პუტინის გარემოცვის წევრი, ოლიგარქი რომან აბრამოვიჩი ლონდონში ქონებას ყიდის. ბიზნესმენმა თქვა ისიც, რომ ის საფეხბურთო კლუბ „ჩელსის“ მყიდველსაც იპოვის.

ბრიტანელი დეპუტატის კრის ბრაიანტის თქმით, რომან აბრამოვიჩი უძრავ ქონებას ყიდის, ხოლო შვეიცარიელი მილიარდერი ჰანსორგ ვისი აცხადებს, რომ მას საფეხბურთო კლუბ ჩელსის ყიდვა შესთავაზეს.

„რომან აბრამოვიჩის სანქციების ეშინია, ამიტომ ის საკუთარი სახლის და ბინის გაყიდვას გეგმავს“, - თქვა ბრიტანეთის ოპოზიციური ლეიბორისტული პარტიის დეპუტატმა კრის ბრაიანტმა.

შვეიცარიელი ბიზნესმენი ჰანსორგ ვისის განცხადებით, სამ სხვა პოტენციურ მყიდველთან ერთად ჩელსის ყიდვის შეთავაზება სამშაბათს მიიღო. მილიარდერი შვეიცარიულ გამოცემა Blick-თან ამბობს, რომ აბრამოვიჩი ძალიან დიდ თანხას ითხოვს, ამიტომ რამდენიმე დღე დაელოდება.

„ის პანიკაშია, როგორც სხვა ოლიგარქები“, - ამბობს ვისი ინტერვიუში.

ბიზნესმენი განმარტავს,  რომ მას საფეხბურთო კლუბის ყიდვა წარმოუდგენია, თუმცა ჯგუფის შემადგენლობაში:

„ასეთ რაღაცას მარტო ნამდვილად არ ვაკეთებ. თუ ჩელსის ვიყიდი, ეს იქნება ექვსი ან შვიდი ინვესტორისგან შემდგარი კონსორციუმი“, - თქვა ბიზნესმენმა.

მიუხედავად იმისა, რომ დიდმა ბრიტანეთმა რუსეთის უკრაინაში შეჭრის საპასუხოდ სანქციები 100-ზე მეტ რუს ფიზიკურ და იურიდიულ პირს და დაუწესა, აბრამოვიჩი ამ სიაში ჯერ კიდევ არ მოხვედრილა. მაგრამ, მილიარდერი რუსი პოლიტიკოსების მზარდი ზეწოლის ქვეშ იმყოფება.

შაბათს აბრამოვიჩმა კლუბის მართვა თავის საქველმოქმედო ფონდის გადააბარა. ბრაიანტი აცხადებს, რომ აბრამოვიჩს არ აქვს უფლება ინგლისურ საფეხბურთო კლუბს ფლობდეს.

აბრამოვიჩის სპიკერს მიმდინარე მოვლენებზე კომენტარის დაუყოვნებლივ არ გაუკეთებია. ორშაბათს მან თქვა, რომ დუმის ყოფილი დეპუტატი ცდილობს უკრაინაში ომის დასრულების პროცესს დაეხმაროს.

უძრავი ქონების ბრიტანელმა ბროკერებმა განაცხადეს, რომ ქონების სწრაფად გაყიდვა შეიძლება რთული იყოს.

აბრამოვიჩი, რომლის ქონებაც Bloomberg Billionaires Index-ზე დაახლოებით 13,5 მილიარდ დოლარად არის შეფასებული, ფლობს რამდენიმე სახლს ლონდონში. ქონება, რომელზეც ბრიტანელი დეპუტატი კრის ბრაიანტი საუბრობს, არის სასახლე კენგსინტონის მილიარდერთა დასახლებაში. ხოლო, აღნიშნული ბინა არის პენტჰაუზი ჩელსის სანაპიროზე.

წყარო: Bloomberg