უკრაინის საელჩო საქართველოში არ გამორიცხავს ქვეყნიდან უკრაინელი მოქალაქეების ევაკუაციის შესაძლებლობას იმ შემთხვევაში თუ მათ საფრთხე დაემუქრებათ საქართველო-რუსეთის პირდაპირი საჰაერო მიმოსვლისა და რუსების მასიური შემოდინების ფონზე.
ამის შესახებ საქართველოში უკრაინის საქმეთა დროებითმა რწმუნებულმა ანდრეი კასიანოვმა „ევროპეისკა პრავდასთვის“ მიცემულ ინტერვიუში განაცხადა.
„პირდაპირი საჰაერო კომუნიკაციის აღდგენის და უსაფრთხოების რეალური რისკების ზრდის შემთხვევაში, მინდა ვთქვა, რომ დღეისთვის საელჩო არ გამორიცხავს საერთაშორისო ორგანიზაციებთან, ჩვენს საერთაშორისო პარტნიორებთან დაკავშირების შესაძლებლობას, რათა განიხილონ საქართველოს ტერიტორიიდან უკრაინის მოქალაქეების მასობრივი ევაკუაციაში დახმარების შესაძლებლობა. მაგრამ მე ხაზს ვუსვამ: მათ სიცოცხლესა და უსაფრთხოებას რეალური საფრთხის არსებობის შემთხვევაში. გულხელდაკრეფილები არ ვიჯდებით. ვიმუშავებთ და ყველაფერს გავაკეთებთ, რომ უზრუნველვყოთ მათი დაცვა და უსაფრთხოება. ეს არის ჩვენი მთავარი პრიორიტეტი.“ - განაცხადა კასიანოვმა.
კასიანოვმა აღნიშნა, რომ რუსების ანომალიური შემოდინების გამო საქართველოში უსაფრთხოდ ყოფნის რისკების მნიშვნელოვანი ზრდის ფონზე, საელჩო ყველანაირად უწყობს ხელს უკრაინელი მოქალაქეების უკრაინაში დაბრუნებას.
შეგახსენებთ, რამდენიმე დღის წინ რუსეთის საგარეო საქმეთა მინისტრმა სერგეი ლავროვმა საქართველოს ხელისუფლება შეაქო იმის გამო, რომ რუსეთის წინააღმდეგ სანქციებს არ უერთდება. სერგეი ლავროვმა განაცხადა, რომ იმედოვნებს საქართველოსთან პირდაპირი ფრენები მალე აღდგება. მისი თქმით, საქართველოსთან კონტაქტები აქტიურად ვითარდება და 2022 წელს საქართველოს მშპ-ის 10%-ით გაზრდა, დიდწილად ტურიზმისა და რუსეთის ფედერაციასთან ურთიერთობის დამსახურებაა.
მმართველი პარტია „ქართული ოცნების“ თავმჯდომარე ირაკლი კობახიძე აცხადებს, რომ მიესალმება რუსეთთან პირდაპირი ფრენების აღდგენას.