აღდგომის დღესასწაული სააღდგომო პასკის გარეშე წარმოუდგენელია. სადღესასწაულო დღეების მოახლოებასთან ერთად ერთ-ერთი მთავარი საზრუნავი გემრიელი პასკის შერჩევა ხდება. იმის გამო რომ პასკის სახლის პირობებში გამოცხობა დიდ ძალისხმევას მოითხოვს, ადამიანებს ურჩევნიათ ის უკვე მზა სახით შეიძინონ. ამ დროს განსაკუთრებული დატვირთვით მუშაობა უწევთ საკონდიტრო საწარმოებსაც.
„კომერსანტი“ დაინტერესდა, რა სახის პასკებზე უფრო მეტი მოთხოვნა და როგორია მათი ფასი.
როგორც კომპანია „ჩიზქეიქერის“ დამფუძნებელი ვეკო დოდაშვილი „კომერსანტთან“ საუბარში აცხადებს, ყველაზე მეტად მოთხოვნადი კვლავ კლასიკური პასკები რჩება, შაქრის პუდრით და ქიშმიშით.
„ზოგადად ყველაზე მეტად მოთხოვნადია კლასიკური პასკები, შაქრის ფხვნილით და ქიშმიშით, მძიმე და ნოტიო — ეს არის ყველაზე მოთხოვნადი, თუმცა ბოლო წლებმა გვაჩვენა, რომ სხვადასხვა დეკორებიც მოსწონს მომხმარებელს, უქიშმიშო და ცუკატებიანი პასკებიც არის მოთხოვნაში. ასევე წამოვიდა ხაჭოს პასკები, თუმცა გამომდინარე იქიდან, რომ ჩვენ კორპორატიული დაკვეთებს ვიღებთ დიდი რაოდენობით და ჩვენი შეფ-კონდიტერის პასკები ცნობილია, უფრო ორიენტირებული ვართ ტრადიციულ პასკებზე და არ ვამზადებთ ხაჭოს პასკებს,“- აცხადებს ვეკო დოდაშვილი
კომპანია „ჩიზქეიქერში“ ამბობენ, რომ კორპორატიული მომხმარებლისთვის ძალიან მოთხოვნადია მცირე ზომის დეკორატიული პასკები, რაც ბოლო დროს ერთგვარ ტენდენციად იქცა.
„წინა წელთან შედარებით კორპორატიულ შეკვეთებზე მოთხოვნა გაზრდილია, ყოველწლიურად სტაბილურად გყავს საცალო მომხმარებლები და ახლა განსაკუთრებით წამოვიდა და ძალიან გაიზარდა კორპორატიული მოხმარებლებიც,“- აცხადებს „ჩიზქეიქერის“ დამფუძნებელი.
ვეკო დოდაშვილის თქმით, კომპანიამ ფასები შეინარჩუნა, პასკების წონის მცირედი კლების ხარჯზე.
„ჩვენი კომპანია ყოველთვის ცდილობს, რომ ფასების ზრდა მტკივნეული არ იყოს. რადგან არ გვაქვს კაფე და საოპერაციო ხარჯებში დიდი დანახარჯი, შევძელით ისე რომ რა ფასებიც გვქონდა შარშან ის შეგვენარჩუნებინა, სულ რაღაც 50 გრამი ჩამოვაკელით და ამით დავაბალანსეთ,“ - აცხადებს ვეკო დოდაშვილი.
„ჩიზქეიქერმა“ წინასწარი შეკვეთების მიღება 15 მარტიდან დაიწყო. მიწოდების პერიოდი კი 20 მარტიდან 15 აპრილის ჩათვლითაა.
„ჩიზქეიქერის“ პასკების ფასი წონისა და შემადგენლობის მიხედვით განსხვავდება
ტრადიციული პასკა ქიშმიშით - 850 გრ. 33 ლარი / 250 გრ. 11 ლარი
ტრადიციული პასკა ქიშმიშით, თეთრი შოკოლადით და ნუშის ფანტელებით - 850 გრ. 35 ლარი / 250 გრ. 13 ლარი
ტრადიციული პასკა ქიშმიშით და მარშმელოუს და ვარდის დეკორით - 850 გრ. 35 ლარი / 250 გრ. 13 ლარი
ტრადიციული პასკა ფორთოხლის ცუკატებით და შავი შოკოლადით - 850 გრ. 35 ლარი / 250 გრ. 13 ლარი
კომპანია განსაკუთრებულ შეთავაზებასაც უკეთებს მომხმარებელს და 3 დიდი პასკის შეკვეთას 90 ლარად სთავაზობს.