„თებერვალში, ჩემპიონატის პერიოდში ბაკურიანში ჩვენი სასტუმრო მთლიანად დაჯავშნილია“, - ამის შესახებ, რადიო„კომერსანტის“ გადაცემაში, „კომერსანტის დილა“ inn Group - ის აღმასრულებელმა დირექტორმა ერეკლე კოკაიამ ისაუბრა. მისი თქმით ბაკურიანშიც და გუდაურშიც სასტუმროები ერთი თვით ადრე იყო დაჯავშნილი, თუმცა თუ უფრო მეტი ნალექი არ მოვიდა, საბაგიროები და ხელოვნური გათოვლიანება არ ჩაირთო, მდგომარეობა შეიცვლება და კურორტის პრესტიჟზე უარყოფითად აისახება.
„როდესაც ამხელა დონის ჩემპიონატს გეგმავ და გავლენიან და პროფესიონალ სტუმრებს ელოდები, აუცილებელია, რომ თავი დაირეკლამო, ყველანაირად მზად და გამართული ინფრასტრუქტურით შეხვდე მათ.
ახალი წლის პერიოდი მაღალი დატვირთულობით გამოირჩეოდა, თუმცა ბაკურიანი მიუხედავად იმისა, არის თუ არა თოვლი, მაინც დატვირთულია, რადგან ოჯახები დასასვენებლადაც ჩამოდიან“, - აღნიშნა ერეკლე კოკაიამ.
რაც შეეხება ფასებს, კოკაია ამბობს,რომ წელს ფასები გაზრდილია, რის მიზეზადაც ორ ფაქტორს, სასტუმროების თვითღირებულების ზრდას და მაღალ მოთხოვნას ასახელებს.
„წინა წელთან შედარებით, სასტუმროების ფასები გაზრდილია, რადგან სასტუმროებს ყველა ხარჯი გაეზარდათ, მათ შორის გაიზარდა პერსონალის ხელფასებიც, შესაბამისად გაზრდილმა თვითღირებულებამ ფასი გაზარდა. ასევე ფასის ზრდის მიზეზი გაზრდილი მოთხოვნაა“, - აღნიშნა ერეკლე კოკაიამ.
თაკო კვაჭანტირაძე