5 საუკეთესო საფონდო ინდექსი

ინვესტორები საფონდო ინდექსების მიმართ ყოველთვის დიდ ინტერესს იჩენენ. ამას რამდენიმე მიზეზი აქვს – საფონდო ინდექსები ინვესტორებს სთავაზობენ სხვადასხვა სახის აქციას, ინვესტიციის დივერსიფიკაციას და დაბალ რისკს – ამ ყველაფერს საკმაოდ დაბალი საკომისიოს სანაცვლოდ. ამიტომ ბევრი ინვესტორი, განსაკუთრებით დამწყები, მიიჩნევს, რომ ინდექსებში ინვესტირება უკეთესია, ვიდრე ინდივიდუალური აქციების შერჩევა.

ინდექსებს შორის საუკეთესოდ Standard & Poor’s 500 ითვლება, რომელიც აერთიანებს აშშ-ის ტოპ 500 კომპანიას სხვადასხვა ინდუსტრიიდან, რაც მას ინვესტირებისთვის შედარებით დაბალი რისკის შემცველად აქცევს.

2021 წლის 5 საუკეთესო ინდექს ფონდი

სია მოიცავს S&P 500 ინდექს ფონდებს, რომელიც სხვადასხვა კომპანიებისგან შედგება. მათ შორის არის ორი Mutual Funds (ურთიერთდახმარების ფონდი იზიდავს კაპიტალს ინვესტორებისგან და ყოველდღიურად ვაჭრობს ფასიანი ქაღალდებით. ურთიერთდახმარების ფონდის ფასი იცვლება დღეში ზუსტად ერთხელ და არა რეგულარულად მთელი დღის მანძილზე) და სამი ETF (საბირჟო ვაჭრობის ფონდი):

Fidelity ZERO Large Cap Index (FNILX)

Vanguard S&P 500 ETF (VOO)

SPDR S&P 500 ETF Trust (SPY)

iShares Core S&P 500 ETF (IVV)

Schwab S&P 500 Index Fund (SWPPX)

რატომ არის საფონდო ინდექსები ასე პოპულარული?

პანდემიამ აჩვენა, რომ საფონდო ბაზარი შეიძლება მკვეთრად მერყეობდეს, განსაკუთრებით, თუ რამე მნიშვნელოვანი ხდება. შესაბამისად, რისკების დივერსიფიცირებას განსაკუთრებული დატვირთვა აქვს. S&P 500-ს ყველაზე პოპულარულ ინდექსად აქცევს შემდეგი ფაქტორები:

• მიმზიდველი შემოსავალი – ისევე, როგორც ყველა აქციას, S&P 500-საც ახასიათებს რყევები, მაგრამ ინდექსი ყოველწლიურად ინვესტიციის დაახლოებით 10%-ს აბრუნებს. ეს არ ნიშნავს, რომ ინდექსები ყოველწლიურად ასეთ სარგებელს გამოიმუშავებენ, მაგრამ ხანგრძლივი პერიოდის განმავლობაში საშუალო მოგება ამ მოცულობისაა.
• დივერსიფიკაცია – ინვესტორებს საფონდო ინდექსები სწორედ დივერსიფიკაციის გამო მოსწონთ. S&P 500-ზე დაფუძნებული ინდექსის შეძენა ასობით კომპანიის ფლობას ნიშნავს.
• დაბალი რისკი – იმის გამო, რომ დივერსიფიცირებულია, ინდექსებში ინვესტიცია უფრო დაბალრისკიანად ითვლება, ვიდრე რამდენიმე ინდივიდუალური აქციის ფლობა. თუმცა, ეს არ ნიშნავს, რომ ინვესტორი ფულს არ დაკარგავს. ინდექსი არც ისეთი უსაფრთხოა, როგორც სადეპოზიტო სერტიფიკატი (CD), მაგრამ ბევრად ნაკლებად მერყეობს, ვიდრე ცალკეული აქციები. თითოეული ტიპის აქტივი განსხვავებულად მოქმედებს ეკონომიკური ზრდის ან ვარდნის შემთხვევაში და თითოეულს მოგებისა და ზარალის განსხვავებული პოტენციალი აქვს.

რომელ საფონდო ინდექსში ჯობს ინვესტირება

პირველ რიგში უნდა შეარჩიოთ, სად, კონკრეტულად რაში და რატომ გსურთ ფულის ჩადება. ამ დროს უნდა გაითვალისწინოთ:

• მდებარეობა – გაითვალისწინეთ ინვესტირების გეოგრაფიული მდებარეობა. S&P 500 ფლობს ამერიკულ კომპანიებს, ხოლო სხვა ინდექსი შეიძლება ფოკუსირებული იყოს უფრო ვიწრო ლოკაციაზე (მაგ. საფრანგეთი) ან შედარებით დიდ ფართობზე (აზია-წყნარი ოკეანე).
• ბიზნესი – რომელ ინდუსტრიაში ან დარგებში ახორციელებს ინვესტიციას ინდექსი? ფარმაცევტულ კომპანიებში, რომლებიც აწარმოებენ ახალ წამლებს, თუ ტექნოლოგიურ კომპანიებში?
• ბაზრის შესაძლებლობა – რა შესაძლებლობას იძლევა საფონდო ინდექსი? ირჩევთ კომპანიებს იმის გამო, რომ მომგებიან პროდუქტს ამზადებენ, თუ იმიტომ, რომ კარგ დივიდენდებს იხდიან? ზოგიერთი ინვესტირებას ახდენს მაღალშემოსავლიან აქციებში, ზოგს კი სურს მაღალი ზრდის მქონე აქციების ყიდვა.

მას შემდეგ, რაც იპოვით თქვენთვის სასურველ ინდექსს, შეგიძლიათ გადახედოთ სხვა ფაქტორებს, როგორებიცაა:

• ხარჯები – შეადარეთ ერთმანეთს თითოეული ინდექს ფონდის ხარჯები. ზოგჯერ მსგავს ინდექსზე დაფუძნებულ ფონდს შეუძლია 20-ჯერ მაღალი საკომისიო ჩამოაჭრას ინვესტორს.
• გადასახადები – გარკვეული სამართლებრივი მიზეზების გამო, mutual ფონდები ნაკლებად ეფექტურია, ვიდრე ETF-ები.

მას შემდეგ, რაც გადაწყვეტთ, რომელი ინდექსი იქნება უკეთესი, მათი შეძენა უკვე შესაძლებელია საქართველოს ბანკის მობილბანკით.

ვაჭრობა/ინვესტირება დაკავშირებულია მაღალ რისკებთან და იმ შემთხვევაშიც კი, თუ რეკომენდაციების შესაბამისად არის განხორციელებული, შესაძლოა გამოიწვიოს არსებითი დანაკარგები, ისევე როგორც მოგება. თქვენს მიერ დეტალურად უნდა იქნეს გაანალიზებული, რამდენად მისაღებია თქვენთვის ვაჭრობა/ინვესტირება თქვენი ფინანსური მდგომარეობის გათვალისწინებით და შეგიძლიათ თუ არა აიღოთ თანხის დაკარგვის მაღალი რისკი. ვაჭრობის/ინვესტირების განხორციელება არანაირი ფორმით არ უზრუნველყოფს მოგებას.

წყარო: businessfeed.ge