საქართველოში ხელით მოქსოვილი საბავშვო ტანსაცმელი დიდ ბრიტანეთში, გერმანიაში, იაპონიაში, ჩინეთში, საფრანგეთსა და კორეაში გადის. ამ საბავშვო პროდუქციის მწარმოებელი კომპანია ,,რკო“ გლობალურ ბაზრებზე პირველად 2019 წელს მოხვდა. მსოფლიო ბაზარზე გასვლა კომპანიამ საფრანგეთში დაიწყო, სადაც საერთაშორისო გამოფენაში პირველად მიიღო მონაწილეობა. ბრენდი ამავე დროს მუშაობს პროდუქციის ახალ ხაზზე, რომელიც რეალიზაციაში შემოდგომიდან ჩაეშვება.

„რკო“ ამ დროისთვის ქუდებს, სვიტერებს, ჟაკეტებს, პერანგებს და პლედებს აწარმოებს. საქმიანობა მას პანდემიურ პერიოდშიც არ შეუჩერებია. როგორც კომპანიის თანადამფუძნებელი თამუნა მესარკიშვილი „კომერსანტთან“ ამბობს, წელს, პანდემიურ 2020 წელთან შედარებით, გამოშვებული პროდუქციის მოცულობა 30%-ით გაიზარდა.

მისი თქმით, შეიძინეს ახალი პარტნიორები, რომლებიც ჩვილთა და ბავშვთა ტანსაცმლის ქართული ბრენდის აქტიური დამკვეთები გახდნენ.

„საქართველოში ვფლობთ ერთ შოურუმს, დასაქმებულთა დიდი ნაწილი, 60-მდე მქსოველი, მუშაობს სახლიდან გაუსვლელად. ამით ვაძლევთ შესაძლებლობას, რომ აკეთონ სხვა საქმეც. ყველა მთგანი ქალია, რომლებიც ჩვენი მასალით, ჩვენი მენეჯმენტით, აბსოლუტურად ყველაფრით, პროდუქციას ამზადებენ სახლებში, რაც შემდეგ გაგვაქვს ექსპორტზე. პანდემია გვაზარალებს იმ მხრივ, რომ შეიძლება რომელიმე დასაქმებული დაინფიცირდეს და გარკვეული ვადით გამოეთიშოს სამუშაო პროცესს, სხვა დაბრკოლება არ გვაქვს. გარდა იმისა, რომ ახალ ბაზრებს ვითვისებთ, ფართოვდება კონკრეტულ ქვეყნებში მომხმარებელთა წრე, ყოველ პირველ შეკვეთას მოსდევს მეორე, მესამე და სხვა, რასაც განაპირობებს ხარისხი და განსხვავებული სტილი. ეს ჩვენი ბიზნესის განვითარებისთვის მნიშვნელოვანია.  ამ ეტაპზე შეკვეთები გვაქვს Caramell-ისგან, რომელიც ბავშვთა მოდაში ერთ-ერი წამყვანი ევროპული  ბრენდია. გარდა ამისა, დავამატეთ მანქანით ქსოვა ანუ საქსოვ დაზგაზე მოქსოვილი პროდუქცია. ახალი ხაზით შექმნილ პროდუქციას შემოდგომაზე ჩავუშვებთ“, - ამბობს ,,კომერსანტთან“ თამუნა მესარკიშვილი.

რაც შეეხება ,,რკოს“ ბრენდით შექმნილ ტანსაცმელზე ხელმისაწვდომობას, როგორც ახალგაზრდა მეწარმე ამბობს, ცდილობენ, პროდუქცია ქართველი მომხმარებლისთვისაც ხელმისაწვდომი იყოს. შესაბამისად, თუ კონკრეტული სამოსი ძვირი ღირს საზღვარგარეთ, ქართულ ბაზარზე მისი ყიდვა 10-ჯერ დაბალ ფასად არის შესაძლებელი.

„რკოს“ პროდუქცია საშაულო და მაღალი სეგმენტის მომხმარებელზეა გათვლილი.

კომპანია „რკო“ 2016 წელს თაკო მეგრელიშვილმა და თამუნა და ნინო მესარკიშვილებმა დააარსეს. ახლად შექმნილი ქართული ბრენდი საბავშვო ტანსაცმელს და აქსესუარებს ნატურალური მასალებითა და საინტერესო დიზაინით აწარმოებს. 

მარი ჩიტაია