15 თებერვლიდან, მედიკამენტების რეფერენტული ფასების რეფორმა ძალაში შევიდა, რაც იმას ნიშნავს, რომ ფარმაცევტულ კომპანიებს წამლების ზღვრულ ფასებზე ძვირად გაყიდვის უფლება არ ექნებათ.

„კომერსანტი“ დაინტერესდა რამდენად მომზადებული შეხვდა ფარმაცევტული სექტორი რეფორმას, როგორ მიმდინარეობს პროცესი და ხომ არ შექმნილა რომელიმე მედიკამენტზე დეფიციტი.

ჯიპისი-ში „კომერსანტს“ განუცხადეს, რომ რადიკალური ცვლილება ამ მომენტისთვის არცერთ ასპექტში არ შეინიშნება.

PSP-ის საზოგადოებასთან ურთიერთობის სამსახურის მენეჯერმა ნათია ხაბეიშვილმა „კომერსანტთან“ აღნიშნა, მედიკამენტის მომწოდებლებმა საქართველოს ფარმაცევტული ბაზრის მიმართ საფასო პოლიტიკა შეცვალეს და აღნიშნულ მედიკამენტებს დღეიდან მომხმარებლები ახალი ფასით შეიძენენ.

„მომწოდებლებმა მედიკამენტების გარკვეულ ნაწილზე საქართველოს ფარმაცევტული ბაზრის მიმართ საფასო პოლიტიკა შეცვალეს, შესაბამისად ეს მედიკამენტები რეფერენტულ ფასს დაექვემდებარება და უკვე დღეიდან მომხმარებლებს აღნიშნული მედიკამენტების შეძენა უკვე დაბალი ფასით შეუძლიათ, ხოლო იმ მედიკამენტების მწარმოებლებმა, რომლებიც რეფერენტულ ფასებში ვერ ჯდებიან ჯანდაცვის სამინისტროს მიმართეს და ველოდებით მათ პასუხს,“ - აღნიშნა ნათია ხაბეიშვილმა.

„ავერსი ფარმას“ მომარაგების დირექტორმა ლევან გაჩეჩილაძემ jandacva.ge-სთან განმარტა, რომ არიან ევროპული კომპანიები, რომლებმაც დრო მოითხოვეს ფასების გადასახედად.

„სახელმწიფოს და დისტრიბუტორების გარდა ფარმაცევტულ ბაზარზე უმთავრესი როლი ენიჭება მწარმოებლებს და მომწოდებლებს. რამდენიმე თვეა, მომწოდებლებთან კომუნიკაცია გვაქვს, ისინი ინფორმირებულები არიან სახელმწიფოში მიმდინარე და გასატარებელი რეფორმების შესახებ და ბევრი კომპანია წამოვიდა იმაზე, რომ მოსაწოდებელი ფასები დააკორექტიროს. ზუსტად ეს გვაძლევს იმის საშუალებას, რომ შესაბამისად, ჩვენც მოვახდინოთ ფასების კორექცია. ზოგიერთი მედიკამენტი ჯერ კიდევ არ არის გამოქვეყნებული და თავად ჯანდაცვის სამინისტროს ინფორმაციითაც ხდება მათზე აპელაციების განხილვა. არიან ევროპული კომპანიები, რომლებმაც დრო მოითხოვეს ფასების გადასახედად. მოხდება როგორც სამინისტროს, ისევე ამ კომპანიების მხრიდანაც კომპრომისების შეჯერება და მოკლე პერიოდში ჩვენ გვეცოდინება დამატებით 400-მდე მედიკამენტზე ახალი რეფერენტული ფასები,“ – განაცხადა გაჩეჩილაძემ.

ფარმაცევტული კომპანიების წარმომადგენელთა ასოციაციის დირექტორმა ირაკლი მარგველაშვილმა „კომერსანტთან“ განაცხადა, რომ 15 თებერვლიდან ჯერ კიდევ ყველა მედიკამენტზე არ არის რეფერენტული ფასი, საბოლოო სურათს 15 მარტის შემდეგ მივიღებთ და მხოლოს მას შემდეგ გახდება დადგენილ ფასზე ძვირად მედიკამენტების რეალიზება დასჯადი.

„15 იანვარს დაახლოებით 1200 დასახლების მედიკამენტებზე რეფერენტული ფასები გამოქვეყნდა. რეფერენტული არის მაქსიმალურად დასაშვები ფასი, რა ფასშიც შეიძლება მედიკამენტი გაიყიდოს. კომპანიებს მიეცათ 2 კვირა, რომ გამოქვეყნებულ ფასებთან დაკავშირებით სამინისტროში კომენტარები, პრეტენზიები და შენიშვნები მიეწოდებინა. ამ კომენტარების გაცვლის პერიოდი 1 თვეა. დაკვირვების პერიოდი კიდევ 15 მარტამდე გრძელდება და 15 მარტის შემდეგ მედიკამენტების დადგენილ ფასებზე ძვირად რეალიზაცია დასჯადი იქნება.

რეფერენტულ ფასებს დაქვემდებარებული მედიკამენტების დაახლოებით 30%-ზე შევიტანეთ განაცხადი, თუმცა როგორი იქნება ჯანდაცვის სამინისტროში მოქმედი სპეციალური კომისიის გადაწყვეტილება –  უცნობია. ბევრი ტექნიკური დეტალია, რომელზეც ბიზნესი პასუხს ელოდება. ასევე გადასაწყვეტია უკვე არსებული მარაგების საკითხი, რომლის რეალიზაციაც ბიზნესს გარკვეულ თანხად აქვს დაგეგმილი. ხომ ვერ ვაიძულებთ კერძო ბიზნესს, მედიკამენტები თვითღირებულებით გაყიდოს?“ - განაცხადა ირაკლი მარგველაშვილმა. 

პირველ ეტაპზე რეფორმა ქრონიკული და ონკოლოგიური დაავადებების სამკურნალო მედიკამენტებს შეეხო.