ეროვნულმა ბანკმა გუშინ მონეტარული პოლიტიკის კომიტეტის სხდომა გამართა, სადაც რეფინანსირების განაკვეთი უცვლელად, 11%-ზე დატოვა. ამასთანავე, სებ-მა აღნიშნა, რომ ქვეყანაში მომატებული ინფლაცია წლის ბოლომდე შენარჩუნდება.
მიღებული გადაწყვეტილება გადაცემა “საქმის კურსის” ეთერში შეაჯამა ეროვნული ბანკის ვიცეპრეზიდენტმა არჩილ მესტვირიშვილმა, რომლის თქმითაც, მომდევნო წლის დასაწყისიდან ქვეყანაში ინფლაციის კლებაა მოსალოდნელი.
არჩილ მესტვირიშვილის განცხადებით, გამკაცრებული მონეტარული პოლიტიკის, ასევე შემცირებული საბიუჯეტო დეფიციტის და იმპორტირებული პროდუქციის საფასო წნეხის შემცირების პირობებში, ინფლაციის დონემ თანდათანობით კლება უნდა დაიწყოს. ეროვნული ბანკის ვიცეპრეზიდენტი აცხადებს, რომ რეფინანსირების განაკვეთის დაწევამდე სებ-მა უნდა დაინახოს, რომ ქვეყანაში ინფლაციის კლების ტრენდია.
“ჩვენი პროგნოზით, ინფლაცია დაიწყებს შემცირებას მომავალი წლის დასაწყისიდან და წლის მეორე ნახევარში მიზნობრივთან ახლოს იქნება. გარკვეული პიკი ჩვენ უკვე გადავიარეთ ინფლაციის, თუმცა ინფლაცია კვლავ ძალიან მაღალია. მნიშვნელოვანია, რომ ინფლაციის შემცირების ტრენდი დავინახოთ. საფუძველს იმისას, რომ ინფლაციას შემცირების ტენდენცია ექნება, რამდენიმე რამ გვაძლევს, ერთი ის, რომ ჩვენ გამკაცრებული მონეტარული პოლიტიკა გვაქვს და მას შევინარჩუნებთ იქამდე, სანამ ამის საჭიროება იქნება.
მეორე ის, რომ ფისკალური წნეხი მცირდება ინფლაციაზე, რადგანაც ბიუჯეტის დეფიციტი მცირდება. ასევე საერთაშორისო ბაზრებზე დავინახეთ სასაქონლო ფასების გარკვეული შემცირება. შარშანდელთან შედარებით ფასები მაღალია, მაგრამ კლება შეიმჩნევა. ასევე ჩვენთვის მნიშვნელოვანია საერთაშორისო გადაზიდვების ფასების შემცირება. გარეგან ფაქტორებს და გამკაცრებულ მონეტარულ პოლიტიკას ექნება გავლენა, რომ ინფლაცია შემცირდეს. თუმცა გამომდინარე იქიდან, რომ ინფლაცია კვლავ მაღალია, ასევე გაზრდილია გეოპოლიტიკური რისკები, აქედან გამომდინარე, მიზანშეწონილია, რომ გამკაცრებული მონეტარული პოლიტიკა გარკვეული ვადით შევინარჩუნოთ,”- განაცხადა არჩილ მესტვირიშვილმა.
წყარო: bm.ge