ტვირთბრუნვის თვალსაზრისით ევროპის უდიდესმა, მსოფლიოში კი ერთ-ერთმა წამყვანმა როტერდამის პორტმა რუსეთში და უკან კონტეინერების მიმოსვლა შეაჩერა. ამის შესახებ პრესრელიზი თავად კომპანიამ გაავრცელა.

მასში წერია, რომ „საკონტეინერო მიმოსვლა რუსეთში და რუსეთიდან შეჩერებულია, რადგან გლობალური ლოგისტიკის მუდმივმა შეფერხებებმა ტვირთები დიდი საკონტეინერო პორტებიდან პატარა პორტებში გადაამისამართა“.

პრესრელიზში ხაზგასმულია, რომ პორტის ნახევარწლიანი მუშაობის შედეგების მიხედვით, ბოლო თვეებში როტერდამის გავლით რუსული ქვანახშირის, ნედლი ნავთობის, ნავთობპროდუქტებისა და თხევადი ბუნებრივი აირის (LNG) მცირე იმპორტი დაფიქსირდა, რისი მიზეზიც სანქციებია. კომპანიები ამ ტვირთების იმპორტს სხვა ქვეყნებიდან ეწევიან.

ზოგადად, წლის პირველი ნახევრის განმავლობაში როტერდამის პორტის ტვირთბრუნვა, წინა წელთან შედერებით, 0,8%-ით, 233,5 მლნ ტონამდე გაიზარდა. უკრაინის ომმა მნიშვნელოვანი ცვლილებები შეიტანა ბევრ სეგმენტში, როგორიც არის, მაგალითად, LNG-ისა და ქვანახშირის იმპორტი. ეს მაჩვენებელი მკვეთრად გაიზარდა, რადგან ევროპისთვის მილსადენებით შემცირებული რუსული გაზის ალტერნატიულ იმპორტს წარმოადგენს. რკინის მადნის, სასოფლო-სამეურნეო ტვირთისა და კონტეინერების გადაზიდვა, გასული წლის ანალოგიურ პერიოდთან შედარებით, უფრო დაბალი იყო.

ამასთან, როტერდამის პორტის ადმინისტრაციის აღმასრულებელი დირექტორი, ალარდ კასტელი აღიარებს, რომ ევროპა რუსულ ენერგიაზე მეტად დამოკიდებულია.

„დღევანდელი გეოპოლიტიკური ვითარება ევროპას მეტად დაუცველს ხდის. ენერგია და ნედლეული გონივრულ ფასებში ხელმისაწვდომი თავისთავად ვეღარ იქნება“, - აცხადებს ალარდ კასტელი.

24 თებერვლის შემდეგ უმსხვილესმა ევროპულმა პორტებმა, როტერდამმა, ანტვერპენმა, ჰამბურგმა და ბრემერჰავენმა რუსული ტვირთების ბლოკირება დაიწყეს. ამის საბაბი, Forbes-ის მაშინდელი წყაროს ცნობით, რუსეთში მოწყობილობებისა და ფუფუნების საქონლის მიწოდების აკრძალვა იყო. Forbes-ის მონაცემებით, მარტის დასაწყისში, რუსული იმპორტის, დაახლოებით, 8 000 კონტეინერი ევროპაში გაიჭედა. ევროპის წამყვანმა საკონტეინერო ხაზებმა, მათ შორის ლოგისტიკის გიგანტმა, Maersk-მა, რუსეთთან მუშაობაზე იმთავითვე უარი განაცხადეს.

ევროკავშირმა რუსული გემებისთვის თავისი პორტები მეხუთე სასანქციე პაკეტით დახურა. ივნისის დასაწყისში ბრიუსელმა სანქციების მეექვსე პაკეტი დაამტკიცა, რომელიც რუსული ნავთობის საზღვაო იმპორტს კრძალავს: ექვსი თვის განმავლობაში ევროკავშირის ქვეყნებმა რუსეთიდან ჯერ ნავთობის, ხოლო რვა თვის შემდეგ ნავთობპროდუქტების იმპორტი მთლიანად უნდა შეწყვიტონ.

bpn.ge