რუსეთ-უკრაინის ომის ფონზე საქართველო-უკრაინას შორის საგარეო სავაჭრო ბრუნვის ზრდის ტემპი შემცირებულია, თუმცა უკრაინა მაინც საქართველოს 10 უმსხვილეს სავაჭრო პარტნიორს შორისაა.
საქსტატის მონაცემებით, ქვეყნებს შორის სავაჭრო ბრუნვამ 2022 წლის იანვარ-ივნისში 212,576 მლნ დოლარს მიაღწია, რაც 2.5%-ით მეტია 2021 წლის ანალოგიურ პერიოდთან შედარებით. ზრდა ძირითადად იანვარ-თებერვალში ქვეყნებს შორის არსებულმა მზარდმა სავაჭრო ურთიერთობებმა განაპირობა.
საინტერესოა, როგორ შეიცვალა ქვეყნებს შორის სავაჭრო ურთიერთობა და რა სახის პროდუქციით ვაჭრობს საქართველო და უკრაინა.
რუსეთის მიერ უკრაინაში შეჭრის შემდეგ, მარტი-ივნისის პერიოდში საქართველო-უკრაინას შორის სავაჭრო ბრუნვამ 95 928 490 დოლარი შეადგინა, რაც 2,57-ჯერ ნაკლებია 2021 წლის მარტი-ივნისთან შედარებით.
აღსანიშნავია, რომ 2022 წლის იანვარ-თებერვალში ქვეყნებს შორის სავაჭრო ბრუნვამ 116 647 920 დოლარი შეადგინა, წლიურმა ზრდამ ამ პერიოდში 40.11%-ს მიაღწია, სწორედ ამით აიხსნება ის ფაქტი, რომ უკრაინასთან ჯერ კიდევ შენარჩუნებულია გარკვეული ზრდა.
მარტი-ივნისში საქართველოში უკრაინიდან 56 670 240 დოლარის იმპორტი განხორციელდა, მაჩვენებელი განახევრებულია 2021 წლის ანალოგიურ პერიოდთან შედარებით (111 374 540 დოლარი). 2,5-ჯერ არის შემცირებული ექსპორტიც 97 962 890 დოლარიდან 39 321 250 დოლარამდე.
ომის დაწყებიდან (მარტი-ივნისი) უკრაინიდან პროდუქციის იმპორტის უმეტესობა განხორციელდა საავტომობილო საშუალებით - ამ გზით განხორციელდა 54 841 730 დოლარის ღირებულების ტვირთის იმპორტი.
საქართველოში უკრაინაში კი პროდუქციის ექსპორტის უმეტესობა განხორციელდა საზღვაო საშუალებით. მარტი-ივნისში საზღვაო საშუალებებით საქართველოდან უკრაინაში გავიდა 28 996 660 დოლარის ღირებულების ტვირთის ექსპორტი.
რაც შეეხება საექსპორტო პროდუქციას, 2022 წლის იანვარ-ივნისში 32 640 260 დოლარით მსუბუქი ავტომობილები ლიდერობს, ისევე როგორც 2021 წლის იანვარ-მაისში, თუმცა მაჩვენებელი რა თქმა უნდა შემცირებულია 44 977 820 დოლარიდან. მეორე ადგილზე 2022 წლის იანვარ-ივნისში აზოტოვანი სასუქებია, 2021 წლის იანვარ-ივნისში კი 19 430 510 ალკოჰოლური სასმელები იყო, რუსეთ-უკრაინის ომის ფონზე, ალკოჰოლური სასმელების ექსპორტი უკრაინაში 9 668 900 დოლარამდე შემცირდა.