რუსეთისა და ბელარუსის ლიდერებმა სამოკავშირეო სახელმწიფოს საინტეგრაციო დეკრეტს მოაწერეს ხელი. დოკუმენტი მიზნად ისახავს ორ ქვეყანას შორის ინტეგრაციის გაღრმავებას, რაც საკავშირო სახელმწიფოს შექმნის მრავალწლიანი გეგმის ნაწილია. შეთანხმება მთლიანობაში ინტეგრაციის 28 “პროგრამას” ითვალისწინებს.

დოკუმენტი ყურადღებას ამახვილებს ეკონომიკურ და მარეგულირებელ საკითხებზე, მათ შორის გადასახადების, საბანკო, მრეწველობის, სოფლის მეურნეობისა და ენერგეტიკის სფეროებში. გარდა ამისა, ლიდერებმა ერთობლივი სამხედრო დოქტრინაც დაამტკიცეს. საუბარი არ ყოფილა პოლიტიკურ ინტეგრაციასთან დაკავშირებულ საკითხებზე.

4 ნოემბერს ლუკაშენკოსთან სატელევიზიო შეხვედრის დროს პუტინმა ბელარუსის მხარდაჭერის პირობა დადო.

“ერთად ვეწინააღმდეგებით სუვერენული სახელმწიფოების შიდა საქმეებში ჩარევის ნებისმიერ მცდელობას და რუსეთი, რა თქმა უნდა, გააგრძელებს მოძმე ბელარუსი ხალხის დახმარებას”,- განაცხადა რუსეთის პრეზიდენტმა.

ლუკაშენკომ პუტინს მხარდაჭერისთვის მადლობა გადაუხადა.

“უპრეცედენტო საგარეო ზეწოლა ჩვენს ქვეყნებს შორის ურთიერთობების ძლიერ გამოცდად იქცა. თამამად შეგვიძლია ვთქვათ, რომ ეს გამოცდა ჩავაბარეთ",- განაცხადა ლუკაშენკომ.

პროექტი იქნება მთავარი ნაბიჯი ორი ქვეყნის ეკონომიკისა და პოლიტიკური სტრუქტურების გაერთიანებისაკენ, მაგრამ ეს შეარყევს ბელარუსის სუვერენიტეტს, რასაც ლუკაშენკო მრავალი წლის განმავლობაში ჯიუტად ეწინააღმდეგებოდა. მიუხედავად ამისა, ავტორიტარი ლიდერი სულ უფრო იზოლირებული ხდება საერთაშორისო საზოგადოების უმეტესი ნაწილის მიერ.

ბელორუსის ოპოზიციამ და დასავლეთმა 2020 წლის საპრეზიდენტო არჩევნებს გაყალბებული უწოდეს. არჩევნებმა ხანგრძლივი ქუჩის პროტესტი გამოიწვია, რომელიც სასტიკად ჩაახშეს ბელარუსის უსაფრთხოების ძალებმა. ევროკავშირმა, შეერთებულმა შტატებმა და სხვა ქვეყნებმა არ აღიარეს ლუკაშენკო ბელარუსის პრეზიდენტად და დააწესეს სანქციები პოლიტიკური ოპოზიციის, სამოქალაქო საზოგადოებისა და დამოუკიდებელი მედიის რეპრესიებისთვის.

იზოლირებული ლუკაშენკო დაუახლოვდა რუსეთს, ითხოვდა სესხებს და სამხედრო დახმარებას პუტინისგან.

დევნილობაში მყოფმა ოპოზიციის ლიდერმა, სვეტლანა ტიხანოვსკაიამ განაცხადა, რომ ლუკაშენკოს აღარ აქვს უფლება, ხელი მოაწეროს ასეთ დოკუმენტებს და რომ ხალხმა არაფერი იცოდა მისი დეტალების შესახებ.

წყარო: "ბიზნეს ფორმულა"