ჯო ბაიდენის ადმინისტრაციამ გუშინ გამოცხადებული ახალი სანქციების სიას რუსი ვიოლონჩელისტი და დირიჟორი, სერგეი როლდუგინი დაამტა, რომელიც პუტინთან კავშირების გამო ევროკავშირის სანქციებს უკვე ექვემდებარებოდა. ინფორმაციას Reuters ავრცელებს.
ხაზინის დეპარტამენტის განცხადებით, როლდუგინი „სისტემის ნაწილია, რომელიც პრეზიდენტ პუტინის ოფშორულ სიმდიდრეს მართავს." ხაზინის მიერ გამოცემული ბრძანებით, აშშ-ში სერგეი როლდუგინის აქტივები გაიყინა, ხოლო ამერიკელებს ამ აქტივებთან კავშირი აეკრძალათ.
2016 წელს პუტინმა როლდუგინი მას შემდეგ დაიცვა, რაც მისი სახელი გამოჟონილ „პანამის დოკუმენტებში" ამოტივტივდა. პუტინი მაშინ უარყოფდა ოფშორული კომპანიების კორუფციულ საქმიანობაში მისი მეგობრის რაიმე სახით მონაწილეობას.
სახელმწიფო დეპარტამენტმა სანქციები, ასევე, ხუთ რუს ოლიგარქსა და ქვეყნის ელიტის წარმომადგენლებს დაუწესა. მათ შორის არის რუსეთის ერთ-ერთი ყველაზე მდიდარი ადამიანი, ალექსეი მორდაშოვი. შავ სიაში შევიდა მორდაშოვი, მისი ოჯახის წევრები და მისი კომპანიები, მათ შორის ფოლადის უმსხვილესი მწარმოებელი, Severstal და ოქროს მომპოვებელი საწარმო, Nord Gold.
სანქციები დაუწესდა რუსეთის საგარეო საქმეთა სამინისტროს პრესსპიკერ მარია ზახაროვასაც.
თეთრი სახლის საინფორმაციო ბარათში ნათქვამია, რომ ვაჭრობის დეპარტამენტმა სანქცირებული ორგანიზაციების სიას რუსეთისა და ბელარუსის 71 იურიდიული პირი დაამატა, რომ რუს სამხედროებს ტექნოლოგიებზე ხელმისაწვდომობა შეეზღუდოთ. სიაში მოხვედრილი კომპანიები ფართოდ შეიზღუდებიან რუსეთისთვის ამერიკული და იმ უცხოური საქონლის, ტექნოლოგიისა და პროგრამული უზრუნველყოფის მიწოდებაში, რომლებიც ამერიკული აღჭურვილობით არის დამზადებული.
„აშშ უკრაინელი ხალხის მხარდაჭერას გააგრძელებს და პრეზიდენტ პუტინისა და რუსეთის აგრესიაში მონაწილე პირების პასუხისგებას ხელს შეუწობს,“ - აცხადებს სახელმწიფო მდივანი, ენტონი ბლინკენი.