„რუსთავი 2“-ის გენერალურ დირექტორის ნიკა გვარამიას მიმართ გამამტყუნებელ განაჩენს  ბიზნესის სამართლის იურისტი აკაკი ჩარგეიშვილი აფასებს. ,,კომერსანტთან“ ის ასევე განმარტავს,  კონკრეტული შემთხვევა რით განსხვავდება სახელმწიფო საწარმოების მხრიდან ბიუჯეტისთვის მიყენებული მილიარდიანი ზარალისგან და რა საერთო შეიძლება არსებობდეს სამართლებრივ დონეზე ამ ორ ფაქტს შორის?

როგორც აღმოჩნდა, სახელმწიფო საწარმოს მფლობელისთვის ამ შემთხვევაში მთავარი უპირატესობა საჯარო მოხელის სტატუსი და კონკრეტული კომპანიისთვის  დაზარალებულის სტატუსის არქონაა. თუმცა, როგორც იურისტი განმარტავს, არის შემთხვევები, როცა შეიძლება ადგილი ჰქონდეს გარკვეული გადაცდომის ნიშნებს, რაზეც თვალის დახუჭვა დანაშაულის წამახალისებელი ქმედებაა.

,,მოქმედი კანონმდებლობით, სახელმწიფო საწარმოების  მენეჯერები გათანაბრებულიი არიან საჯარო მოხელეებთან. ის პასუხისმგებლობა, რაც საჯარო სამსახურში დასაქმებულ ადამიანს აქვს, ამ ტიპის საწარმოებში დასაქმებულებზეც ვრცელდება, იქნება ეს  რკინიგზა, აეროპორტების გაერთიანება, საპარტნიორო ფონდი და სხვა. რაც შეეხება კონკრეტულ სიტუაციაში პასუხისმგებლობას, გვარამიას მიმართ იყო კონკრეტულ საკითხთან დაკავშირებული დავა, სადაც დაზარალებულად ცნობილია კომპანია „რუსთავი 2“, ამიტომ გვარამიას მიმართ ეს დაზარალებულის ინსტიტუტი ამოქმედებულია და დაზარალებულად ცნობილია კონკრეტული კომპანია. საწარმოებზე როცა ვსაუბრობთ და ზარალზე, უნდა იყოს შემოსავლების სამსახურის მიერ შემოწმების შედეგიდან გამომდინარე, ანუ უნდა დადასტურდეს აუდიტის სამსახურის ან შემოსავლების სამსახურის მიერ. კონკრეტულ ფაქტებს ჰქონდეს ადგილი, ზოგადად ზარალიანობა კრიმინალი არ არის, მაგრამ დამაზიანებელი, დელიქტური ქმედება თუ იყო, უკვე სისხლის სამართლებრივი დევნის საფუძველია, როგორც გვარამიას შემთხვევაში მოხდა“, - აცხადებს აკაკი ჩარგეიშვილი ,,კომერსანტთან“.

ამდენად, როგორც იურისტი აღნიშნავს, კომპანიის ზარალიანობასთან დაკავშირებით კონკრეტულ გამოვლინებასთან მიმართებაში უნდა მოხდეს რეაგირება, მომზადდეს ფინანსური ანგარიშგებები და სხვა.  

შეგახსენებთ, გენერალურმა პროკურატურამ 2020 წლის 6 სექტემბერს, „რუსთავი 2“-ის საქმეზე ბრალი ნიკა გვარამიას, ასევე „რუსთავი 2“-ის ყოფილ ფინანსურ დირექტორს კახა დამენიასა და „ინტერ მედია პლუსის“ დირექტორს ზურაბ იაშვილს წაუყენა. ნიკა გვარამიას ბრალად ედებოდა წინასწარი შეთანხმებით ჯგუფის მიერ, დიდი ოდენობით „რუსთავი 2“-ის კუთვნილი ქონებრივი უფლების გაფლანგვა, კომერციული მოსყიდვა და ყალბი ოფიციალური დოკუმენტის დამზადება, უკანონო შემოსავლის ლეგალიზაცია. ნიკა გვარამიას ასევე ბრალი ედება სამსახურებრივი უფლებამოსილების ბოროტად გამოყენებაში.

რაც შეეხება სახელმწიფო საწარმოების ზარალიანობას, ცნობისთვის, 2018 წელს 67 სახელმწიფო კომპანიის ზარალმა, ჯამში, 805 მილიონ ლარს მიაღწია. ფინანსთა სამინისტროს მიერ მომზადებული ფისკალური ანგარიშის თანახმად, 2017 წელთან შედარებით, ზარალი  თითქმის 160 მლნ ლარით არის გაზრდილი. ბოლო ხუთ წელიწადში სახელმწიფო საწარმოების ზარალის ჯამური ოდენობა 2.5 მილიარდ ლარს აღემატება.

ტენდენცია გაგრძელდა 2020 წელსაც, აღნიშნულ პერიოდში  საქართველოს სახელმწიფოს კუთვნილმა 142-მა კომპანიამ ჯამში 1,043,000,000 ლარით იზარალა, რაც 2019 წლის ზარალს 630 მილიონი ლარით აღემატება.

მარი ჩიტაია