გაეროს მსოფლიო ტურიზმის ორგანიზაციამ (UNWTO) „საუკეთესო ტურისტული სოფლის“ სტატუსი 44 სოფელს მიანიჭა, რომლებიც მსოფლიოს ხუთი რეგიონის 32 ქვეყნაში მდებარებენ. საუკეთსო სოფლები მადრიდში, UNWTO-ს გენერალური ასამბლეის სხდომაზე დასახელდა. ინფორმაციას ორგანიზაციის ოფიციალური ვებ-გვერდი ავრცელებს.

განცხადებაში ნათქვამია, რომ UNWTO-მ „საუკეთესო ტურისტული სოფლების“ ინიციატივა ტურიზმის როლის გასაუმჯობესებლად დაიწყო, რომლის მიზანიც არის სოფლების, ლანდშაფტების, ბუნებრივი და კულტურული მრავალფეროვნების, ადგილობრივი ღირებულებებისა და საქმიანობის, მათ შორის ადგილობრივი გასტრონომიის დაცვა.

„ყველა მათგანი თავისი ბუნებრივი და კულტურული რესურსებით, ინოვაციური და ტრანსფორმაციული საქმანობით, ასევე, მდგრადი მიზნებისთვის ტურიზმის განვითარებით გამოირჩევიან. ეს ინიციატივა აღიარებს იმ სოფლებს, რომლებიც მზად არიან, გახადონ ტურიზმი მათი განვითარებისა და კეთილდღეობის ძლიერ მამოძრავებელ სექტორად,“ - ნათქვამია ანგარიშში.

საუკეთესო ტურისტული სოფლები დამოუკიდებელმა მრჩეველთა საბჭომ კრიტერიუმების ერთობლიობის საფუძველზე შეაფასა. ეს კრიტერიუმები ცხრა სფეროს მოიცავს:

კულტურული და ბუნებრივი რესურსები

კულტურული რესურსების ხელშეწყობა და კონსერვაცია

ეკონომიკური მდგრადობა

სოციალური მდგრადობა

გარემოს მდგრადობა

ტურისტული პოტენციალი, მისი განვითარება და ადგილობრივი ღირებულების ჯაჭვის ინტეგრაცია

ტურიზმის მმართველობა და პრიორიტეტიზაცია

ინფრასტრუქტურა და კავშირის საშუალებები

ჯანმრთელობა, უსაფრთხოება და დაცულობა

ამ კრიტერიმების მხრივ, 44-მა არჩეულმა სოფელმა 100-დან 80 ან მეტი ქულა დააგროვა. ეს სოფლებია: ბეხოვო (რუსეთის ფედერაცია), ბკასინი (ლიბანი), ბოჯო (ფილიპინები), კასპალა (არგენტინა), კასტელო როდრიგო (პორტუგალია), კუეცალან დელ-პროგრესო (მექსიკა), კუმეადა, (პორტუგალია), გრუიერესი (შვეიცარია), ბატუ პუტე (მალაიზია), კაუნერტალი (ავსტრია),ლე მორნი (მავრიკი), ლეკუნბერი (ესპანეთი), მანი (მექსიკა), მისფატ ალ აბრიენი (ომანი), მიამა (იაპონია), მოკრა გორა (სერბეთი), მორელა (ესპანეთი), მუსტაფაფაშა (თურქეთი), ნგლანგერანი (ინდონეზია), ნისეკო (იაპონია), სოფელი ნკოცი (რუანდა), ძველი გრანდ პორტი (მავრიკი), ოლერჯესაილი (კენია), ოლლანტაიტამბო (პერუ), პანო ლეფკარა (კვიპროსი), პიკა (ჩილე), პოშამპალი (ინდოეთი), პუერტო უილიამსი (ჩილე), რადოვლიცა (სლოვენია), რიჯალ ალმაა (საუდის არაბეთის სამეფო), ტესტო ალტო (ბრაზილია), საას-ფი (შვეიცარია), სანკოსმე-ი-დამიანი (პარაგვაი), სან ჯინეზიო (იტალია) სიდი კაუკი (მაროკო), სოლჩავა (სლოვენია) სუფლი (საბერძნეთი), ტარაკლი (თურქეთი), მეწამული კუნძული (კორეის რესპუბლიკა), სოფელი უნგოკი (კორეის რესპუბლიკა), ვალპოშიავო (შვეიცარია), ვონჩი (ეთიოპია), ქსიდი (ჩინეთი) და იუკუნი (ჩინეთი).

UNWTO-ს 75-მა წევრმა სახელმწიფომ ორგანიზაციის მრჩეველთა საბჭოს სულ 174 სოფელი შესთავაზა. თითოეულ წევრ სახელმწიფოს მაქსიმუმ სამი სოფლის წარდგენა შეეძლო.

აღსანიშნავია, რომ ეს რეიტინგი UNWTO-ს 2021 წლის საპილოტე ინიციატივაა, რომლის განახლების პროგრამაში კიდევ 20 სოფელი შევა. საბოლოოდ, UNWTO-ს საუკეთესო ტურისტული სოფლების ქსელში 64 სოფელი დაიკავებს ადგილს, რომლის ანგარიშიც 2022 წლის თებერვალში გამოქვეყნდება.

bpn.ge