„წარმოება არც გაზრდილა და არც შემცირებულა, ბაზარზე მოთხოვნა სტაბილურად არსებობს, რომელსაც ვაკმაყოფილებთ“- ამის შესახებ „კომერსანტს“ პურ-ფუნთუშეულის და საკონდიტრო პროდუქტის მწარმოებელი კომპანიის „ემ სი ბი ჯორჯიას“ მმართველმა პარტნიორმა ალექსანდრე რატიშვილმა განუცხადა. მისი თქმით, წარმოების პროცესი ჩვეულებრივ რეჟიმში მიმდინარეობს და კომპანიაა 15 სახის პროდუქციას წარმოებას ისევ აგრძელებს.
„როგორც საგანგებო მდგომარეობის გამოცხადებამდე ვმუშაობდით, ისევ ისე ვმუშაობთ, თუმცა, რასაკვირველია სრულად გვაქვს გათვალისწინებული ყველა ის წესი და რეკომენდაცია რაც იქნა შემუშავებული ჯანდაცვის მსოფლიო ორგანიზაციის, ჩვენი მთავრობის და ექსპერტების მიერ. ჩვენი საწარმოსთვის ამ რეკომენდაციების შესრულება რთული არ ყოფილა, რადგან მათ უმრავლესობას ყოველდღიურ რეჟიმში წლების განმავლობაში ისედაც ვიცავთ. გარკვეული დეტალები რა თქმა უნდა დაემატა, იქნება ეს თანამშრომლებისთვის სიცხის გაზომვა თუ პირბადეებით მუშაობა“, - განაცხადა ალექსანდრე რატიშვილმა.
„კომერსანტთან“ საუბარში „ემ სი ბი ჯორჯიას“ მმართველი პარტნიორი, რუსეთში მომატებულ ხორბლის ფასზეც ამახვილებს ყურადღებას. ალექსანდრე რატიშვილი აცხადებს, რომ არსებული მდგომარეობა თუ არ შეიცვალა და ფასი არ დასტაბილურდა, ადგილობრივი მწარმოებლები იძულებულები იქნებიან საკუთარ საფასო პოლიტიკას გადახედონ.
„რუსეთის ბაზარზე ხორბლის ფასი საგრძნობლად გაიზარდა, ფასი თუ არ დასტაბილურდა აუცილებლად იმოქმედებს ადგილობრივი პროდუქციის ბაზარზე, იმ პროდუქტებზე, რომლებიც ფქვილისგან მზადდება. ჩვენდა სამწუხაროდ, ამ დროისთვის აბსოლუტურად ვართ დამოკიდებული რუსეთიდან ხორბლის იმპორტზე. არაერთი წელიწადია სხვადასხვა დარგების კუთხით, ვსაუბრობთ, რომ არ შეიძლება ერთ ბაზარზე ჩამოკიდება, როგორც ექსპორტის ისე იმპორტის თვალსაზრისით, მაგრამ სამწუხაროდ ერთი და იგივე მეორდება- ხან ღვინოს ეხება საკითხი , ხან ენერგო რესურსებს ახლა კი ხორბალს. მთლიანი მოთხოვნის დაკმაყოფილების უდიდესი ნაწილის ხდება რუსეთიდან შემოსული ხორბლის ხარჯზე, კორონავირუსის ეპიდემია რომ არ ყოფილიყო, მაინც ერთ ბაზარზე როდესაც ხარ ჩამოკიდებული ყოველთვის მოსალოდნელია დრამატული ცვლილებები“- განმარტავს ალექსანდრე რატიშვილი.
„ემ სი ბი ჯორჯიას“ მმართველი პარტნიორი გვიყვება, რომ კომპანიის წილი ბაზარზე დაახლოებით, 5-7% ფარგლებშია. მრავალწლიანი გამოცდილების პურ-ფუნთუშეულის და საკონდიტრო პროდუქტის მწარმოებელი კომპანია 2020 წლის გაზაფხულზე უახლოესი დანადგარებით აღჭურვილი ქარხანის გახსნას გეგმავდა. როგორც სანდრო რატიშვილი აცხადებს, ამ ეტაპზე ქარხნის მშენებლობა შეუფერხებლად მიმდინარეობს, უბრალოდ ვადებმა გადაიწია და ქარხანა გაზაფხულის ნაცვლად სავარაუდოდ ზაფხულის ბოლოსკენ გაიხსნება.
„მშენებლობა საქართველოს მაკდონალდის ეგიდით მიმდინარეობს. ყველაფერი ჯერჯერობით კარგადაა, მშენებლობა არ შეჩერებულა, კარგი ტემპით მიდიან წინ და იმედია ეს კრიზისული სიტუაცია მშენებლობას არ შეაჩერებს. დანადგარებიც შეკვეთილია, უახლოეს მომავალში ჩამოვა და სავარაუდოდ ზაფხულში ეს ქარხანა აუცილებლად გაიხსნება“, - განაცხადა ალექსანდრე რატიშვილმა.
ბაჩო ადამია