თითქმის ორი წლის განმავლობაში მიმდინარე კორონავირუსის პანდემიის ფონზე, ყველასათვის ცნობილი გახდა, რომ არ არსებობს ვაქცინა, რომელიც 100%-ით იცავს. ვიცით, რომ შესაძლებელია დაინფიცირდეს როგორც ვაქცინირებული, ასევე არავაქცინირებული ადამიანი. „თუ მაინც შეიძლება დამემართოს, რისთვის უნდა ავიცრა?“ – ეს ანტივაქსერთა ერთ-ერთი მთავარი არგუმენტია, რომლის საფუძველზეც უარს აცხადებენ ვაქცინაციაზე და ყურადღებას არ აქცევენ სამ მნიშვნელოვან ფაქტორს:
- ვაქცინაცია მნიშვნელოვნად ამცირებს ინფიცირების რისკს
- ვაქცინირებული ადამიანები არიან ნაკლებად გადამდები
- ვაქცინაცია მაღალი პროცენტით იცავს ვირუსის რთული ფორმებისა და, რაც მთავარია, გარდაცვალებისგან
12 დეკემბრის მონაცემებით, მსოფლიოში COVID-19-ით ინფიცირების 270 403 630 შემთხვევაა დაფიქსირებული, რომელთაგან 5 321 578 ფატალურად დამთავრდა. საქართველოში ამ დრომდე 889 286 ინფიცირების შემთხვევა დასტურდება, გარდაცვლილთა რაოდენობა კი 12 731-ს უდრის. ყოველ 1 მილიონ მოსახლეზე გაანგარიშებით, გარდაცვალების რაოდენობით საქართველო მსოფლიოში მე-8 ადგილს იკავებს, რაც ძალიან ცუდი მაჩვენებელია. საქართველოზე უარესი ვითარებაა პერუში, ბულგარეთში, ბოსნია და ჰერცეგოვინაში, უნგრეთში, მონტენეგროში, ჩრდილოეთ მაკედონიასა და ჩეხეთში. ყოველ 100 000 მოსახლეზე გაანგარიშებით კი, ბოლო ერთი კვირის მონაცემებით, საქართველო მესამე ადგილს იკავებს, უნგრეთისა და ლიხტენშტაინის შემდეგ.
მიმდინარე წლის მარტში დაავადებათა კონტროლის ეროვნული ცენტრის ხელმძღვანელი ამირან გამყრელიძე იმედს გამოთქვამდა, რომ წლის ბოლომდე მოზრდილი მოსახლეობის 65% აიცრებოდა, თუმცა, ქვეყანა დასახული მიზნისგან ძალიან შორს არის. ამ დროისათვის, საქართველოში სრულად ვაქცინირებულია მოზრდილი მოსახლეობის 36.6%.
New York Times-ის მონაცემებით, საქართველოში დღეში საშუალოდ 55.3 ადამიანი იღუპება, რაც ყოველ 100 000 მოსახლეზე 1.49 ადამიანს უდრის. შედარებისთვის, ესპანეთში, სადაც მოსახლეობის 80%-ია ვაქცინირებული, გარდაცვალების დღიური მაჩვენებელი 31.7-ია, ყოველ 100 000 მოსახლეზე კი – 0.007-ს. მეტი სიცხადისთვის, უნდა გავითვალისწინოთ, რომ ესპანეთის მოსახლეობა 47.35 მილიონია, ხოლო საქართველოსი კი – 3.7 მილიონი.
ამავე წყაროზე დაყრდნობით, კანადაში, სადაც მოსახლეობის 78%-ია ვაქცინირებული, დღიური სიკვდილიანობის მაჩვენებელი 20.4-ია, ხოლო ყოველ 100 000 მოსახლეზე – 0.05. გასათვალისწინებელია, რომ ქვეყნის მოსახლეობა 38 მილიონია.
რაც შეეხება აზიის ქვეყნების სტატისტიკას, მაგალითისთვის, მოსახლეობის 78%-ის ვაქცინაციის ფონზე, იაპონიაში გარდაცვალების დღიური მაჩვენებელი 1.3-ია, ხოლო ყოველ 100 000 მოსახლეზე – 0.01-ზე ნაკლები. იაპონიის ამჟამინდელი მოსახლეობა 125.8 მილიონია.
საინტერესოა, როგორი მდგომარეობა იქნებოდა ახლა საქართველოში, თუ ქვეყანა დასახულ მიზანს მიაღწევდა და მოზრდილი მოსახლეობის 65%-ს წლის ბოლომდე აცრიდა. ამის განხილვა შესაძლებელია აღმოსავლეთ ევროპის ორი ქვეყნის – ლიეტუვასა და ლატვიის მაგალითებზე, სადაც ვაქცინაციის მაჩვენებელი 65 და 64%-ია. ლიეტუვაში, სადაც 2.795 მილიონი ადამიანი ცხოვრობს, ყოველდღიური გარდაცვალების მაჩვენებელი 18.1-ია, ხოლო ყოველ 100 000 მოსახლეზე – 0.65. მსგავსი სტატისტიკაა ლატვიაშიც, სადაც 1.902 მილიონი ადამიანი ცხოვრობს. ყოველდღიური გარდაცვალების მაჩვენებელი 15.4-ია, ხოლო ყოველ 100 00 მოსახლეზე 0.81-ს უტოლდება.
წყარო: businessfeed.ge