დიაგონალური კუმულაციის შეთანხმების ფარგლებში ანუ მას შემდეგ რაც ევროკავშირმა საქართველოს საკუთარ ტერიტორიაზე თურქული ნედლეულით დამზადებული პროდუქციის შეტანის ნება დართო, ჩვენი ქვეყნიდან ექსპორტზე თითქმის 3 მლნ დოლარის ღირებულების საქონელი უკვე გავიდა. რა სავაჭრო და საინვესტიციო შესაძლებლობებს აჩენს დიაგონალური კუმულაცია - ამ საკითხს სექტემბრის დასაწყისში თბილისში ფორუმიც მიეძღვნა, სადაც წარმოდგენილი იყო კვლევაც იმის შესახებ, თუ რომელია ის პერსპექტიული სექტორები, რომლებმაც ტექსტილის მსგავსად წარმატებით შეიძლება გამოიყენონ ეს შესაძლებლობა. კვლევის შედეგებით დადგინდა, რომ სამშენებლო პროდუქცია და ალუმინის ნაწარმი შესაძლოა აღმოჩნდეს ტექსტილის მსგავსად პერსპექტიული ნაწარმი.

„ექსპორტის განვითარების ასოციაციის“ დირექტორი გიორგი გუდაბანიძე „კომერსანტთან“ ამბობს, რომ ტექსტილის გარდა ამ შეთანხმებით სარგებლობის პოტენციალი სხვა სექტორებსაც გააჩნიათ. თუმცა აღსანიშნავია, რომ ეს შეთანხმება ფარავს მხოლოდ ინდუსტრიულ პროდუქციას, ამიტომაც ქართველმა მეწარმეებმა ყურადღება უნდა გაამახვილონ მხოლოდ იმ პროდუქციაზე, რომელიც თურქეთის, საქართველოს და ევროკავშირის ბაზრისთვის გახსნილია.

„დიაგონალური კუმულაცია ძალიან მნიშვნელოვანია. ამ შეთანხმების პირველი ბენეფიციარი ტექსტილის სექტორი იყო. მაგალითად ზაფების, ქსოვილების და სხვა ტექსტილის შემოტანა ევროპიდან თუ ხდებოდა პრობლემა არ იყო, მაგრამ თუ სხვა ქყეყნებიდან შემოიტანდნენ თავისუფალი ვაჭრობის ხელშეკრულებით ვერ ისარგებლებდნენ და შესაბამისად დაიბეგრებოდა. ნედლეული რომ შემოიტანოთ სხვა ნებისმიერი ბაზრიდან და საქართველოში გადაამუშაოთ, იგი ვერ დააკმაყოფილებს წარმოშობის კრიტერიუმებს და ვერ მოხვდება თავისუფალი ვაჭრობის რეჟიმში, ამიტომ ხდებოდა ისე რომ მაგალითად თურქეთიდან შემოტანილი ნედლეული საქართველოში გადამუშავების შემდეგ ისევ თურქეთში გადიოდა და შემდეგ ევროპის ბაზრებზე.

ახლა უკვე კარგი კონკურენციის გაწევა შეგვიძლია ევროკავშირის ბაზარზე. ტექსტილის გარდა საუბარია, რომ შემდეგი შესაძლოა იყოს მაგალითად სამშენებლო და შესაფუთი მასალების სექტორები. დაინტერესება ბიზნესის მხრიდან არის და ვიმედოვნებთ რომ ძალიან მალე რეალური ნაბიჯები გადაიდგმება“, — აღნიშნავს გიორგი გუდაბანიძე.

2021 წლის 29 აპრილიდან, საქართველოს, ევროკავშირსა და თურქეთს შორის ამოქმედებული დიაგონალური კუმულაციის თანახმად, თურქული ნედლეულის გამოყენებით საქართველოში დამზადებული სამრეწველო პროდუქტების(გარდა სასოფლო-სამეურნეო) ექსპორტი ევროკავშირის ბაზარზე, თავისუფალი ვაჭრობის რეჟიმით არის შესაძლებელი.