„ჩვენი გონივრული, თანმიმდევრული პოლიტიკის შედეგად, დღეს ქვეყანაში გვაქვს არათუ მშვიდობა და სტაბილურობა, არამედ ორნიშნა ეკონომიკური ზრდა. გასულ წელსაც ჩვენ წელი დავასრულეთ ორნიშნა ეკონომიკური ზრდით, რაც ბუნებრივია, აისახება ჩვენს ხალხზე, საზოგადოებაზე“, - ეს განაცხადება, ელჩებთან შეხვედრისას საქართველოს პრემიერ-მინისტრმა ირაკლი ღარიბაშვილმა გააკეთა.
საქართველოს ეკონომიკა რომ „დუღს“ ამაზე წელს ხელისუფლების სხვა წარმომადგენლებიც საუბრობდნენ, თუმცა მთავრობის, ეროვნული ბანკის და საერთაშორისო ორგანიზაციების პროგნოზებით ქართული ეკონომიკის ასეთი „დუღილი“ 2023 წელს აღარ არის მოსალოდნელი.
წლევანდელი ორნიშნა ეკონომიკური ზრდის შემდეგ, მომავალი წლის ბიუჯეტი დაგეგმილია 5%-იან ეკონომიკურ ზრდაზე, ხოლო ნომინალური მშპ 79 მილიარდ 685 მილიონ ლარს შეადგენს.
მთავრობასთან შედარებით ეკონომიკური ზრდის უფრო პესიმისტური პროგნოზი აქვს ეროვნულ ბანკს. სებ-ი მომდევნო წელს მთლიანი შიდა პროდუქტის 4%-იან ზრდას პროგნოზირებს. რაც შეეხება სხვა მაკროეკონომიკურ პროგნოზებს, ეროვნული ბანკი მოელის, რომ მომდევნო წელს რეფინანსირების განაკვეთი, რაც ამჟამად 11%-ზეა, 1.4 პროცენტული პუნქტით შემცირდება, ხოლო ინფლაცია საშუალოდ 5.3% იქნება.
საერთაშორისო სავალუტო ფონდი კი 2023 წელს საქართველოში 4%-იან ეკონომიკურ ზრდას პროგნოზირებს, რაც წლევანდელთან შედარებით ორნახევარჯერ ნაკლებია. სავალუტო ფონდი მომდევნო წელს ქვეყანაში ბიუჯეტის დეფიციტის შემცირებას უჭერს მხარს. გარდა ამისა, IMF-ი პრიორიტეტად სახელმწიფო საწარმოების კორპორატიზაციის რეფორმას და ენერგეტიკის სექტორის მხარდაჭერის სისტემის ცვლილებას ასახელებს.
მსოფლიო ბანკის ჯგუფის ბოლო შეფასებით, 2023 წელს საქართველოს ეკონომიკა მხოლოდ 4%-ით გაიზრდება. მათი პროგნოზით, იმ ქვეყნებში, საიდანაც საქართველოში ვიზიტორები ჩამოდიან, მოსალოდნელია ეკონომიკური ზრდის შენელება, შესაბამისად, ამან შეიძლება მოახდინოს გავლენა მომდევნო წელს ეკონომიკური ზრდის შესაძლებლობებზე.
„გალთ & თაგართშიც“ მომავალი წლის ეკონომიკურ ზრდას დაახლოებით 4%-ის ფარგლებში პროგნოზირებენ.
ყველაზე პესიმისტური პროგნოზი „თიბისი კაპიტალს“ აქვს, მათი მოლოდინით, 2023 წელს საქართველოს ეკონომიკური ზრდის ტემპი 3.5%-მდე შენელდება. ანალიტიკური ორგანიზაციის ინფორმაციით, ეს პროგნოზი ეყრდნობა გათვლებს, რომ მომავალ წელს მიგრანტების 30% საქართველოს დატოვებს, თუმცა პარალელურად, ე.წ. ტრადიციული ტურიზმი მეტად აღდგება.