალის ანაზღაურება მოითხოვა. კრემლის საპასუხო პოზიციის მიხედვით, რუსეთმა ევროპის საბჭო დატოვა და ამიტომ ადამიანის უფლებათა ევროპული სასამართლოს გადაწყვეტილებას არ დაემორჩილება.
რინატ ახმეტოვი
