თუ აქციებიდან დივიდენდის მიღება გსურთ, ისეთი კომპანიები უნდა შეარჩიოთ, რომლებიც დივიდენდებს გასცემენ. რადგან კომპანიაზეა დამოკიდებული, რამდენი იქნება დივიდენდი და როდის გაიცემა ის. რა თანხა უნდა გაიცეს თითოეულ აქციაზე, ამაზე კომპანიის მმართველი საბჭო თანხმდება. მაგალითად, თუ თქვენ რომელიმე კომპანიის 10 აქციას ფლობთ, ხოლო დივიდენდი თითოეულ აქციაზე $5-ს შეადგენს, მიიღებთ $50-ს. დივიდენდის სახით მიღებული სარგებელი ძირითადად, ინვესტირებული თანხის 4-10% ფარგლებში მერყეობს. კომპანიები დივიდენდებს, ძირითადად, გასცემენ წელიწადში ერთხელ, ყოველი 6 თვის ან თითოეული კვარტლის განმავლობაში.
როგორი კომპანიები გასცემენ დივიდენდებს
დივიდენდებს უფრო მეტად ფინანსურად ძლიერი და ბაზარზე მყარად დამკვიდრებული კომპანიები იხდიან, რომლებსაც ფულის მთლიანად რეინვესტირება თავიანთ ბიზნესში აღარ სჭირდებათ. ამიტომ მიიჩნევა დივიდენდი კომპანიის ფინანსური კეთილდღეობის მაჩვენებლად. მზარდი (ტექნიკური ან ბიოტექნოლოგიური) კომპანიები, იშვიათად გასცემენ დივიდენდებს, რადგან მათთვის აუცილებელია მოგების ბიზნესის გაფართოებისთვის გამოყენება.
ყველაზე სანდო ამერიკული კომპანიები დივიდენდებს წლების განმავლობაში, რეგულარულად ზრდიან. ზოგიერთის შემთხვევაში ეს ათწლეულების განმავლობაში გრძელდება. როგორც კი რომელიმე ასეთი კომპანია გაზრდის დივიდენდს, ინვესტორებს უჩნდებათ მოლოდინი, რომ ის მომავალშიც შენარჩუნდება, თუნდაც, ბიზნესს რთული დრო დაუდგეს.
ასევე, საინტერესოა, კომპანიის დივიდენდების გადახდის ისტორიის გადახედვა. ფირმებს, რომლებიც მოგების ნაწილს ათწლეულების განმავლობაში უხდიან აქციონერებს, რამდენიმე უპირატესობა აქვთ. პირველ რიგში, ეს ნიშნავს, რომ კომპანიას აქვს სტაბილურად მზარდი ბიზნესი. გარდა ამისა, ეს იმაზეც მიუთითებს, რომ მენეჯმენტისთვის აქციონერების ინტერესების დაცვა მნიშვნელოვანია.
ხშირ შემთხვევაში ასეთი კომპანიები, დივიდენდების გადახდის გარდა, ასევე, ყიდულობენ საკუთარი აქციების ნაწილს. ამის გამო მიმოქცევაში არსებული ფასიანი ქაღალდების რაოდენობა მცირდება, რაც, საბოლოო ჯამში, დარჩენილი აქციების კიდევ უფრო გაძვირებას იწვევს.
როგორ შევაფასოთ დივიდენდები
ინვესტორს შეუძლია გამოიყენოს სხვადასხვა მეთოდი, რათა მეტი შეიტყოს კომპანიის დივიდენდის ოდენობის შესახებ და შეადაროს ის მსგავს კომპანიებს. თუ კომპანიას სტაბილური ფინანსური მდგომარეობა აქვს, ე.ი. ის დივიდენდების გადახდას შეძლებს მაშინაც კი, თუ რომელიმე წელს მოგების ოდენობა დიდი არ იქნება.
დივიდენდის გამცემი კომპანიები პოპულარულია ისეთ ინვესტორებს შორის, რომელთაც უბრალოდ აქციებით ვაჭრობა კი არ სურთ, არამედ მათი გრძელვადიანი მიზანი ძვირად ღირებული დივიდენდის გადამხდელი პორტფელის შექმნაა. ეს მათ პასიური შემოსავლის მიღების საშუალებას აძლევს.
რატომ გასცემენ კომპანიები დივიდენდებს
შეიძლება, ზოგიერთ ადამიანს გაუჩნდეს კითხვა, თუ რატომ გასცემენ კომპანიები დივიდენდებს, როდესაც შეუძლიათ, ეს თანხა ბიზნესის გასაზრდელად და მის გასაფართოებლად გამოიყენონ. ფირმების დიდი ნაწილი მართლაც ასე იქცევა. თუმცა, არსებობს ორი ძირითადი მიზეზი, რის გამოც კომპანიები ამჯობინებენ, თანხა აქციების მფლობელებს გადაუხადონ:
ერთი მიზეზი ისაა, რომ, ინვესტორების მნიშვნელოვან ნაწილს ყოველთვის ურჩევნია, ფული ისეთი კომპანიის აქციებში დააბანდოს, რომელიც დივიდენდებს გასცემს. ეს მათ საშუალებას აძლევს, ინვესტიციებიდან სტაბილური შემოსავალი მიიღონ. შესაბამისად, ასეთი კომპანიების აქციებს მეტი მყიდველი ჰყავს, რაც მათზე დადებითად აისახება.
მეორე მიზეზი კი ისაა, რომ თუ კომპანია დივიდენდებს სტაბილურად იხდის, ეს მკაფიო გზავნილია ინვესტორებისთვის, რომ მას აქვს ფინანსური შესაძლებლობა, საკუთარი მოგების ნაწილი აქციონერებს გაუნაწილოს. გარდა ამისა, ეს ნიშნავს, რომ კომპანიის მენეჯმენტს სამომავლო შემოსავლებთან დაკავშირებით პოზიტიური მოლოდინი აქვს.
ცნობისთვის, მსოფლიოს წამყვანი კომპანიების აქციებით ვაჭრობა უკვე მობილბანკის საშუალებით არის შესაძლებელი. ვაჭრობის დაწყება 1 დოლარითაც შეიძლება. აპლიკაციაში შესაძლებელია კომპანიების სიის შექმნაც, რაც მათი აქციების ფასებზე თვალის დევნების საშუალებას მოგვცემს.
ვაჭრობა/ინვესტირება დაკავშირებულია მაღალ რისკებთან და იმ შემთხვევაშიც კი, თუ რეკომენდაციების შესაბამისად არის განხორციელებული, შესაძლოა გამოიწვიოს არსებითი დანაკარგები, ისევე როგორც მოგება. თქვენს მიერ დეტალურად უნდა იქნეს გაანალიზებული, რამდენად მისაღებია თქვენთვის ვაჭრობა/ინვესტირება თქვენი ფინანსური მდგომარეობის გათვალისწინებით და შეგიძლიათ თუ არა აიღოთ თანხის დაკარგვის მაღალი რისკი. ვაჭრობის/ინვესტირების განხორციელება არანაირი ფორმით არ უზრუნველყოფს მოგებას.
წყარო: businessfeed.ge