კერძო კაპიტალის ბაზარი 50-წლიან ისტორიას ითვლის და განვითარებას განაგრძობს. თანამედროვე ბიზნესრეალობამ კერძო კაპიტალის ბაზარზე ახლებური მიდგომები გააჩნია, რაც უფრო ეფექტიან შედეგებს უზრუნველყოფს.
კერძო კაპიტალის ფონდების საქმიანობის მოდელი ასეთია – ყიდულობენ პოტენციალის მქონე კომპანიებს ან წილებს კომპანიებში, ავითარებენ, უზრდიან ღირებულებას და გაზრდილი ღირებულებით ასხვისებენ.
დღესდღეობით კერძო კაპიტალის ფირმების ნაწილი თავიანთ პორტფელურ კომპანიებს, ძირითადად, ერთმანეთისგან დამოუკიდებლად ავითარებენ და, შესაბამისად, დამოუკიდებელ ინვესტიციებადაც განიხილავენ, რაც შესაძლოა, ნაკლებეფექტიანი აღმოჩნდეს.
თანამედროვე სამყარო და ბიზნესგარემო საჭიროებს განსხვავებულ მიდგომებს, რაც გულისხმობს თანამშრომლობასა და კოლაბორაციას – ცოდნისა და რესურსების გაერთიანებას უკეთესი შედეგის მისაღებად. კერძო კაპიტალის ორგანიზაციები საკუთარ პორტფელს უნდა მიუდგნენ ისე, როგორც ბიზნესეკოსისტემას. ამ ეკოსისტემაში პორტფელში არსებული კომპანიები უნდა მოიაზრებოდნენ, როგორც ერთმანეთის დამხმარე და შემავსებელი ნაწილები.
პორტფელური კომპანიების თანამშრომლობა შესაძლოა მოიაზრებდეს თუნდაც ერთმანეთისთვის საჭირო პროდუქტისა თუ მომსახურების პარტნიორულ ფასებში შეთავაზებას, ცოდნისა და გამოცდილების გაცვლას, საჭიროების შემთხვევაში, ერთმანეთისთვის საწარმოო ან/და ადამიანური რესურსებით დახმარებას. უფრო კონკრეტულად, სინერგია შეიძლება იყოს: საერთო გაყიდვების არხების გამოყენება, დისტრიბუციის საერთო სისტემის შექმნა, პროდუქტების პაკეტური შეთავაზებები, გამოწერის სერვისებში კოლაბორაცია და ა.შ. ამ ერთიანი ძალისხმევის საბოლოო მიზანი კომპანიების მიერ ერთმანეთისა და მთლიანად თავიანთი ბიზნესეკოსისტემის გაძლიერებაა.
სინერგიული მიდგომებით კერძო კაპიტალის ფონდები შეძლებენ, მოსალოდნელზე უფრო ადრე გაუზარდონ ღირებულება კომპანიებს და კომპანიის წილების გაზრდილი ღირებულებით გასხვისებას. აღსანიშნავია, რომ თანამშრომლობა და კოლაბორაცია არ გულისხმობს პორტფელური კომპანიების ერთი მმართველობის ქვეშ გაერთიანებას. ამ ორგანიზაციებმა უნდა შეინარჩუნონ ავტონომია და ფუნქციონირება დამოუკიდებლად უნდა შეეძლოთ.
თანამედროვე ბიზნესგარემოს გათვალისწინებით, რაც ხშირ შემთხვევაში კრიზისთან და რისკ-ფაქტორებთან არის დაკავშირებული, კიდევ უფრო მნიშვნელოვანია საერთო ძალისხმევა წარმატების მისაღწევად.
პორტფელში კომპანიებს შორის სინერგიის მიღწევით ხარჯების დაზოგვა, მათი სწრაფად ზრდა და განვითარებაა შესაძლებელი, რაც მომგებიანია როგორც კერძო კაპიტალის ფონდისთვის, ისე მის პორტფელში არსებული კომპანიებისთვის. შესაბამისად, კერძო კაპიტალის ფონდებმა ახალი კომპანიის არჩევისას ყურადღება უნდა მიაქციონ იმ ფაქტორს, თუ როგორ შეავსებს ახალი კომპანია არსებულ ბიზნეს ეკოსისტემას – რით დაეხმარება ახალი კომპანია პორტფელში მყოფ სხვა კომპანიებს ან როგორ შეძლებენ სხვები მის ხელშეწყობას.
წყარო: HBR
კერძო კაპიტალის ბაზარი
