მესტიაში ელექტროენერგია გადაუჭრელ პრობლემად რჩება, დღეს 12 საათზე მოსახლეობა მესტიის მუნიციპალიტეტის მერიის შენობის წინ საპროტესტო აქციას გამართავს. როგორც „კომერსანტს“ აქციის ერთ-ერთმა მონაწილემ დავით ნავერიანმა უთხრა, დაახლოებით ერთი კვირაა მესტიის დიდ ნაწილს ელექტროენერგია არ მიეწოდება, ხოლო იმ შემთხვევაში თუ მიწოდება ხდება, ძაბვა ძალიან დაბალია.
„როგორც კი თოვლი მოდის, ელექტროენერგიის პრობლემა ჩნდება, მოსახლეობა მივიდა იმ მდგომარეობამდე, რომ გამოვიდეს ქუჩაში და რაღაცას მივაღწიოთ, ოღონდ არა ისეთს, როგორც შარშან იყო, ეს პრობლემა ერთხელ და საბოლოოდ უნდა მოგვარდეს. 21-ე საუკუნეში ეს პრობლემა არ უნდა იდგეს. მიზეზი ელექტროენერგიის ხარჯვაა, რომელსაც კომუნისტების დროინდელი ინფრასტრუქტურა, ელექტრო სადენები და ბოძები ვეღარ უძლებს და შესაბამისად, ხან ერთ ადგილას იწვება, ხან მეორე ადგილას ფეთქდება, შემდეგ საჭიროებს ამ ზამთარში სპეციალისტის მოძიებას და შეკეთებას. იმედია, დღეს რამეს გვეტყვიან, თუმცა სოციალურ ქსელში მოსახლეობას მოუწოდეს, რომ გამორთონ ის, რაც საჭირო არ არის და რა უნდა გამორთო ადამიანმა ამ გამყინვარებაში, არ ვიცი,“ - აღნიშნა დავით ნავერიანმა.
ორი დღის წინ მესტიის მუნიციპალიტეტის მერიამ სოციალურ ქსელში განცხადება გაავრცელა, სადაც წერს, რომ ბოლო დღეების განმავლობაში ელექტროენერგიის მოხმარება კრიტიკულად არის გაზრდილი და ქვესადგური მუშაობის ბოლო ზღვარზეა.
“სს „ენერგო პრო-ჯორჯიას“ მიერ მოწოდებული ინფორმაციით, ბოლო დღეების განმავლობაში ელექტროენერგიის მოხმარება კრიტიკულად არის გაზრდილი.
ჭარბი მოხმარების გამო ქვესადგური მუშაობს ბოლო ზღვარზე და ამოწურულია ყველანაირი რესურსი, რის გამოც არსებობს საფრთხე, რომ სისტემა გაითიშოს და მოსახლეობა ელექტროენერგიის გარეშე დარჩეს.
მოგიწოდებთ გაითვალისწინოთ შექმნილი მდგომარეობა და გამოიჩინოთ მოქალაქეობრივი პასუხისმგებლობა. გამორთეთ ე.წ მაინერები და ყველა ის მოწყობილობა რომელიც არ არის საჭირო საყოფაცხოვრებო მოხმარებისთვის და მოახდინეთ ელექტროენერგიის ეკონომიური ხარჯვა!
გთხოვთ გააზიაროთ და გაავრცელოთ!
მდგომარეობა უკიდურესად მძიმეა“, - წერია განცხადებაში.
თაკო კვაჭანტირაძე
მესტია
