2022 წელს 14-მა კომერციულმა ბანკმა რეკორდული შემოსავალი და მოგება მიიღო, ეროვნული ბანკის მიერ გამოქვეყნებული ფინანსური ანგარიშების მიხედვით, გასულ წელს ბანკების წმინდა მოგებამ ორ მილიარდს გადააჭარბა.
რის ხარჯზე გაიზარდა მოგება და რა მოლოდინებია 2023 წელს. თემასთან დაკავშირებით რადიო „კომერსანტის“ გადაცემაში „კომერსანტის დილა“ საბანკო ასოციაციის პრეზიდენტმა, ალექსანდრე ძნელაძემ ისაუბრა.
ალექსანდრე ძნელაძის თქმით, მოგების მაღალი მაჩვენებლის დაფიქსირება ძალიან მნიშვნელოვანია, გამომდინარე იქიდან, რომ სწორედ საფინანსო სექტორი წარმოადგენს სფეროს, სადაც უცხოური ინვესტიციის მოზიდვაა შესაძლებელი და ეს მაჩვენებელი მას დამატებით ინტერესს სძენს.
„ორი ბანკის აქციები ლონდონის საფონდო ბირჟაზეა განთავსებული, საკმაოდ კარგი ფასით და მზარდი ხასიათით გამოირჩევიან. თუ 2021 წლის განმავლობაში ვსაუბრობდით დამატებითი რეზერვების ხარჯზე მოგების გენერირებაზე, წელს აღნიშნული მიმართულება გრძელდება, უფრო მეტი სესხი იღებს სტანდარტული სესხის კლასიფიკაციას და მათ ფინანსური მაჩვენებლები საკმაოდ გამოსწორდა. ტურიზმის მიმართულებებით თუ ვიზიტორების რაოდენობა მნიშვნელოვნად არ გაზრდილა, სამაგიეროდ მათი ქცევა შეიცვალა და საკმაოდ ნორმალური მდგომარეობაა. ასევე მნიშვნელოვანია ისიც, რომ საკმაოდ დიდი რაოდენობის მიგრაცია მოხდა, როგორც საქართველოში, ასევე რეგიონში და ამან გამოიწვია უცხოური ვალუტის შემოდინება და ის, რომ საკმაოდ დიდი რაოდენობის მოგებაა დაგენერირებული,“ - აღნიშნა ალექსანდრე ძნელაძემ.
რაც შეეხება 2023 წელს, ძნელაძის თქმით, წლის პირველ ნახევარში იგივე ტენდენციები გაგრძელდება და მკვეთრი ცვლილებები მოსალოდნელი არაა. მისივე თქმით, ის გარკვეული შეზღუდვები, რომლებიც დღეს მოქმედებს 2023 წლის ზაფხულამდე იმოქმედებს.
„ზაფხულამდე პერიოდში ეროვნული ბანკის მხრიდან რეგულაციების გადახედვა მოხდება, ასევე ზაფხულში ველოდებით ინფლაციის მეტნაკლებად დასტაბილურებას და შემცირების სტაბილურ ტენდენციას და ამის შემდეგ ვისაუბრებთ რეფინანსირების განაკვეთის შემცირებაზე.
დღეის მდგომარეობით რჩება მაღალი საპროცენტო განაკვეთები სესხებზე, როგორც ლარში ასევე უცხოურ ვალუტაში, უახლოეს მომავალში, უცხოურ ვალუტაში საპროცენტო განაკვეთის ზრდა კიდევ არის შესაძლებელი, ხოლო ლარში არსებულ სესხებს, იმედია, რომ წლის მეორე ნახევრიდან შემცირების ხასიათი ექნება, რადგან ეროვნული ბანკის პრეზიდენტი მონეტარული პოლიტიკის შემცირებაზე საუბრობდა,“- აღნიშნა ალექსანდრე ძნელაძემ.