რა ეტაპზეა საქართველოს მთავრობასა და ირლანდიურ ავიაკომპანია Ryanair-ს შორის მოლაპარაკებები და როდის უნდა ველოდოთ საქართველოს ავიაბაზარზე Ryanair-ის დაბრუნებას?

როგორც რადიო „კომერსანტის“ ეთერში გადაცემა „კომერსანტის დილა“-ში საქართველოს აეროპორტების გაერთიანების დირექტორმა ირაკლი ქარქაშაძემ აღნიშნა, Ryanair-ი არის ევროპის მასშტაბით ნომერ პირველი ულტრა დაბალბიუჯეტიანი ავიაკომპანია, რაც ნიშნავს იმას, რომ ისინი 0.5 ცენტსაც კი ითვლიან და ისინი არ არიან მოქნილები თავიანთ გადაწყვეტილებებში.

„ისინი არიან ძალიან მკაფიო, ძალიან პრინციპულები, როგორც კომერციულ მოლაპარაკებაში, ასევე თავიანთი საჰაერო ხომალდების უტილიზაციის ნაწილში. რა არის უტილიზაცია: ეს პრინციპია ავიაციაში, როდესაც საჰაერო ხომალდი არის ჰაერში, მაშინ ის წერს ფულს, როდესაც ის არის მიწაზე, ის ხარჯავს ფულს. პლუს, დღის მანძილზე რაც მეტი ფრენა გაქვს, მით უკეთესია უტილიზაციისთვის. აქედან გამომდინარე პირობითად, რომ ავიღოთ ლონდონი თბილისის ან ლონდონი ქუთაისის მიმართულება ეს ავიაკომპანიისთვის დაახლოებით არის 8 საათი გამოფრენა/უკან დაბრუნება. როდესაც ანალოგიურ პერიოდში მას შეუძლია შეასრულოს ლონდონი პარიზი რამდენიმეჯერ ამ პერიოდში. აქედან გამომდინარე ისინი ყველაფერს ამას უყურებენ, ანგარიშობენ. ისინი საქართველოს ადარებენ სხვა შესაძლებლობებს, რომელიც აქვთ ევროპის სხვადასხვა მიმართულებით და აქედან გამომდინარე იღებენ გადაწყვეტილებას.

როდესაც Ryanair-ი საქართველოში შემოვიდა ეს იყო 6-7 წლის მოლაპარაკებების შედეგი. ასე მარტივად არ ყოფილა, რომ უცებ დააინტერესათ საქართველო. მარტივად, რომ გითხრათ Ryanair-ი ერთ-ერთი საპატივცემულო ავიაკომპანიაა, მაგრამ ისინი იმდენად ხისტები არიან მოლაპარაკებებში, რომ მე მახსოვს რამდენიმე შემთხვევა, როდესაც დატვირთული გრაფიკიდან გამომდინარე Ryanair-ი არც კი შეგვხვდა“, - აღნიშნა ქარქაშაძემ.

მისივე განმარტებით, თავის დროზე კოლოსალური შრომა იყო ჩადებული მოლაპარაკებებში, რათა Ryanair-ი საქართველოში შემოსულიყო.

როგორც ქარქაშაძე ამბობს, როდესაც პანდემიის დასაწყისში Ryanair-ი ქვეყნიდან გავიდა, მათ ვერ მოასწრეს რეკრუტირება და სტაბილური მგზავრთნაკადის შექმნა. ამიტომ პანდემიის დასრულების შემდეგ მათ გადააწყვეს თავიანთი საჰაერო ხომალდები ისტორიულ მიმართულებებზე.

„დღეს მათთან კომუნიკაცია გვაქვს. დეტალებს ვერ გაგიზიარებთ. ვსაუბრობთ სხვადასხვა მოდელზე და მიმართულებებზე“, - აცხადებს ქარქაშაძე.