გასულ კვირაში, ვაკის პარკის ტერიტორიაზე არსებული შადრევნებისა და კასკადის სარეაბილიტაციო სამუშაოებზე თბილისის მერიამ ტენდერი გამოაცხადა. თბილისის მთავრობა რეკრეაციული სივრცის მოწყობას მესამედ ცდილობს.
ტენდერის მიხედვით, შესყიდვის სავარაუდო ღირებულება ყველაზე მაღალი 13.5 მლნ ლარია. გამარჯვებულმა კომპანიამ კი სამუშაოები ხელშეკრულების გაფორმებიდან 2 წლის ვადაში უნდა დაასრულოს.
განმარტებით ბარათში ვკითხულობთ, რომ პროექტის მიზანია შეიქმნას განახლებულ ვაკის პარკში სრულყოფილი და თანამედროვე ატრაქციონი, რომელიც შეინარჩუნებს ისტორიული ვაკის პარკის უნიკალურ ხასიათს, ის რომ პასუხობდეს თანამედროვე ტექნოლოგიურ მოთხოვნებს. საბოლოო მიზანია ვაკის პარკის რეაბილიტაციის ფარგლებში, ერთიან ჰარმონიაში მოიყვანოს კასკადისა და შადრევნების ინფრასტრუქტურა, ამასთანავე უზრუნველყოს კომპლექსის დამოუკიდებელი წყლით მომარაგების სისტემა კუს ტბასთან ერთად.
პროექტის დაფინანსების წყარო 2021-2022-2023 წლების თბილისის ბიუჯეტია:
2021 წელი - 3 000 000 ლარი;
2022 წელი - 7 841 854 ლარი;
2023 წელი - 2 610 352 ლარი, - ნათქვამია ტენდერის პირობებში.
შეგახსენებთ, რომ მსოფლიოს სხვადასხვა ქალაქებთან შედარებით, ვაკის პარკის კასკადია, ყველაზე დიდი კასკადია და მისი სიგრძე 273.36 მეტრია. ნაგებობა, რომელიც შესაძლოა ტურისტისთვის ერთ-ერთ მიმზიდველ სანახაობად იქცეს, წლების განმავლობაში მიტოვებული და მოუვლელი იყო.