მრავალწლიანი უძრაობის შემდეგ შაორის განვითარება იწყება. კურორტს პირველი ინვესტორი უკვე ჰყავს, რეზორტის ტიპის სასტუმრო კომპლექსს ქვეყნის ერთ-ერთ მიმზიდველ ადგილზე მასშტაბური მულტიფუნქციური სავაჭრო ცენტრების მმართველი კომპანია IG Development  ააშენებს.

კამპანიამ 29 693 კვ. მ. მიწის ნაკვეთი ელექტრონული აუქციონის წესით ქონების ეროვნული სააგენტოსგან იყიდა.

შაორის ტბის პირველ ზოლში მიწის ნაკვეთი შპს „სითი დეველოპმენტმა“ 1 193 000 ლარად 2021 წლის 30 მარტს შეიძინა. პროექტში დაახლოებით 20 მლნ დოლარის ინვესტიცია ჩაიდება და მის განხორციელებას ორი წელი და ექვსი თვე დასჭირდება, ხოლო პროექტის განვითარებაზეც მის შვილობილი კომპანია „სითი დეველოპმენტი“ ზრუნავს.

შაორის ტბის სასტუმროს არქიტექტურულ პროექტს Simplex lab-ი განახორციელებს, გამარჯვებული კომპანიამ ესკიზი და კონცეფცია უკვე წარადგინა, მშენებლობის დაწყება კი მიმდინარე წელს იგეგმება. 

საპროექტო გუნდისთვის გარკვეული შეზღუდვები იყო დაწესებული. კერძოდ, საპროექტო შენობა 4 სართულს არ უნდა აღემატებოდეს, ხოლო ოთახების ოდენობა 120 ნომერს. სასტუმროს ვიზუალური მხარე უნდა იყოს თანამედროვე, თუმცა სასურველია ადგილობრივი არქიტექტურის ელემენტების გამოყენება და გარემოსთან მისადაგება. დოკუმენტის მიხედვით, სასურველია სასტუმროს ყველა ოთახი იყოს პანორამული ხედებით (ტბაზე ან ტყისკენ). ასევე უნდა დაიგეგმოს სტუმართა თავშეყრისათვის განკუთვნილი მცირე, მყუდრო სივრცეები შენობაში და მის გარეთ.

საკუთრებაში არსებული 3 ჰექტრამდე ტერიტორიის პროექტირების მიღმა, გასათვალისწინებელია კომპლექსამდე მისასვლელი გზის ანალიზი და საჭიროების შემთხვევაში მისი გაფართოება/რეკონსტრუქციის რეკომენდაციის გაცემა. კონცეფციის თანახმად, სასტუმრო შერეული ტიპის დამსვენებელზე უნდა იყოს მორგებული და სეზონების მიხედვით განსხვავებულ სეგმენტს მოემსახუროს.