საფონდო ბირჟის ვარდნის, ანუ აქციების გაუფასურების დროს, ჩნდება ჩადებული ინვესტიციის დაკარგვის საფრთხე. ამგვარი რისკებისგან თავის არიდების მიზნით, ინვესტორები დივერსიფიცირებულ საინვესტიციო პორტფელს ქმნიან, სადაც ისინი აქციებს, ობლიგაციებსა და სხვა, უფრო დაცულ აქტივებს აერთიანებენ.
კარგ საინვესტიციო პორტფელად დივერსიფიცირებული აქტივების ნაკრებია მიჩნეული. ეს გულისხმობს, რომ პორტფელი უკეთ გაუმკლავდება ბაზრის ვარდნას.
პორტფელში თავმოყრილი ზოგიერთი აქტივი შეიძლება უფრო მაღალი რისკის შემცველი იყოს, ზოგი კი – უფრო მეტად სტაბილური. ზოგადად, შედარებით არასტაბილურ აქტივად აქციები ითვლება. თუმცა, ამავე დროს, მათ უფრო მაღალი მოგების მოტანაც შეუძლიათ. ხოლო ფასიან ქაღალდებს, როგორებიცაა ობლიგაციები და სადეპოზიტო სერტიფიკატები, ფიქსირებული შემოსავალი მოაქვთ და შესაბამისად, უფრო უსაფრთხო ინვესტიციად მიიჩნევა.
ბევრი ფიქრობს, რომ პორტფელის ძირითად ბირთვს აქციები და ობლიგაციები უნდა შეადგენდნენ. ხშირად ასეც არის, თუმცა, პორტფელი შეიძლება მოიცავდეს აქტივების ფართო სპექტრს, მათ შორის უძრავ ქონებას, ხელოვნების ნიმუშებსა და სხვა აქტივებს.
როგორ ხდება საინვესტიციო პორტფელის მართვა
როგორი იქნება საინვესტიციო პორტფელის შემადგენლობა, უამრავ ფაქტორზეა დამოკიდებული, მაგრამ ყველაზე მნიშვნელოვანი ინვესტორის დამოკიდებულებაა მოსალოდნელი რისკისა და იმ შემოსავლის მიმართ, რასაც ის შეძენილი აქტივებიდან ელოდება.
სხვაგვარად რომ ვთქვათ, როგორ დაკომპლექტდება პორტფელი, ეს დამოკიდებულია იმაზე, თუ რამხელა რისკის გაწევა შეგიძლიათ, რა ვადაში და რა ოდენობის შემოსავლის მიღებას ელოდებით ჩადებული ინვესტიციიდან.
ვინც დიდი რისკისთვის მზად არის, პორტფელის დიდ ნაწილს უთმობს აქციებს და შედარებით ნაკლებს – ობლიგაციებსა და სხვა ფიქსირებული შემოსავლის მქონე ფასიან ქაღალდებს, ასევე, ე.წ. ლურჯი ჩიპის აქციებს. ინვესტორი, რომელსაც მეტი მოგების მიღება სურს, ინვესტიციას დებს აქციებსა და უფრო მეტად სარისკო ფასიან ქაღალდებში.
დივერსიფიცირების მიუხედავად, საინვესტიციო პორტფელს მუდმივი მონიტორინგი სჭირდება, რადგან ინვესტორის ფინანსური მდგომარეობა, საჭიროებები და რისკების მიმართ დამოკიდებულება დროთა განმავლობაში იცვლება. ამ დროს საჭიროა პორტფელის გადახალისება. შეიძლება, უკეთესი იყოს აქციების რაოდენობის შემცირება. ხოლო თუ მეტი რისკისთვის მზად ხართ, პორტფელში მაღალმომგებიანი აქციების წილს გაზრდით.
გასულ წელს საქართველოს ბანკმა Galt&Taggart–თან თანამშრომლობით შექმნა ინვესტირების სპეციალური პლატფორმა, რომელიც მობილბანკითაა ხელმისაწვდომი და მომხმარებელს ამერიკულ საფონდო ბირჟებზე ათასობით კომპანიის აქციითა და ფასიანი ქაღალდით ვაჭრობის შესაძლებლობას აძლევს. ინვესტორების დაწყება კი 1 დოლარითაცაა შესაძლებელი.
ვაჭრობა/ინვესტირება დაკავშირებულია მაღალ რისკებთან და იმ შემთხვევაშიც კი, თუ რეკომენდაციების შესაბამისად არის განხორციელებული, შესაძლოა გამოიწვიოს არსებითი დანაკარგები, ისევე როგორც მოგება. თქვენს მიერ დეტალურად უნდა იქნეს გაანალიზებული, რამდენად მისაღებია თქვენთვის ვაჭრობა/ინვესტირება თქვენი ფინანსური მდგომარეობის გათვალისწინებით და შეგიძლიათ თუ არა აიღოთ თანხის დაკარგვის მაღალი რისკი. ვაჭრობის/ინვესტირების განხორციელება არანაირი ფორმით არ უზრუნველყოფს მოგებას.
წყარო: businessfeed.ge