1-ლი დეკემბრიდან საქართველოში ე.წ. მწვანე ბარათების სისტემა ამოქმედდება, რეგულაციის თანახმად, რესტორნებში, კაფე-ბარებში, ფიტნეს კლუბებში და სხვა ბიზნეს ობიექტებზე ის მომხმარებლები, რომლებსაც მწვანე ბარათები არ აქვთ, ვეღარ შევლენ. რა მოლოდინები აქვს ბიზნესს და როგორ აისახება ეს მათ საქმიანობაზე —ამ თემაზე რადიო “კომერსანტის“ გადაცემაში „კომერსანტის დილა“ ფიტნეს კლუბის „ოკტოპუსი“ დირექტორმა გიორგი ასათიანმა ისაუბრა. მისი თქმით, აღნიშნული ინიციატივა მისასალმებელია, თუმცა არსებობს საკითხები, რომლებიც ჯერ კიდევ პასუხგაუცემელია.
“მწვანე კოვიდ პასპორტებთან დაკავშირებულ ინიციატივას მე მივესალმები, მაგრამ არის რიგი საკითხები, რაც მგონია რომ დროულად პასუხგასაცემია, პირველი ეს არის ლოგისტიკასთან დაკავშირებული საკითხები, მაგალითად როგორ უნდა მოხდეს ჩვენი მხრიდან ამის მართვა. განსხვავებით სარესტორნო ბიზნესისგან, ჩვენ ერთჯერადი ვიზიტორები არ გვყავს, ჩვენთან მომხმარებელი მოდის, ყიდულობს გრძელვადიან აბონემენტს და შემდეგ გვსტუმრობს მუდმივად, შესაბამისად ყველ ჯერზე უნდა მოხდეს ამის შემოწმება თუ ერთჯერადად უნდა მოხდეს და შემდეგ რაღაც პორტალზე უნდა შევინახოთ, ეგ გასარკვევია.
მეორე საკითხი, რაც გვაინტერესებს, არის ის, რომ გამომდინარე იქიდან, რომ მწვანე ზონა ვიქნებით, მოხდება თუ არა იმ რეგულაციების გაუქმება, რა რეგულაციებითაც დღეს ფიტნეს კლუბები მუშაობენ. ასევე გვაინტერესებს მწვანე პასპორტები, თუ ეხება ფიტნეს კლუბებს და რესტორნებს, რატომ არ ეეხებათ, მაგალითად, სალონებს?
სამწუხაროდ გადაწყვეტილებები ისე მიიღება, რომ ბიზნესი ინფორმაციას მხოლოდ გადაწყვეტილების მიღების შემდეგ იგებს, კოვიდ პასპორტების შემთხვევაშიც ასე მოხდა. ჩვენ უკვე მოვითხოვეთ შეხვედრა ბიზნეს ომბუდსმენთან და შრომის უსაფრთხოების სამსახურთან, რომელსაც ამ კითხვებზე პასუხების ჩამოყალიბება ევალება, იმედია ამ საკითხთან დაკავშირებით კომუნიკაცია დროულად მოხდება“, -აღნიშნა გიორგი ასათიანმა.
გიორგი ასათიანმა პანდემიის პერიოდიც შეაფასა და აღნიშნა, რომ როგორც სხვა სექტორები, ფიტნესიც უპრეცედენტო სიტუაციაში ჩააგდო პანდემიამ. მან ასევე აღნიშნა, რომ მწვანე პასპორტები პანდემიისთვის ახალი ხილია და წინასწარ მოლოდინები ვერ ექნება, თუმცა, როგორც ასათიანმა აღნიშნა, „ოქტოპუსში“ თანამშრომლების უმრავლესობა ვაქცინირებულია, რამაც შესაძლოა მოუხმარებლების რაოდენობა გაზარდოს, რადგან ისინი 100%-ით უსაფრთხო გარემოში მოხვდებიან.
„ეს ყველაფერი არამარტო ფასებზე, არამედ მომსახურებაზეც აისახება, ფასების გაზრდაც ულიმიტოდ არ შეიძლება, რადგან ფასის გაზრდა რაღაც ლიმიტამდე შეგვიძლია, შემდეგ უკვე აზრი აღარ ექნება. როდესაც ეს საძირკველი მორყეულია იქ დაგროვილი გაქვს უამრავი ვალდებულება, ამდენხნიანი გაჩერების შემდეგ, მიმდინარე საოპერაციო ხარჯი გაზრდილია, რადგან გვიწევს პანდემიის მართვის პროცედურების დაცვა, ამის გამო ადამიანური რესურსის გაზრდა მოგვიწია, წინა პერიოდში იყო კომენდანტის საათები, რომლის დროსაც გვიწევდა მომსახურე პერსონალის ტრანსპორტირება, ეს ყველაფერი ერთმანეთს ემატება და ბუნებრივია რომ ფინანსურად ცუდ სურათს ვიღებთ. ერთადერთი, რაც მუშაობის მოტივაციას გვაძლევს, არის ის, რომ ამ პერიოდის გადალახვას შევძლებთ და ნელ-ნელა პანდემიამდელ მუშაობის ტემპს დავუბრუნდებით.
მწვანე ბარათის შემოღებაზე ზოგადად მიდგომები განსხვავებულია, რადგან დარწმუნებული ვარ, რომ მოსახლეობის დიდი რაოდენობა კოვიდ პასპორტების შემოღებას უფრო ნეგატიურად უყურებს, რაღაც კონტინგენტი უფრო მეტად პოზიტიურად, განსხვავებული მიდგომებია სექტორშიც — ისევე როგორც საზოგადოებაში, თუმცა ალბათ ყველაფერს დრო გვაჩვენებს“, - აღნიშნა გიორგი ასათიანმა.
ასათიანის თქმით ოკტოპუს ფიტნეს კლუბმა პანდემიის დროს არათუ კადრების უმრავლესობა შეინარჩუნა, არამედ კოვიდრეგულაციების მართვის გამო ადამიანური რესურსის დამატებაც მოუწიათ.
“ადმინისტრირების კუთხით ადმინისტრაციის მუშაობა უფრო გართულებულია, ვიდრე პანდემიამდე სიტუაციაში, უამრავი სახელმწიფო რეგულაციაა, რომელიც ჩვენზე მოქმედებს, დაწყებული ტაბელების შევსებით — თვითონ სპეციფიკური ფიტნეს კლუბების რეგულაციებით დასრულებული. თანამშრომლების ზრდა ჩვენ კლუბებში აღინიშნება, მაგრამ ეს ხარჯებსაც ზრდის, რაც ბიზნესისთვის დამატებითი წნეხია.
პანდემიამდელ სიტუაციას ბუნებრივია ჩვენ ვერ მივუახლოვდით, პანდემიამდელ სიტუაციასთან მიმართებაში დაახლოებით 20%-იანი ვარდნა გვაქვს, თუმცა ძველი მომხმარებლები გვიბრუნდებიან და ეს ძალიან კარგია და გვიხარია. აღსანიშნავია, რომ პანდემიამდელ მაჩვენებელზე დაბრუნება კარგი მაჩვენებელი არ არის, აქ მნიშვნელოვანია ის, რომ ბოლო ორი წლის განმავლობაში 9-10 თვე ვიყავით დაკეტილები და ბიზნესისთვის 9-10 თვე დაკეტვა ნიშნავს ძალიან ბევრი დაგროვილი გადასახადების გადახდას, რისი გადახდაც ახლა გვიწევს. დღეს ვცხოვრობთ სხვა რეალობაში, რაც ნიშნავს იმას, რომ კომერციული დაწესებულებებისთვის კომუნალური გადასახადები არის 40%-ით გაძვირებული“, - აღნიშნა გიორგი ასათიანმა.
თაკო კვაჭანტირაძე