უკრაინის წინააღმდეგ ფართომასშტაბიანი ომის დაწყების გამო დასავლეთის მხრიდან რუსეთისთვის დაწესებული სანქციების ფარგლებში ევროპაში, აშშ–სა და ბრიტანეთში რუსების კერძო თვითმფრინავების დაპატიმრება დაიწყეს. ინფორმაციის გამოქვეყნების მომენტისთვის რამდენიმე ასეთი შემთხვევის შესახებ არის ცნობილი, წერს RBC-Ukraine.

მიიღე ინფორმაცია უფრო სწრაფად „კომერსანტის“ Telegram-ზე.

თუმცა, გამოცემის ცნობით, ყოველთვის ვერ ხერხდება იმის დამტკიცება, რომ თვითმფრინავები სანქციებში მოხვედრილ პირებს ეკუთვნის. ასევე, დასავლეთის მთავრობები ფიქრობენ, შესაძლებელია თუ არა უკრაინამ ამ ქონების გაყიდვით მიღებული თანხები მიიღოს.

სააგენტოს ცნობით, ყველაზე მეტი თვითმფრინავი დიდ ბრიტანეთში დააპატიმრეს, სადაც პირველად დაფიქსირდა რუსული საჰაერო ხომალდის დაყადაღება 9 მარტს.

მოგვიანებით ბრიტანეთში კიდევ 2 კერძო თვითმფრინავი დააპატიმრეს, რომლებიც რუს ოლიგარქ ევგენი შვიდლერს ეკუთვნოდა – იგი რომან აბრამოვიჩის ახლო მეგობარია. სანქციების ფარგლებში კიდევ ერთი რუსული თვითმფრინავის დაპატიმრების შესახებ ბრიტანეთში უკვე აპრილის დასაწყისში განაცხადეს.

Aviationpros–ში მიაჩნიათ, რომ თვითმფრინავების დაპატიმრების საკითხი საერთაშორისო ავიაციისთვის პრეცედენტია.

„დიდი კითხვა ჩნდება, რა ბედი ელის ჩამორთმეულ თვითმფრინავებს. თუ მათ გავყიდით, ეს დიდ მითქმა–მოთქმას გამოიწვევს სანქციების გამო, პრინციპული მოსაზრებებიდან გამომდინარე“, – ამბობენ გამოცემაში.