Independent Reserve-ის მკვლევრებმა დაადგინეს, რომ სინგაპურელების 40%-ზე მეტმა უკვე განახორციელა ინვესტიცია კრიპტოვალუტაში. გამოკითხვა, 18 წლის ზევით, ქვეყნის 1500 მცხოვრებს შორის ჩატარდა.
შედეგების მიხედვით, გამოკითხულთა 43%-მა განაცხადა, რომ ფლობს ციფრულ აქტივებს. ამასთან, მოქალაქეების 91%-მა აღნიშნა, რომ მათ ესმით რა არის კრიპტოვალუტა. ამ მხრივ ყველაზე გათვითცნობიერებული ჯგუფი 26-35 წლის რესპონდენტები აღმოჩნდნენ. 75%-ზე მეტმა თქვა, რომ ფლობს ორ ან მეტ კრიპტოვალუტას საკუთარი დანაზოგის დივერსიფიკაციის მიზნით. ამავდროულად, გამოკითხულთა ნახევარზე მეტმა ბიტკოინს მთავარი ვალუტა უწოდა, სადაც აქტივებს ინახავენ.
კრიპტო ინდუსტრიაში არსებული კრიზისის მიუხედავად, რესპონდენტთა 70%-ზე მეტმა თქვა, რომ ახლობლებს კრიპტოვალუტაში ინვესტირებას ურჩევენ. გამოკითხულთა 59% ციფრული აქტივების მთავარ პრობლემად რეგულაციებს ასახელებს. მათი აზრით, ვირტუალური მონეტების გარშემო გამჭვირვალე მარეგულირებელი ჩარჩო კრიპტოვალუტებს უფრო მიმზიდველს გახდის ინვესტიციებისთვის. ამავდროულად, გამოკითხულთა 50% დარწმუნებულია, რომ კრიპტოვალუტები მიიღებენ მსოფლიო აღიარებას, მიუხედავად სამართლებრივი სირთულეებისა.
სტატისტიკის მიხედვით, კრიპტოვალუტაში ინვესტირებას ძირითადად მამაკაცი აკეთებს. თუმცა, Independent Reserve-მა შენიშნა, რომ - თუ 2022 წელთან შედარებით, მამაკაცი ინვესტორების რაოდენობა 1%-ით შემცირდა, მაშინ ქალი ინვესტორების რაოდენობა 7%-დან 37%-მდე გაიზარდა.
ამასთან, სინგაპურელები, რომლებიც თვეში $5,200-ზე მეტს გამოიმუშავებენ, ყველაზე აქტიურები არიან კრიპტოვალუტაში ინვესტირებაში და მოქალაქეები, რომელთა შემოსავალიც 3700 აშშ დოლარია, ნაკლებად აქტიურად ახორციელებენ ინვესტიციებს კრიპტოვალუტაში.