ერთი თვის წინ რუსეთმა უკრაინაში ფართომასშტაბიანი ომი დაიწყო, რაც მალევე აისახა როგორც რუსულ რუბლსა და რუსული კომპანიების აქციებზე, ასევე ქართულ ლარზე. პირველივე დღეს ლარი დოლარის მიმართ 11 თეთრით გაუფასურდა. როგორც ექსპერტების უმრავლესობა ამბობს, ლარის კურსი ყველაზე უფრო გაუფასურებულია რეგიონის სხვა ქვეყნების ვალუტებთან შედარებით, რისი მთავარი მიზეზიც რუსეთის მოქალაქეების მხრიდან საქართველოში რუსული რუბლის გადახურდავება და დოლარის შესყიდვაა.

მიიღე ინფორმაცია უფრო სწრაფად ჩვენს Telegram-ზე.

„კომერსანტმა“ გადაწყვიტა გაერკვია, რა ვითარებაა ქართულ კომერციულ ბანკებში რუსული რუბლის ყიდვა-გაყიდვასთან დაკავშირებით, განსაკუთრებით მას შემდეგ, რაც ბანკების უმრავლესობამ არაერთი ნაბიჯი გადადგა რუსეთის მოქალაქეებისთვის დისკომფორტის შესაქმნელად, რაც მათთვის ანგარიშების არ გახსნასა და მომსახურების არ გაწევას გულისხმობდა.

როგორც „კომერსანტს“ კომერციული ბანკების უმრავლესობაში უთხრეს, რუბლის ყიდვა-გაყიდვის ოპერაციები ამ ეტაპზე სრულად შეჩერებულია, თუმცა ამ მხრივ გამონაკლისი „საქართველოს ბანკი“ და „კრედო ბანკი“ აღმოჩნდა.

„საქართველოს ბანკში“ რუბლის გაყიდვა ყოველგვარი შეფერხების გარეშეა შესაძლებელი. აქვე აღსანიშნავია, რომ 1500 ლარის ექვივალენტი რუბლის გაყიდვა მომხმარებელს ანგარიშის გახსნის გარეშე შეუძლია, უფრო მეტი თანხის გადახურდავების შემთხვევაში კი მსურველი „საქართველოს ბანკის“ მომხმარებელი უნდა იყოს. რუბლის გადახურდავება ეროვნულ ვალუტაში ხდება, შემდეგ კი შესაძლებელია სხვა ნებისმიერ უცხოურ ვალუტაში კონვერტირება.

„საქართველოს ბანკის“ დღევანდელი, 25მარტის კურსით 100 რუსული რუბლის გაყიდვა 4.13 ლარი, ხოლო ყიდვა 2.47 ლარი ღირს, ანუ სავალუტო სპრედი ძალიან მაღალია, რაც სხვა ვალუტების შემთხვევაში უმნიშვნელოა.

„კრედო ბანკში“ მომხმარებელს რუბლის გაყიდვა უფრო მარტივად შეუძლია. როგორც ბანკში „კომერსანტს“ განუცხადეს, თანხის ლიმიტი დაწესებული არ არის, რუბლი-ლარის კონვერტაციის შემთხვევაში არც საბანკო ანგარიშის ქონაა სავალდებულო.

„კრედო ბანკის“ დღევანდელი, 25 მარტის კურსით 100 რუსული რუბლი გაყიდვა 4.04 ლარი, ხოლო ყიდვა 2.08 ლარი ღირს. ამ შემთხვევაშიც სავალუტო სპრედი მნიშვნელოვნად მაღალია.

სხვა კომერციული ბანკები არც საქართველოს და არც რომელიმე ქვეყნის რეზიდენტ მოქალაქეებს რუსული რუბლის ყიდვა-გაყიდვის ოპერაციების მომსახურებას არ სთავაზობენ.

შენიშვნა: „კომერსანტის“ მიერ ბანკების შესახებ მოპოვებული ცნობები დაფუძნებულია კომერციული ბანკების ქოლ-ცენტრების და ფილიალების ოპერატორების ინფორმაციაზე დაყრდნობით.