რუსეთ-უკრაინის ომმა სალონური პროდუქციის თვითღირებლება მნიშვნელოვნად გაზარდა, მაგრამ მიუხედავად ამისა, ესთეტიკის სფერო ფასებს სოციალური ფონიდან გამომდინარე ვერ ზრდის - ამის შესახებ სალონების ფედერაციის ხელმძღვანელმა თამარ შარაძენიძემ განაცხადა.
„ჩვენი ბიზნესის ახლანდელ პრობლემა, გაძვირებული ფასებია. ეს არის ახლა მთავარი გამოწვევა. სხვადასხვა ბრენდების შემთხვევაში საერთოდ სხვადასხვაა გაძვირების მასშტაბი. ზოგიერთი ბრენდის დისტრიბუცია საერთოდ მიბმული იყო უკრაინაზე, ზოგი რუსეთზე და აქედან შემოტანა შეიზღუდა და გაძვირდა ბაზარი. სხვა ქვეყნებიდან ლოგისტიკის ფასი კი, მნიშვნელოვნად გაიზარდა. ამის მიუხედავად, მომსახურების გაძვირება გვიჭირს სოციალური ფონიდან გამომდინარე. ჭამა და კომუნალური თუ სალონური მომსახურება - სამწუხაროდ ეს არჩევანი დგას და ხალხს არ არის გასაკვირი, რომ პირველი არჩევანის გაკეთება უწევს. ამ მხრივ ბიზნეს აქვს პრობლემები, ჩვენს დასაქმებულებსაც გაუძვირდათ ცხოვრება, მაგრამ მათთვის ხელფასის პროპორციული ზრდა ვერ ხდება, რადგან მომსახურების ფასს ვერ ვზრდით
პანდემიამდელ ნიშნულს სექტორი დაახლოებით 80%-ით მიუახლოვდა და ეს ახლა იმედის მომცემია“, - განაცხადა სალონების ფედერაციის ხელმძღვანელმა.
შარაშენიძე ამბობს, რომ სალონების კიდევ ერთი გამოწვევა დერეგულირებული ბინაზე მომსახურებაა.
„ჩვენ ვგეგმავთ მუშაობა გავააქტიუროთ შესაბამის ორგანოებთან, რომ რაღაც დონეზე დარეგულირდეს ბინებზე მომსახურება. მოგეხსენებათ, ადამიანები, რომლებიც პანდემიის დროს დაკეტილი სალონების გამო ბინაზე ემსახურებოდნენ კლიენტებს, აღარ დაბრუნდნენ სამუშაო ადგილებზე. მოგვმართა ძალიან ბევრმა ნეილ (მანიკურის და პედიკურის) სალონმა, რომ მათ მუშაობას აზრი აღარ აქვს, რადგან მათ შეეხოთ განსაკუთრებით, მაგრამ უნდა გითხრათ, რომ ესთეტიკის მიმართულებასაც შეეხო ეს. ბინებზე ხდება ინექციების გაკეთება ძალიან ხშირად, რაც ნამდვილად დაუშვებელია, ჰიგიენური კუთხით. უნდა ხდებოდეს სტერილიზაციის კონტროლი, რაც ბინების დონეზე შეუძლებელია. ახლა, ჩვენ ვმუშაობთ სამინისტროებთან რეგულაციების პაკეტზე და ამაზე ძალიან დიდი ამბავია. ვინ უნდა აკეთოს ინექცია და ვის რა დონეზე შეუძლია სერვისი მიწოდება, რთულად განსასაზღვრი და დასაგეგმია“, - ამბობს შარაშენიძე.
წყარო: ,,ბიზნესპრესნიუსი“