ეროვნულ-დემოკრატიული ინსტიტუტისა (NDI) და CRRC-საქართველოს მიერ დღეს გამოქვეყნებული კვლევის თანახმად, საქართველოს მოსახლეობის უმეტესობა ამბობს, რომ წამლების ფასი ჯანდაცვის სისტემის ყველაზე დიდი პრობლემაა. კვლევის ფარგლებში გამოკითხულ მოქალაქეებს ჰკითხეს, თუ რა არის ამჟამად ჯანდაცვის სისტემის წინაშე მდგარი სამი ყველაზე დიდი პრობლემა – მათი უმეტესობა, 76 % ასახელებს წამლების საფასურს. წამლების შემდეგ ყველაზე პრობლემურ საკითხად სამედიცინო მომსახურების/ექიმთან ვიზიტების საფასურია.
აღნიშნული საკითხი, ტელეკომპანია ფორმულას ეთერში, გადაცემაში „ბიზნესი ბლუმბერგთან ერთად“ ჯანდაცვის ექსპერტმა ანდრია ურუშაძემ შეაფასა.
მისი თქმით, პირველ რიგში გასათვალისწინებელია ის ფაქტი, რომ როდესაც მოსახლეობის ხარჯი იზრდება, ხოლო შემოსავალი მცირდება მოსახლეობა იძულებულია აირჩიოს ნაკლებად ეფექტური, თუმცა იაფიანი მედიკამენტები. მან ასევე აღნიშნა, რომ ძალიან რთულია წამლის ხარისხზე საუბარი, თუ ის რამე მნიშვნელოვან კვლევას არ ეფუძნება.
„მნიშვნელოვანია პირველ რიგში გავითვალისწინოთ ერთი, როდესაც მოსახლეობის შემოსავლები მცირდება და ხარჯები იზრდება, მოსახლეობა ცდილობს, რომ უფრო იაფიანი და ხშირად ნაკლებად ეფექტური წამლები აირჩიოს. იაფი მედიცინაში არ ნიშნავს იმას, რომ ის კლინიკურად ეფექტურია, შეიძლება საეჭვო ხარისხის წამლების უფრო დიდი ხნით მიღება მოგვიწიოს.
მეორე მხარე შეიძლება დაკავშირებული იყოს პერსონალის კვალიფიკაციასთანაც, მაგალითად ხშირად გამოწერილი მედიკამენტი, რომელიც სამწუხაროდ სარეცეპტო სისტემის დისკრედიტაციის შემდეგ კიდევ უფრო პრობლემური გახდა. ეს არის ერთ ეპიზოდზე გამოწერილი მედიკამენტის როგორც რაოდენობა ისე ფასი და შესაბამისად ის ხარჯი რასაც ექიმები გაწევენ, სამწუხაროდ წლიდან წლამდე იზრდება, შეგვიძლია ვთქვათ ამის ორი მიზეზი. 1, ჩვენ მოსახლეობის მკურნალობისას კლინიკური სტანდარტები ნაკლებად გვაქვს, მათ შორის პირველად ჯანდაცვაზე და ეს პირველ რიგში გამოისახება არარაციონალურ მომსახურებასთან და მეორე ეს არის ფინანსური წნეხი რომელსაც განიცდის როგორც ოჯახი ისე მოქალაქე და როდესაც არ ხდება სამედიცინო მომსახურების ანაზღაურება ცხადია ადამიანი იძულებულია აირჩიოს იაფი მედიკამენტი“ .- აღნიშნა ანდრია ურუშაძემ.
იმისათვის,რომ პრობლემები წლიდან წლამდე მოუგვარებელი არ იყოს, ურუშაძე ამბობს, რომ ჯობია საქართველოს შედეგზე ორიენტირებული სტრატეგიები ჰქონდეს.
მისი თქმით ჯობია რომ საქართველოს ჩვენ შედეგზე ორიენტირებული სტრატეგიები ჰქონდეს , აქედან გამომდინარე ეს პრობლემები წლიდან წლამდე არ იქნება ერთი და იგივე და შევძლებთ შემცირებას.