საქართველოდან, ყურძნის ნატურალური ღვინოების ექსპორტი მიმდინარე წელს 43%-ით გაიზარდა.

როგორ შეცვლის ომი და აისახა თუ არა უკვე ქართული ღვინის ბაზარზე რუსეთის მიერ უკრაინის ტერიტორიაზე სრულმასშტაბიანი შეჭრა,  კომპანია ,,შუხმან ვაინ ჯორჯიას“ აღმასრულებელი დირექტორი, ნუცა აბრამიშვილი საუბრობს

,,კომპანიისთვის პირველივე წლებიდან პრიორიტეტი ევროკავშირი, აშშ და სხვა საერთაშორისო ბაზრებია. ნაკლებად დსთ-ს ტრადიციული ბაზრები და პოსტ საბჭოთა სივრცე. რაც იმას ნიშნავს, რომ უფრო რთული სამუშაოა, უფრო დიდი კონკურენციის ეტაპების გავლა გვჭირდება. თუმცა, აუცილებლად უნდა ითქვას, რომ უფრო მაღალია ფასიც. პოსტ საბჭოთა სივრცეში კი, მოთხოვნა ძირითადად დაბალი ფასის ღვინოზეა, ამიტომ ამ ტრაგიკულ ომამდეც, ორიენტირი ტრადიციულ ბაზრებზე ნაკლებად გვქონდა. გასაგებია, რომ უკრაინაში ექსპორტი შეჩერებულია. რუსეთში ომამდე მხოლოდ ჩვენი წარმოების 5% გაგვქონდა. ახლა კი, გვაქვს პოლიტიკა, რომ ღვინოს მხოლოდ ჩვენი პარტნიორები გაიტანენ და ისიც, გადახდის ძალიან მკაცრი გრაფიკით.

„შუხმანი“ ყოველწლიურად დიდ თანხას ხარჯავს ამ მიმართულებით და სწორედ ამის დამსახურებაა, რომ წლიდან წლამდე ვახერხებთ ბაზრების მეტად დივერსიფიცირებას. წელსაც, როგორც გასულ წლებში, გვაქვს მოლოდინი, რომ წარმოების დიდი ნაწილი ექსპორტზე გავა. ვგეგმავთ, დაახლოებით 1.5 მლნ ბოთლის გატანას ქვეყნის გარეთ. ეს იმ შემთხვევაში, თუ გარე ფაქტორები არ შეგვიშლის ხელს, რაც ყოველთვის მნიშვნელოვანი და რიგ შემთხვევებში გადამწყვეტიცაა“, - განაცხადა აბრამიშვილმა.

მისივე თქმით, ჯერ ნაადრევია საუბარი, შეამცირა თუ არა ღვინოზე მოთხოვნა ომმა.

,,ამ ეტაპზე შეუძლებელია ვისაუბროთ, როგორ აისახა ომი ღვინის მოთხოვნაზე, როგორც ქვეყნის შიგნით, ასევე ევროპაში, რომლის შუაგულშიც ომია. ამის შეფასება უკვე წლის ბოლოსთვის იქნება შესაძლებელი, როცა ყველა მონაცემის დათვლა მოხდება“, - ამბობს ნუცა აბრამიშვილი.

წყარო: ,,ბიზნესპრესნიუსი"