„დღეს რა შეიძლება გაუხარდეს საქართველოს თითოეულ მოქალაქეს. რა თქმა უნდა ლარის გამყარება. გახარებული ველოდი თქვენს მოსვლას პარლამენტში, ვიცოდი რა რომ ლარი გამყარდებოდა. რამდენჯერაც მოხვედით პარლამენტში, რამდენჯერაც ეროვნული ბანკის პრეზიდენტი მოვიდა, გაუფასურებული ლარი მყარდება. რა ასეთი ჯადო გაქვთ, რომ თქვენი აქ შემოსვლა მომენტალურად გადაეცემა ფინანსურ ბაზარს“, — ასე მიმართა „ნაციონალური მოძრაობის წევრმა“ და ეროვნული ბანკის ყოფილმა პრეზიდენტმა რომან გოცირიძემ ფინანსთა მინისტრს ლაშა ხუციშვილს პარლამენტის სესიაზე, სადაც მას 17 თებერვალს „მინისტრის საათის“ ფორმატში უსმენენ.
„რაც შეეხება მთავარ კითხვას. საქართველოში ამ მასშტაბით არ ყოფილა ცვლილება, 14 საფეხურით დაეცა ქვეყანა ეკონომიკური თავისუფლების ინდექსში, ვიყავით მე-12, გავხდით 26–ე. წლების განმავლობაში ყოველთვის იზრდებოდა, 12 წლით უკან დავიხიეთ, ძალიან ცუდი სიგნალია ეს ინვესტორებისთვის. ამით ვეუბნებით ინვესტორებს, არ გაბედოთ საქართველოში შემოსვლა, ცხვირი არ შეყოთ იმ ქვეყანაში, სადაც არ არსებობს სასამართლო, სადაც არსებობს ისეთი ფინანსთა სამინისტრო და მინისტრი, რომელიც ვერ უმკლავდება ფისკალურ პრობლემებს. როდის აპირებთ ფინანსების ისე მოწესრიგებას რომ ის არ იყოს მთავარი ფაქტორი ფასების ზრდის და ლარის გაუფასურების? და როდის აპირებთ ამ 14 პოზიციის დაბრუნებას და შეშინებული ინვესტორების უკან შემობრუნებას? ამ პოლიტიკით ვერცერთ ინვესტორს უკან ვერ დააბრუნებთ სამწუხაროდ“, — მიმართა გოცირიძემ ლაშა ხუციშვილს.
ფინანსთა მინისტრმა ლაშა ხუციშვილმა ოპოზიციონერი დეპუტატის კითხვაზე თქვა, რომ ლარის გამყარება ნამდვილად მის პარლამენტში მისვლით არის გამოწვეული, მზადაა ყოველდღე იაროს საკანონმდებლო ორგანოში.
„ნახავდით რა პერიოდზეა აღნიშნული მიმართულებები შეფასებული, ფისკალური მიმართულება იყო ძირითადი ნაწილი, ეს არის 2020 წელი, როდესაც ქვეყნის ვალი იყო მშპ-ს 60% და ქვეყნის საბიუჯეტო დეფიციტი იყო დაახლოებით 9.3%. ბუნებრივია როდესაც ავიღებთ ერთ კონკრეტულ წელს, მითუმეტეს პანდემიიდან გამოწვეულ სიძნელეებს, ბუნებრივია როდესაც ამის შეფასება ხდება იმ მეთოდოლოგიით, რითაც აღნიშნული ორგანიზაცია აფასებს, გაუარესება იქნება, თუმცა ის პარამეტრები, რაზე დაყრდნობითაც ხდება შეფასება, მნიშვნელოვნად არის გაუმჯობესებული 2021 წელს და მისი ასახვა მოხდება მომდევნო წელს. თუმცა უნდა აღინიშნოს რომ მნიშვნელოვანწილად ამ მიმართულებას უფრო პროფესიულ დონეზე აფასებენ სარეიტინგო კომპანიები, ისეთები, როგორიცაა Fitch, S&P და სხვა. ჩვენ სულ ახლახანს გვქონდა აღნიშნული ორგანიზაციების შეფასება და საქართველოს დაუდასტურეს საკრედიტო რეიტინგი იმ დონეზე, რა დონეზეც ქვეყანას პანდემიის დაწყებამდე პერიოდში ჰქონდა. ასე რომ ამ მიმართულებით კრიტიკას ვერ გავიზიარებ.
ძალიან უცნაური პარალელი იქნა გავლებული ჩემს პრლამენტში მოსვლასთან და ლარის კურსთან მიმართებაში. არ ვიცოდი ასეთი კორელაცია თუ არსებობდა ამ ორს შორის. თუ ეს ასეა, შემიძლია ყოველ დღე მოვიდე პარლამენტში“, — აღნიშნა ლაშა ხუციშვილმა.