გარემოს დაცვისა და სოფლის მეურნეობის სამინისტროს მიერ ავტორიზებული მწარმოებლის გაფართოებული ვალდებულებას დაქვემდებარებული ორგანიზაცია „ნარჩენების მართვის ბიზნეს ასოციაცია“ 2023 წლიდან ნარჩენი ზეთების, ნარჩენი საბურავებისა და ნარჩენი აკუმულატორების შეგროვებას - უტილიზაციას დაიწყებს. მანამდე ასოციაცია მოსამზადებელ სამუშაოებს ახორციელებს და ნარჩენების შეგროვების სპეციალური პუნქტების შექმნითაა დაკავებული.
„ნარჩენების მართვის ბიზნეს ასოციაციის“ აღმასრულებელი დირექტორი ვანო მთვრალაშვილი „კომერსანტთან“ საუბარში აცხადებს, რომ 1-ლი ივლისიდან მეწარმე სუბიექტებს, რომელიც ზეთების, საბურავებისა და აკუმულატორების და ელექტრო ხელსაწყოების იმპორტს ახორციელებენ, თუ არ არიან გაწევრიანებული მწარმოებლის გაფართოებული ვალდებულების ორგანიზაციაში, მათ ამ პროდუქციის განბაჟების საშუალება არ აქვთ.
„დღეისათვის სამი სხვადასხვა ნაკადის: ზეთები,საბურავები და აკუმულატორები ჩვენთან უკვე გაწევრიანებულია 160-მდე კომპანია.
2023 წლის 1-ლი იანვრიდან ჩვენს ასოციაციას ვალდებულება აქვს, რომ ნარჩენების ამოღება დავიწყოთ ქვეყნის მასშტაბით. კერძოდ: ეს პროდუქტებია გამონაცვალი ზეთი, საბურავი და აკუმულატორი. ამ პროდუქციის ამოღება ზოგადად ბევრ სირთულესთანაა დაკავშირებული და ახლა ვმუშაობთ იმაზე, რომ ლოჯისტიკურად სწორად დავგეგმოთ და მათ შორის ზედმიწევნით აღვრიცხოთ ამ პროდუქციის რეალიზაციისა და გამოცვლის ობიექტები.
გეტყვით, რომ მეორადი ზეთის და საბურავის გადამამუშავებელი ინფრასტრუქტურა ქვეყანაში ფაქტობრივად არ არსებობს და დღეს ჩვენი მთელი ძალისხმევა მიმართულია იქითკენ, რომ ხელი შევუწყოთ ნარჩენების გადამამუშავებელი საწარმოების შექმნას“, — ამბობს „ნარჩენების მართვის ბიზნეს ასოციაციის“ აღმასრულებელი დირექტორი ვანო მთვრალაშვილი.
მისი თქმით, პროექტის ძირითადი მიზანს წარმოადგენს სახიფათო ნარჩენების შეგროვებას, რაც მნიშვნელოვანია ზოგადად ქვეყანაში გარემოს დაცვისათვის და ამის პარალელურად შეიქმნას ნარჩენების გადამამუშავებელი ინდუსტრია.
„დღევანდელი გადასახედიდან ყველაზე დიდი პრობლემა საბურავების გადამუშავების მიმართულებით გვაქვს, ამიტომ განვიხილავთ ორ ვარიანტს: მოვახდინოთ მეორადი საბურავების ექსპორტი მაგალითად: პაკისტანში, ინდოეთში ანუ სადაც აღნიშნულ პროდუქციაზე მოთხოვნა არსებობს და მეორე ვარიანტია, საბურავების გადამუშავება, დაქუცმაცება, რომლის საშუალებითაც შესაძლებელია სხვადასხვა პროდუქციის მიღება“, — აცხადებს მთვრალაშვილი.
შეგახსენებთ, რომ მწარმოებლის გაფართოებული ვალდებულების დანერგვის მიზნით, საქართველოს მთავრობამ, 2020 წლის 25 მაისს, მიიღო 4 ტექნიკური რეგლამენტი: ნარჩენი ზეთების მართვის შესახებ, საბურავების ნარჩენების მართვის შესახებ, ელექტრო და ელექტრონული მოწყობილობების ნარჩენების მართვის შესახებ, ბატარეებისა და აკუმულატორების ნარჩენების მართვის შესახებ. რეგლამენტებით განსაზღვრულია მგვ სქემაში ჩართული ყველა მხარის უფლება-მოვალეობები.
კანონის თანახმად, 2022 წლის 1-ლი ივლისიდან, შესაბამის მგვ ვალდებულებას დაქვემდებარებული პროდუქციის დისტრიბუტორები ვალდებულნი არიან, ბაზარზე არ განათავსონ იმ მწარმოებლების მიერ მოწოდებული პროდუქცია, რომლებიც არ არიან რეგისტრირებული მგვ რეესტრში და არ არიან მგვ ორგანიზაციის წევრები.
დღეის მდგომარეობით, საქართველოს გარემოს დაცვისა და სოფლის მეურნეობის სამინისტროს მიერ ავტორიზაცია გაცემულია მწარმოებლის გაფართოებული ვალდებულებას დაქვემდებარებულ შემდეგ ორგანიზაციებზე:
• ა(ა)იპ „თეგეტა გრინ პლანეტი“ - შესაბამისობის კოლექტიური სქემა: ნარჩენი ზეთები, ნარჩენი საბურავები, ნარჩენი აკუმულატორები.
• ა(ა)იპ „ნარჩენების მართვის ბიზნეს ასოციაცია“ - შესაბამისობის კოლექტიური სქემა: ნარჩენი ზეთები, ნარჩენი საბურავები, ნარჩენი აკუმულატორები.
• ა(ა)იპ „საქართველოს მწარმოებლის გაფართოებული ვალდებულების ასოციაცია“ - შესაბამისობის კოლექტიური სქემა: ნარჩენი ზეთები, ნარჩენი საბურავები, ნარჩენი ბატარეები და აკუმულატორები, ნარჩენი ელექტრო და ელექტრონული მოწყობილობები.