„რუსები, უკრაინელები და ბელარუსები როგორც წესი მაღალბიუჯეტურ სასტუმროებში მიდიან და სიღნაღი მათთვის საინტერესო ნაკლებადაა“, — ამის შესახებ „კომერსანტს“ Sighnaghi Art Hotel და Villa Provance-ის დამფუძნებელმა ლალი მოროშკინამ კახეთის რეგიონში არსებულ ტურისტულ სეზონზე საუბრისას უთხრა.
„წელს სიღნაღში ძალიან ბევრი ტურისტია და პოპულარული გახდა ქართველი დამსვენებლებისთვისაც. რაც შეეხება რუსი და უკრაინელი ტურისტების ზრდის გავლენას სიღნაღზე, ეს აქ ნაკლებად აისახა, რადგან უკრაინელი ტურისტები მეტ-ნაკლებად ადრეც იყო და ახლაც არიან, თუმცა რუსი ტურისტები უფრო მაღალ სეგმენტზეა გათვლილი და ისინი ძირითადად ხუთ ვარსკვლავიან სასტუმროებს ანიჭებენ უპირატესობას. შესაბამისად კონკრეტულად ჩემი სასტუმროს სეგმენტს და მგონია რომ ზოგადად სიღნაღში დამსვენებელთა სეგმენტს ისინი არ წარმოადგენენ. ჩვენ უფრო მოდიან ევროპელები და ლათინური ამერიკის ქვეყნებიდან, რომლებსაც აინტერესებთ ეთნოკულტურა“, — აღნიშნა ლალი მოროშკინამ.
ჟურნალისტის და პიარ-ტექნოლოგის ლალი მოროშკინას თქმით, სიღნაღი კახეთის სხვა ძვირადღირებული ქალაქებისგან განსხვავდება და ის უფრო ბიუჯეტური დასვენებისთვის არის გათვლილი.
„სიღნაღმა დაიჭირა ის ნიშა, რომ კახეთის სხვა ქალაქებისგან განსხვავებით, რომლებიც ძალიან ძვირია, აქ შესაძლებელია მინიმალური თანხით მიიღო მაქსიმალური სიამოვნება, მაგალითად დაისვენო 50 ლარად ორმა ადამიანმა. მეც მაქვს სასტუმროში იაფიანი სეგმენტისთვის და ცოტა ძვირადღირებული სეგმენტისთვის გათვლილი ნომრები. გვსურს, რომ სიღნაღი მხოლოდ ზაფხულის სეზონზე არ იყო ტურისტებისთვის საინტერესო.
რაც შეეხება ჯავშნეს ამ ეტაპზე საკმაოდ ბევრია, თუმცა როგორც ადრე ხდებოდა, რომ თვეებით ადრე ჯავშნიდნენ, პანდემიამ ეს დამოკიდებულება შეცვალა და ერთი თვით ადრე ხდება მხოლოდ დაჯავშნა, რადგან მაშინ ძალიან ვიზარალეთ ამის გამო. წელს მაგალითად კონკრეტულად ჩემს სასტუმროში სჭარბობენ მექსიკელები, ამერიკელები, ფრანგები და გერმანელები, რა თქმა უნდა ძალიან ბევრია არაბული ქვეყნებიდან ჩამოსული ტურისტები და ასევე ევროპაში მცხოვრები ინდოელები. ქალაქში ბევრი მნიშვნელოვანი ღონისძიებაა დაგეგმილი იმისთვის, რომ ტურისტებისთვის ის უფრო საინტერესო და მიმზიდველი გახდეს“, — ამბობს ლალი მოროშკინა.
აღსანიშნავია, რომ 2022 წლის იანვარ-ივნისში საქართველომ 1.43 მილიონი საერთაშორისო ვიზიტორიდან 1.14 მილიარდი დოლარის შემოსავალი მიიღო.