ევროკომისიის პრეზიდენტ ურსულა ფონ დერ ლაიენს იმ კანონპროექტის განბლოკვა სურს, რომელიც კომპანიების დირექტორთა საბჭოებში ქალთა წარმომადგენლობის გაზრდას ითვალისწინებს. კანონპროექტი 2012 წლიდან შეჩერებულია. ინფორმაციას Reuters ავრცელებს.

სააგენტოს ცნობით, გერმანია ევროკავშირის იმ ქვეყნებს შორის იყო, რომლებიც ქალთა კვოტისდაწესებას ეწინააღმდეგებოდნენ და ამტკიცებდნენ, რომ საკითხი წევრ სახელმწიფოებში, ეროვნულ დონეზე უნდა გადაწყდეს. თუმცა ბერლინის ახალმა მთავრობამ ამ პოზიციას გადახედა.

2012 წელს ევროკავშირის აღმასრულებელმა დირექტორმა წევრ სახელმწიფოებს შესთავაზა, რომ ბლოკის ბირჟებზე დარეგისტრირებულმა კომპანიებმა მმართველი საბჭოს ადგილებიქალების, მინიმუმ, 40%-ით უნდა შეავსონ. ამ მიზნით, ერთ პოზიციაზე თანაბრად კვალიფიციური პირების განაცხადებს შორის, პრიორიტეტი სუსტი სქესის წარმომადგენელ კანდიდატებს უნდა მინიჭებოდათ.

შეთავაზებული დირექტივა სანქციებს არ აწესებს, მაგრამ კომპანიებმა უნდა ახსნან, თუ რატომ ვერ მიაღწიეს ამ მიზანს და განმარტონ, რა ნაბიჯებს გადადგამენ მის მისაღწევად.

იმ ფირმებზე, რომლებსაც 250-ზე ნაკლები თანამშრომელი ჰყავთ და კომპანიებზე, რომლებიც ბირჟაზე დარეგისტრირებული არ არიან, შეთავაზებული დირექტივა არ გავრცელდება. არსებული მონაცემებით, ეს კანონი ევროკავშირის, დაახლოებით, 2 300 კომპანიას შეეხება.

ევროკავშირის 27 ქვეყნიდან 18, ანუ უმრავლესობადირექტივას მხარს უჭერს, მაგრამ ეს რაოდენობა კანონპროექტის დასამტკიცებლად საკმარისი არ არის, რასაც აბსოლუტური უმრავლესობა სჭირდება.

8 ქვეყანა, დანია, ესტონეთი, ხორვატია, უნგრეთი, ნიდერლანდები, პოლონეთი, შვედეთი და სლოვაკეთი, წინადადებას ეწინააღმდეგება და ამტკიცებს, რომ საკითხი ეროვნულ დონეზე უნდა დარეგულირდეს. ანგელა მერკელის კანცლერობისდროს ამ ჯგუფში გერმანიაც შედიოდა, მაგრამ ახალი მთავრობა ამბობს, რომ საკითხს ახლებურად შეხედავს. Reuters-ის შეფასებით, ბერლინის თანხმობის შემთხვევაში, ბალანსი კანონმდებლობის სასარგებლოდ შეიცვლება.

ევროკავშირის 8 ქვეყანამ, ბელგიამ, საფრანგეთმა, იტალიამ, გერმანიამ, ავსტრიამ, პორტუგალიამ, საბერძნეთმა და ნიდერლანდებმა, განსაზღვრული კომპანიებისთვის სავალდებულო გენდერული კვოტები ეროვნულ დონეზე დააწესა.

10-მა ქვეყანამ, დანიამ, ესტონეთმა, ირლანდიამ, ესპანეთმა, ლუქსემბურგმა, პოლონეთმა, რუმინეთმა, სლოვენიამ, ფინეთმა და შვედეთმა, შედარებით რბილი მიდგომა აირჩია და მხოლოდ გარკვეულ ზომებსა და ინიციატივებს მიმართა.

9 ქვეყანას, ბულგარეთს, ჩეხეთს, ხორვატიას, კვიპროსს, ლატვიას, ლიეტუვას, უნგრეთს, მალტასა და სლოვაკეთს, არანაირი ზომა არ მიუღია.

გენდერული თანასწორობის ევროპული ინსტიტუტის (European Institute for Gender Equality-EIGE) მონაცემებით,მსხვილი კომპანიების საბჭოებში 45,3%-ის სახით, საფრანგეთს ქალების ყველაზე ძლიერი წარმომადგენლობა ჰყავს მაშინ, როცა მთლიანად ევროკავშირში საშუალო მაჩვენებელი 30,6%-ია.

EIGE-ის მიხედვით, ევროკავშირის წევრიქვეყნებიდან 2011 წლის 13%-დან დაწყებული, ქალების წილი კომპანიების საბჭოებში გაიზარდა:

• 36,4%-მდე იმ ქვეყნებში, რომლებმაც მაღალ თანამდებობებზე ქალთა დაწინაურების კანონი მიიღეს

• 30,3%-მდე რბილი ზომების მომხრე ქვეყნებში

• 16.6%-მდე იმ ქვეყნებში, რომლებსაც ამ მხრივ არაფერი მოუმოქმედებიათ.

წყარო: "ბიზნესპრესნიუსი"