ინფორმაციული ტექნოლოგიების განვითარების პარალელურად გაქტიურდა დისკუსიები კიბერბულინგისა და ონლაინ სივრცესთან დაკავშირებული საფრთხეების შესახებ. ეს საკითხი განსაკუთრებით აქტუალურია არასრულწლოვანებსა და მოზარდებში. როგორ უნდა დავიცვათ ჩვენი შვილები კიბერბულინგისგან და რა საფრთხეები არსებობს ონლაინ სივრცეში ბავშვებისთვის - რადიო „კომერსანტისა“ და არასამთავრობო ორგანიზაცია ინტერნეტის განვითარების ინიციატივის ერთბლივ გადაცემაში საიბერ თოქი, საქართველოს ინფორმაციული უსაფრთხოების ასოციაციის პრეზიდენტმა გიორგი გურგენიძემ ისაუბრა.
ინფორმაციული ტექნოლოგიები ჩვენი ცხოვრების ყველა კომპონენტში შემოდის,განსაკუთრებით პანდემიის პირობებში,როდესაც სკოლებში, უნივერსიტეტებში,საჯარო თუ კერძო დაწესებულებები სრულად გადავიდა სახლში მუშაობის პრინციპებზე. ამ პირობებში, განსაკუთრებით მნიშვნელოვანია ბავშვების უსაფრთხოება. ძალიან კარგია,როდესაც ახალ თაობას შეუძლია ტექნოლოგიების გამოყენება, თუმცა, შემეცნების, გართობისა და სხვა სიკეთეების კომპონენტებთან ერთად, არსებობს ბევრი საფრთხეც,- ამბობს გიორგი გურგენიძე.
ის მშობლების მხრიდან სოციალურ ქსელში ბავშვების ფოტოებისა და სხვა დამატებითი ინფორმაციის განთავსების საფრთხეებზე საუბრობს.
პირველ რიგში, უნდა ვისაუბროთ მშობლების კომპონენტზე. ისინი სოციალურ ქსელებში აქტიურად დებენ შვილების ფოტოებს, ადგილმდებარეობის და სხვა დამატებით ინფორმაციას,რაც შეიძლება საფრთხის შემცველი აღმოჩნდეს. მაგალითისთვის, არაკეთილმოსურნემ ჩაიგდო სახლის, მათი მანქანის, ან შვილის სკოლისა და ბაღის ადგილმდებარეობის შესახებ ინფორმაცია. ამდენად, მშობელი უნდა დაფიქრდეს, შეუქმნის თუ არა ესათუის ფოტო მის შვილს საფრთხეს.
კონტროლის თვალსაზრისით, მშობლებს შეუძლიათ შექმნან ანგარიშები,სადაც მიუთითებენ,რომ ეს არის ბავშვის ანგარიში,რის შემდეგაც, გარკვეული არასასურველი შინაარსის კონტენტი, იქნება ეს ძალადობა, რასიზმი, პორნოგრაფია,თუ ტერორიზმი, მაქსიმალურად შეიზღუდება. რა თქმა უნდა, არ არსებობს 100%-იანი დაცვა, თუმცა, მაქსიმალურად უნდა ვეცადოთ,რომ მობილური მოწყობილობები იქნება, ტაბლეტები,თუ გუგლის საძიებო სისტემა, გამოვიყენოთ მათი ფილტრაციის საშუალებები და ბავშვზე მორგებული დაცვის მექანიზმები.
კიბერბულინგის ერთ-ერთი სახეობაა ცრუ ინფორმაციის გავრცელება, არის შემთხვევები,როდესაც ბავშვები თავის თანატოლებს ყალბი პროფილის შექმნით ცუდ ინფორმაციას უვრცელებენ ; კიბერბულინგს მიეკუთნება ასევე ფოტოების გამოძალვა, მუქარა მიმოწერის გასაჯაროებაზე შიშველი ფოტოების სანაცვლოდ. ამდენად, მნიშვნელოვანია ვიცოდეთ,თუ როგორ ამოვიცნოთ ჩვენი შვილი კიბერბულინგის ან შეტევის მსხვერპლია თუ არა, და რა უნდა გავაკეთოთ პრევენცისითვის და პრობლემის აღმოსაფხვრელად,- აღნიშნავს გიორგი გურგენიძე.
მისი თქმით, აღნიშნული პრობლემებისგან თავის ასაცილებლად აუცილებელია ბავშვებისთვის ცნობიერების ამაღლება კიბერ საფრთხეების შესახებ. ბავშებმა უნდა იცოდენ, ვის ამატებენ სოციალურ ქსელებში, შეიძლება ფოტოზე გამოსახული 12 წლის ბავშვი აღმოჩნდეს 60 წლის მამაკაცი. ამდენად, უნდა ვიცოდეთ,რომ ვინც ფოტოზეა აუცილებლად არ ნიშნავს იმას,რომ ის გწერთ.მშობლები აუცილებლად უნდა დაეჭვდნენ, თუ ბავშვი სწრაფად ხურავს ან რთავს ლეპტოპს, ტელეფონს, არ გვაჩვენებს მიმოწერას, ზარის შემდეგ გვეჩვენება შეშინებული და გაურბის საუბარს.მნიშვნელოვანია,თუ ბავშვებს საზაფხულო სკოლების,თუ სხვადასხვა ტიპის ღონისძიებების საშუალებით პირდაპირ უთხრან,რა რისკებია კიბერ საფრთხის თვალსაზრისით და როგორი ნეგატიური შედეგები შეიძლება მოჰყვეს.- აღნიშნავს გიორგი გურგენიძე.