2022 წელს საქართველოდან 165 უცხოელი გააძევეს. როგორც შსს-ს საიტზე უცხოელის საქართველოდან გაძევების შესახებ გამოტანილი გადაწყვეტილებების აღსრულების სტატისტიკიდან ირკვევა, 2022 წლის განმავლობაში საქართველო უცხო ქვეყნების 165 მოქალაქეს დაატოვებინეს.
„კომერსანტმა“ 2022 წლის სტატისტიკური მაჩვენებლები დააჯამა, საიდანაც ირკვევა, რომ შესაბამისმა უწყებებმა ქვეყნიდან ყველაზე მეტი ირანის, თურქეთის და აზერბაიჯანის მოქალაქეები გაუშვეს.
2022 წლის მაჩვენებლებით უცხოელის საქართველოდან გაძევების შესახებ გამოტანილი გადაწყვეტილებების აღსრულების სტატისტიკა ასე გამოიყურება: ირანი - 29, თურქეთი - 25, აზერბაიჯანი - 21, ინდოეთი - 15, ნიგერია 11, რუსეთი - 8 და სხვა.
აღსანიშნავია, რომ 2021 წლის განმავლობაში საქართველოდან უცხო ქვეყნის 77 მოქალაქეა გაძევებული, ხოლო 2020 წელს კი - 49 უცხოელი. 2019 წლის სტატისტიკის მიხედვით ქვეყანა უცხოეთის 104 მოქალაქეს დაატოვებინეს.
საქართველოდან უცხოეთის მოქალაქეების გაშვება რეგულირდება „უცხოელის საქართველოდან გაძევების წესის“ მიხედვით, რომლის მიხედვითაც უცხოელის მიმართ გაძევების თაობაზე გადაწყვეტილების აღსრულება ხორციელდება საქართველოს ნებაყოფლობით დატოვების ვადის ამოწურვიდან 15 სამუშაო დღის განმავლობაში. მისი აღსრულება შესაძლებელია განხორციელდეს ესკორტით ან ესკორტის გარეშე, საზღვაო, სახმელეთო ან საჰაერო გზით.
იმ შემთხვევაში, თუ გაძევების თაობაზე გადაწყვეტილების აღსრულების პროცესში უცხოელი გამოთქვამს ქვეყნის ნებაყოფლობით დატოვების სურვილს, მას, შეძლებისდაგვარად, უნდა მიეცეს ამის საშუალება.
უცხოელის საქართველოდან გაძევებასთან დაკავშირებულ ყველა ხარჯს იღებს გასაძევებელი პირი ან მისი მომწვევი პირი. უცხოელის საქართველოდან გაძევებასთან დაკავშირებულ ხარჯებს ნაწილობრივ ან მთლიანად გაიღებს საქართველოს სახელმწიფო, თუ ხარჯების სხვაგვარი ანაზღაურება შეუძლებელია.
უცხოელი შეიძლება გაძევებულ იქნეს საქართველოდან, თუ: 1) იგი კანონიერი საფუძვლის გარეშე შემოვიდა საქართველოში; 2) აღარ არსებობს საქართველოში მისი შემდგომი ყოფნის კანონიერი საფუძველი; 3) საქართველოში მისი ყოფნა ეწინააღმდეგება საქართველოს სახელმწიფო უსაფრთხოებას ან/ და საზოგადოებრივ წესრიგს; 4) მისი საქართველოდან გაძევება აუცილებელია საქართველოს მოქალაქეებისა და საქართველოში კანონიერი საფუძვლით მყოფი სხვა პირების ჯანმრთელობის, უფლებებისა და კანონიერი ინტერესების დაცვის მიზნით; 5) იგი სისტემატურად არღვევს საქართველოს კანონმდებლობას; 6) მან საქართველოში შემოსვლის ან ყოფნის კანონიერი საფუძველი ყალბი ან იურიდიული ძალის არმქონე დოკუმენტის წარდგენით მოიპოვა; 7) მას განზრახ ჩადენილი დანაშაულისათვის მისჯილი აქვს 1 წელზე მეტი ვადით თავისუფლების აღკვეთა − სასჯელის მოხდის შემდეგ; 8) მას შეფარდებული აქვს არასაპატიმრო სასჯელი – სასჯელის მოხდამდე, ან დანიშნული აქვს პირობითი მსჯავრი – გამოსაცდელი ვადის გასვლამდე.
უცხოელი, რომელსაც ამოეწურა საქართველოში კანონიერად ყოფნის ვადა და ნებაყოფლობით ტოვებს ქვეყანას, ვალდებულია, საქართველოდან გასვლამდე ან გასვლის შემდეგ გადაიხადოს საქართველოს კანონმდებლობით დადგენილი ჯარიმა (ჯარიმის ოდენობა კანონიერად ყოფნის ვადის ამოწურვიდან 3 თვის განმავლობაში არის 180 ლარი, ხოლო 3 თვეზე მეტხანს ყოფნისას – 360 ლარი). ჯარიმის გადაუხდელობის შემთხვევაში უცხოელზე არ გაიცემა საქართველოს ვიზა და მას უარი ეთქმება საქართველოში შემოსვლაზე, ვიდრე იგი არ გადაიხდის აღნიშნულ ჯარიმას. უცხოელს, რომლის მიმართაც განხორციელდა გაძევების იძულებით აღსრულება, ჯარიმის დაკისრებასთან ერთად, აეკრძალება საქართველოში შემოსვლა 2-დან 5 წლამდე ვადით.