ძვირადღირებული მანქანების მწარმოებელმა Rolls-Royce-მა ბრიტანეთის მთავრობისგან, მთვარეზე მომავალი ასტრონავტების ბაზისთვის, ბირთვული რეაქტორის აშენების თანხმობა მიიღო. ამის შესახებ დიდი ბრიტანეთის კოსმოსური სააგენტოს პრესრელიზშია ნათქვამი.

Rolls-Royce-ის მეცნიერები და ინჟინრები ე.წ. მიკრორეაქტორის აგების შესაძლებლობას იკვლევენ, რომელსაც მთვარეზე გაუშვებენ. ექსპერტები ვარაუდობენ, რომ ასტრონავტები მას დამოუკიდებლად დაამონტაჟებენ და გაუშვებენ. ამის წყალობით ისინი შეძლებენ ელექტროენერგია მიაწოდონ ბაზას, რომელიც მთვარეზე აშენდება. მიკრორეაქტორის არსებობა მომავალ ასტრონავტებს საშუალებას მისცემს, რომ იოლად დაუკავშირდნენ ერთმანეთს და შეინარჩუნონ კავშირი როვერებთან და სხვა აღჭურვილობასთან.

ეს ტექნოლოგია ასევე გამოყენებული იქნება კომერციულ და თავდაცვის ინდუსტრიაში და დააკმაყოფილებს სუფთა და უსაფრთხო ენერგიის საჭიროებას. მისი დახმარებით ინჟინრები ელიან ელექტროენერგიის გამომუშავების პროცესში ნახშირბადის გამოყოფის რაოდენობის შემცირებას.

ავტომწარმოებელი მიიღებს დამატებით დაფინანსებას კოსმოსური სააგენტოსგან, დაახლოებით 3,5 მილიონი აშშ დოლარის ოდენობით. გაერთიანებული სამეფოს მეცნიერების, ინოვაციებისა და ტექნოლოგიების დეპარტამენტის ვარაუდით, ეს პროექტი მომავალში შეიძლება გახდეს ერთგვარი პასუხი NASA-ს არტემისის მომავალ მისიებზე. აქედან მესამე მიზნად ისახავს ადამიანის მთვარეზე დაბრუნებას.

საინტერესოა, რომ ერთ კვირაში Rolls-Royce მეორედ ჩაერთო ბირთვული რეაქტორის მშენებლობაში. მანამდე ავტომწარმოებელი ფიგურირებდა სამმხრივ შეთანხმებაში დიდ ბრიტანეთს, აშშ-სა და ავსტრალიას შორის. მედიის ცნობით, ის შეიმუშავებს რეაქტორებს წყალქვეშა ნავებისთვის, რომლებსაც ახლა საერთაშორისო კონსორციუმი აწარმოებს.