რუსული ვალუტის გაუფასურებამ საქართველოს ოკუპირებულ რეგიონებში პროდუქტი არნახულად გააძვირა. ცვლილება განსაკუთრებით ხილბოსტნეულს შეეხო. როგორც ოკუპირებულ აფხაზეთში ამბობენ, ყველაფრის ფასი მატულობს, გარდა თხილისა, რომლის ღირებულებაც 1 კვირაში განახევრდა.

გალის ქვედა ზონის, სოფელ ფიჩორის მცხოვრებლებს ,,კომერსანტი“ სოციალური ქსელით დაუკავშირდა. ხალხი ამბობს, რომ ჯერჯერობით ფასი შენარჩუნდა მხოლოდ ზეთზე, შაქარსა და ფქვილზე, თუმცა ეს ტენდენციაც სავარაუდოდ შეიცვლება.

,,ცუდ მდგომარეობაში აღმოვჩნდით. კურსი კატასტროფულად ეცემა და ძვირდება ყველა პროდუქტი, რისი მარაგიც მეტნაკლებად იყო, ჯერ კიდევ ხელმისაწვდომ ფასად იყიდება. ეს ძირითადად რუსეთიდან ომამდე შემოტანილი პროდუქტებია, განსაკუთრებით შაქარი, ფქვილი და ზეთი, მაგრამ ესეც დროთა განმავლობაში გაძვირდება, როცა ახალი პარტიების შემოტანა გახდება საჭირო. ხილისა და ბოსტნეულის ფასი გაორმაგებულია. ამ დროისთვის 2,50 ლარს აღწევს 1 კგ. კარტოფილის ფასი, ხახვი 2 ლარი ღირს, 1 კგ.  მწვანილი 12 ლარამდეა გაძვირებული. თხილის იმედად ვიყავით, მაგრამ რუბლის კურსი დაეცა და თხილიც ერთბაშად გაიაფდა. ლარში ვერ ვყიდით, ადგილობრივი გადამყიდველები 1 კგ. თხილში 40 რუბლს გვიხდიან , რაც 2 ლარზე ნაკლებია“, - ამბობს ოკუპირებული სოფლის მცხოვრები ვახო ცირდავა.

ადგილობრივების ინფორმაციით, ზუგდიდიდან თხილის გატანის პრობლემა არ არის, მაგრამ რუს და აფხაზ მესაზღვრეებს  მაღალი გადასახადი აქვთ დაწესებული, რის გამოც რეგიონიდან ტვირთის გატანას ისედაც არ აქვს აზრი.

,,1 კილოგრამი პროდუქტის გატანაში დამატებით 1 ლარს ვიხდით, ასეთ პირობებში გალიდან ტვირთების მოძრაობა ისედაც გაჩერებულია, თუ უკიდურესი აუცილებლობა არ არის. ვერც ზუგდიდიდან შემოგვაქვს პროდუქტი, რადგან ისედაც მაღალი ფასებია. მსხვილი ბიზნესებისთვის, ვინც ადგილობრივ ადმინისტრაციასთან მეგობრობს, ყველაფერი შედარებით მარტივადაა, მოსახლეობას კი იმდენად რთული ბარიერები ხვდება, რომ ისევ ადგილობრივ ბაზრებზე იძულებით ვართ  დამოკიდებული. თხილს თუ ვერ გავყიდით, ვერც პროდუქტს ვიყიდით, გამოუვალ მდგომარეობაში ვართ“, - ამბობს სოფელ გაგიდის მკვიდრი ციალა გვარამია ,,კომერსანტთან“.

აღსანიშნავია, რომ თხილის ფასი შემცირდა საქართველოს დანარჩენ ტერიტორიაზეც. ამ ეტაპზე სამეგრელოში 1კგ. პროდუქტის ღირებულება 3-5 ლარის ფარგლებში მერყეობს. ფასს თხილის ხარისხი განსაზღვრავს.

რაც შეეხება სავალუტო კურსს,  რუსული რუბლი რეკორდულად გაუფასურდა. ვაჭრობა დღეს, 3 მარტს დოლართან 100 რუბლზე გაიხსნა და მალევე 117 რუბლამდე გაუფასურდა. რეკორდულად გაუფასურდა რუბლი ევროსთან, ვაჭრობის გახსნისას კურსი 108 რუბლზე იყო, ამჟამად კი 130 რუბლს შეადგენს. 

100 რუბლის ღირებულება 2,70 ლარის ფარგლებშია.

მარი ჩიტაია