მეტალურგიული და სამთო კომპანია Evraz-ის სტრუქტურები 10 წელზე მეტია რაც პირდაპირ თუ ირიბად ამარაგებენ რუსეთის შეიარაღებულ ძალებს.

ამის შესახებ გამომძიებელ ჟურნალისტთა საერთაშორისო ჯგუფმა, კორუფციისა და ორგანიზებული დანაშაულის კვლევის ცენტრმა (OCCRP), გაავრცელა ინფორმაცია.

გამომძიებელმა ჟურნალისტებმა შეისწავლეს რუსეთის მთავრობის შესყიდვების ვებსაიტი და დაადგინეს, რომ Evraz-ი თანამშრომლობდა „როსგვარდიასთან“ და ასევე აწვდიდა პროდუქტებს ფაბრიკებს, რომლებიც აწარმოებენ ასაფეთქებელ ნივთიერებებს და ტანკებს.

Evraz-ის NTMK-მა - ნოვოკუზნეცკის ქარხანამ, სახელმწიფო საწარმოდან 2015-2018 წლებში მიიღო 2,8 მილიონ დოლარზე მეტი ღირებულობის ტოლუოლი საბრძოლო მასალისა და სამრეწველო ფეთქებადი ნივთიერებების წარმოებისთვის (OCCRP არ აკონკრეტებს ამ ქარხნის სახელს).

ნიჟნი ტაგილში დაფუძნებულმა Evraz NTMK-მა 2018 წელს 1,4 მილიონი დოლარის ფოლადი მიჰყიდა Uralvagonzavod-ს, რომელიც აწარმოებს ტანკებსა და სამოქალაქო მანქანებს.

გარდა ამისა, 2016 და 2017 წლებში Evraz-ის შვილობილი კომპანიის ქარხანას აწვდიდა ვანადიუმის წიდას, რომელიც გამოიყენება იარაღის წარმოებაში ფოლადის გასამაგრებლად.

Evraz-ი, მისი ვებსაიტის მიხედვით, მსოფლიოში ფოლადის და სამთო ერთ-ერთი უმსხვილესი კომპანიაა რუსეთში, აშშ-ში, კანადაში, ჩეხეთში, იტალიასა და ყაზახეთში აქტივებით. კომპანია რეგისტრირებულია დიდ ბრიტანეთში. 2022 წლის მარტში ბრიტანეთის ხელისუფლებამ სანქციები დააწესა Evraz-ის 29%-იანი წილის მფლობელის, ბიზნესმენ რომან აბრამოვიჩის წინააღმდეგ. მაისში ლონდონმა სანქციების სიაში თავად Evraz-ი შეიყვანა.

კომპანია, ბრიტანეთის ხელისუფლების თანახმად, შეიძლება იყოს ჩართული ქმედებაში, რამაც ხელი შეუწყო უკრაინის დესტაბილიზაციას. კერძოდ, მას შეეძლო მიეწოდებინა ფოლადი რუსული ტანკების წარმოებისთვის.

Evraz-მა განაცხადა, რომ იგი თანამშრომლობს მხოლოდ რუსეთის მრეწველობის სამოქალაქო სექტორის საწარმოებთან.

რომან აბრამოვიჩი არაფორმალურად მონაწილეობდა რუსეთისა და უკრაინის სამშვიდობო მოლაპარაკებებში ომის პირველ თვეში. მოგვიანებით მოლაპარაკების პროცესი გაიყინა. აბრამოვიჩის წინააღმდეგ სანქციები ევროკავშირმაც დააწესა. ბიზნესმენმა სასამართლოს მეშვეობით სანქციების სიიდან თავისი ამოღება და ზარალის ანაზღაურება მოითხოვა, გადარიცხა რა საქველმოქმედო ფონდში მილიონი დოლარი.

https://www.radiotavisupleba.ge/