ბოლო თვეების განმავლობაში სასტუმროს ფასები მნიშვნელოვნად გაიზარდა, რაც განპირობებულია ისეთი ფაქტორების ერთობლიობით, როგორიცაა საერთაშორისო ტურიზმის ნაწილობრივი აღდგენა, რუსეთ-უკრაინის ომის დაწყების შემდეგ რუსი, ბელარუსი და უკრაინელი მოგზაურების მასობრივი შემოსვლა, შიდა ვიზიტორების მიერ საქართველოს ტურისტულ ადგილებზე გაზრდილი მოთხოვნა, სასტუმროს ფუნქციონირებისთვის აუცილებელი საქონლის ფასების ზრდა და საბაზო ეფექტი 2022 წლის თებერვალსა და მარტში. - ამის შესახებ PMC კვლევითი ცენტრის ტურიზმის ყოველთვიურ მიმოხილვაშია ნათქვამი.

2022 წლის პირველი 7 თვის განმავლობაში სასტუმროს ფასების ინდექსი ყველაზე მაღალი თებერვალში იყო და მან 17,7% შეადგინა, შემდეგ მას 14,9% - ით მოჰყვებოდა მარტი და 13%-ით ივლისი.

3,4,5 ვარსკვლავიან სასტუმროებთან შედარებით სასტუმროს ფასების ინდექსი ზოგადად უფრო მაღალი საოჯახო სასტუმროებისთვის იყო.

პანდემიამდელ მაჩვენებელთან შედარებით სასტუმროს ფასების ინდექსი უარყოფითი  იყო იანვარში, ხოლო შემდეგ თებერვლიდან ივლისამდე დადებით მაჩვენებელზე ნარჩუნდებოდა.

ფასების ცვლილების მასშტაბი პანდემიამდელ მაჩვენებელთან შედარებით ყველაზე მაღალი იყო ივლისში, რამაც 20,5% შეადგინა, მას 10,3%-ით მოსდევდა ივნისი და 10,1%-ით მაისი.

გასული წლის განმავლობაში სასტუმროების საშუალო ფასები სტაბილურად იზრდებოდა  ყველა ტიპის სასტუმროსთვის, აღსანიშნავია ის ფაქტიც, რომ საშუალო ფასების ზრდა ყველაზე მაღალი 5 ვარსკვლავიანი სასტუმროებისთვის აღმოჩნდა.

საოჯახო სასტუმროებისთვის 25,4% , 4 ვარსკვლავიანი სასტუმროებისთვის 11,8% და 3 ვარსკვლავიანი სასტუმროსთვის 10,5% საშუალო თვიური ფასების  ზრდა 2022 წლის ივლისში ყველაზე  მაღალი იყო.  ხოლო რაც  შეეხება  5 ვარსკვლავიანი სასტუმროებს მათთვის  ყველაზე მაღალი 2022 წლის მაისში საშუალო თვიური ფასების ზრდა 11.2% აღმოჩნდა.

ძირითადი ინდიკატორები, რომელიც სასტუმროს ფასების ცვლილებებზე დასაკვირვებლად გამოიყენება, არის სამომხმარებლო ფასების ინდექსის ცვლილება რესტორნებისა და სასტუმროებისთვის და მწარმოებელთა ფასების ინდექსის ცვლილება განთავსების საშუალებებისა და საკვების მიწოდების მომსახურებებისთვის.

აღნიშნული ინდიკატორების დინამიკა ემთხვევა სასტუმროს ფასების ინდექსის დაკვირვებებს

სამომხმარებლო ფასების ინდექსმა რესტორნებსა და სასტუმროებისთვის მაქსიმუმს, 14.3% - ს  2022 წლის ივლისში მიაღწია. ამავდროულად, სასტუმროს ფასების ინდექსი 2022 წლის ივლისში 13%-ს შეადგენდა.

მწარმოებელთა პერსპექტივიდან, მწარმოებელთა ფასების ინდექსი დროებითი განთავსების საშუალებებით მომსახურებაზე გასული წლის განმავლობაში ცვალებადობით გამოირჩეოდა. თუმცა, 2022 წლის თებერვლიდან მწარმოებელთა ფასების ინდექსი მნიშვნელოვნად იზრდებოდა და მაქსიმუმს 2022 წლის ივნისში მიაღწია.

მეორე მხრივ, მწარმოებელთა ფასების ინდექსი  საკვების მიწოდებით მომსახურებისთვის შედარებით სტაბილური იყო. 2021 წლის ბოლოს  სამომხმარებლო ფასების ინდექსის მაჩვენებელი მკვეთრად დაეცა, ხოლო 2022 წლის განმავლობაში შედარებით სტაბილურად იზრდება.

საქართველოში სასტუმროების ფასების ინდექსი 2022 წლის ივლისში, 2022 წლის ივნისთან შედარებით, 13.3%- ით გაიზარდა, მათ შორის 3, 4 და 5 ვარსკვლავიანი სასტუმროების ფასების ინდექსი 12.7%-ით, ხოლო საოჯახო ტიპის სასტუმროების ფასები 15.9%-ით გაიზარდა.

 თვიური ინდექსი ყველაზე მაღალი სამცხე-ჯავახეთსა 30.1% - ით  და აჭარაში 22% აღმოჩნდა, ყველაზე ნაკლები კი კახეთში 1.6% შეადგინა.

2022 წლის ივლისში, 2021 წლის ივლისთან შედარებით, სასტუმროების ფასების ინდექსი 13%-ით გაიზარდა, მათ შორის 3, 4 და 5 ვარსკვლავიანი სასტუმროების ფასების ინდექსი 12.2%-ით, ხოლო საოჯახო ტიპის სასტუმროების ფასები 20.2%-ით გაიზარდა.

წლიური ინდექსი ყველაზე მაღალი იყო რაჭაში 24.2% და სამცხე-ჯავახეთში 20.5%, ყველაზე ნაკლები კი შიდა ქართლში  1.6%.

2022 წლის ივლისში, საქართველოში 3-ვარსკვლავიანი სასტუმროების საშუალო ფასმა  173 ლარი შეადგინა, ხოლო 4-ვარსკვლავიანი სასტუმროების საშუალო ფასმა - 276 ლარი. საოჯახო ტიპის სასტუმროების8 საშუალო ფასმა ივლისში 118 ლარი შეადგინა.

5-ვარსკვლავიან სასტუმროთა საშუალო ფასმა ივლისში 563 ლარი შეადგინა. გურიაში ამ ტიპის სასტუმროებში, სტანდარტული 2-ადგილიანი ნომრის საშუალო ფასმა 1001 ლარი შეადგინა, თბილისში - 619, აჭარაში - 612, ხოლო კახეთში - 522 ლარი.