რუსეთის საგარეო საქმეთა მინისტრი, სერგეი ლავროვი ამბობს, რომ რუსეთისა და ჩინეთის ურთიერთობა კიდევ უფრო გაძლიერდება. მისი თქმით, დასავლეთი ძირს უთხრის ყველა იმ საფუძველს, რომელზედაც დგას საერთაშორისო სისტემა და, ამ მდგომარეობაში, რუსეთი და ჩინეთი, როგორც უდიდესი ძალა, იფიქრებს, როგორ გააგრძელოს ცხოვრება. 

მაშინ, როცა დასავლეთი ძირს უთხრის ყველა იმ საფუძველს, რომელზედაც დგას საერთაშორისო სისტემა, ჩვენ, რა თქმა უნდა, როგორც დიდმა ძალამ უნდა ვიფიქროთ, როგორ გავაგრძელოთ ცხოვრება, - აღნიშნა ლავროვმა. 

შეგახსენებთ, წუხელ აშშ-ის პრეზიდენტ ჯო ბაიდენსა და ჩინეთის სახალხო რესპუბლიკის ლიდერ სი ძინპინს შორის ვიდეოზარი გაიმართა. თეთრი სახლის ცნობით, ეს იყო ორი ქვეყნის ლიდერს შორის ბოლო თვეების განმავლობაში პირველი საუბარი. ჩინური სახალხო რესპუბლიკის პრეზიდენტმა,  სი ძინპინმა, შეერთებული შტატების პრეზიდენტს, ჯო ბაიდენს, განუცხადა, რომ კონფლიქტი და დაპირისპირება არავის ინტერესებშია და რომ მშვიდობა და უსაფრთხოება საერთაშორისო თანამეგობრობის ყველაზე ძვირფასი საგანძურია.

ცნობისთვის, მოსკოვმა პეკინს სამხედრო და სხვა დახმარება სთხოვა. CNN-მა დიპლომატიურ წყაროებზე დაყრდნობით გაავრცელა ინფორმაცია, რომ ჩინეთმა გამოხატა გარკვეული ღიაობა რუსეთისთვის მოთხოვნილი სამხედრო და ფინანსური დახმარების გაწევაზე. 

გუშინდელი საუბრის დროს ჯო ბაიდენმა სი ძინფინგი გააფრთხილა, რომ თუ ჩინეთი რუსეთს უკრაინაში ქმედებებისთვის მატერიალურად დაეხმარება, ამას შედეგები მოჰყვება.