Rolls-Royce-ს სჯერა, რომ მისი თვითმფრინავი, Spirit of Innovation შესაძლოა, მსოფლიოში ყველაზე სწრაფი ელექტროთვითმფრინავი იყოს. კომპანიის განცხადებას BBC ავრცელებს.

ფირმა, რომლის საჰაერო კოსმოსური შტაბი დერბიში მდებარეობს, აცხადებს, რომ ექსპერიმენტულ პოლიგონზე, სატესტო გაშვების დროს თვითმფრინავმა მაქსიმალურ სიჩქარეს, 387,4 მილი/სთ-ს (623 კმ/სთ-ს) მიაღწია და სამ სხვადასხვა მანძილზე ახალი მსოფლიო რეკორდები დაამყარა. მონაცემები გადასამოწმებლად საჰაერო სპორტის მსოფლიო ფედერაციას (World Air Sports Federation) გადაეგზავნა.

საცდელი ფრენები უილტშირის ამსბერიში განხორციელდა, ხოლო მაქსიმალურ სიჩქარეს გამომცდელმა პილოტმა და ფრენის ოპერაციების დირექტორმა, ფილ ო'დელმა მიაღწია.

"ეს არის ჩემი კარიერის მთავარი წერტილი და წარმოუდგენელი მიღწევა მთელი გუნდისთვის," - განაცხადა ფილ ო'დელმა.

Rolls-Royce-ის მონაცემებით, Spirit of Innovation 132 მილი/სთ-ით (213,04 კმ/სთ-ით) უფრო სწრაფი იყო, ვიდრე კომპანია Siemens eAircraft-ის თვითმფრინავის, Extra 330 LE Aerobatic-ის მიერ 2017 წელს დამყარებული რეკორდი.

თვითმფრინავმა, ასევე, სიმაღლეზე აფრენის ყველაზე სწრაფი დრო, 9842,52 ფუტზე (3000 მ-ზე) არსებულ 202 წამთან შედარებით, 60 წამი დააფიქსირა. თვითმფრინავი 400 კვტ ელექტროძრავას იყენებს, რაც 535 ცხენის ძალის მქონე სუპერმანქანის ძრავის ექვივალენტია.

Roll-Royce, ასევე, აცხადებს, რომ მას ყველაზე მძლავრი აკუმულატორული ბატარეა აქვს, რაც აერონავტიკაში ოდესმე აუწყვიათ. მას 7500 ტელეფონის დასატენად საკმარისი სიმძლავრე აქვს.

Rolls-Royce იმედოვნებს, რომ ავიაციის საერთაშორისო ფედერაცია (Fédération Aéronautique Internationale-FAI) შედეგებს ახალ მსოფლიო რეკორდებად უახლოეს მომავალში აღიარებს.

bpn.ge