რუსეთ-უკრაინის ომმა პრობლემები საქართველოში არაერთი მიმართულებით შექმნა. დიდი ალბათობით, ომი საქართველოს ტურიზმის სექტორზეც აისახება. რა გავლენა მოახდინა უკრაინაში რუსეთის სამხედრო აგრესიამ ტურიზმის მიმართულებაზე და რამდენად დაეტყო ეს ჯავშნებს, ამ და სხვა კითხვებით „კომერსანტი“ „ლოპოტა სპა რეზორტის“კომერციული დირექტორს მაკა ღლიღვაშვილს დაუკავშირდა.
მისი თქმით, რუსეთ-უკრაინის ომის გამო მარტში და აპრილში ტურისტული ნაკადები ძალიან შემცირებული იყო.
„რა თქმა უნდა, რუსეთ-უკრაინის კონფლიქტი ტურისტების რაოდენობაზე აისახა, რაც განსაკუთრებით მარტში და აპრილში იყო შესამჩნევი. რუსეთ–უკრაინის ომმა ფაქტობრივად ყველა ის ჯგუფი გააუქმა, რომელიც საზღვარგარეთიდან მოდიოდა. თუმცა აღსანიშნავია, რომ მარტი და აპრილი აქტიური ტურისტული პერიოდი არ არის და დიდი ნაკადები უფრო მაისიდან იწყება, მაისი ჯერ არ დაწყებულა, თუმცა შეგვიძლია ვთქვათ, რომ საქმე კარგად მიდის.
პანდემიამ მომხმარებელთა ქცევა შეცვალა, დიდი ხნით ადრე ჯავშნებს აღარ აკეთებენ, ძირითადად ბოლო პერიოდისკენ ჯავშნიან, ჯერჯერობით რასაც ვუყურებთ, მაისის ჯავშნები კარგად დაიწყო, ვნახოთ რა იქნება“, - აღნიშნა მაკა ღლიღვაშვილმა.
კომერციული დირექტორის თქმით, მას შემდეგ, რაც 2019 წელს ფრენები გაუქმდა, რუსული ბაზარი ისედაც შემცირებული იყო და „ლოპოტა სპა რეზორტი“ რუსეთზე გათვლას ისედაც არ აკეთებდა, თუმცა რაც შეეხება უკრაინას, ეს კონტინგენტი ომის დაწყების შემდეგ ფაქტობრივად განულდა.
„მას შემდეგ, რაც 2019 წლის ივნისის მერე ფრენები გაუქმდა, რუსული ბაზარი ისედაც ძალიან შემცირებულია, რომ გითხრათ წელს რუსულ ბაზარზე რამე გათვლას ვაკეთებდით – ნაკლებად. რაც შეეხება უკრაინას, ეს კონტინგენტი წინა პერიოდებში საკმაოდ აქტიური იყო, ფაქტობრივად განულებულია, თუ არ ჩავთვლით საქართველოში საცხოვრებლად ჩამოსული უკრაინელების ნაწილს, რომლებიც საქართველოში ცხოვრობენ და აქვე მოგზაურობენ.
ასე ვთქვათ, დსთ-ის სივრცე მაქსიმალურად შემცირებულია, გარკვეული ნაკადები გვაქვს ყაზახეთიდან, უზბეკეთიდან, ყირგიზეთიდან, თუმცა ესეც არ არის ძალიან დიდი, ევროპა აღმოსავლეთის მხრიდან უფრო გააქტიურებულია, შედარებით ნაკლებია დასავლეთ ევროპა, მაგრამ ესეც უფრო მაისისკენ. რაც შეეხება არაბულ ბაზარს, თავისთავად აქტიურია, თუმცა აპრილში ეგეც არ გვყავდა, რადგან რამადანის პერიოდი ჰქონდათ და არ მოგზაურობდნენ. მაგ დროს ძირითადად ჩვენც და ზოგადად სექტორიც შიდა ტურიზმით არის დაკავებული. ძირითადად ჩამოდიოდნენ თბილისიდან, როგორც კორპორაციული, ასევე ინდივიდუალური დამსვენებლები.
მაისიდან უკვე ვხედავთ აქტიურ ჯავშნებს სხვადასხვა ქვეყნიდან, ვერ გეტყვით, რომ ერთი კონკრეტული ქვეყანა არის დომინანტური. ჯავშნებს რომ ვუყურებ, ერთი სომხეთიდან, ერთი უნგრეთიდან, ერთი ისრაელიდან და ა.შ. გვაქვს მიღებული“, - აღნიშნა მაკა ღლიღვაშვილმა.
მიმდინარე წლის ზაფხულის სეზონს „ლოპოტა სპა რეზორტი“ განსაკუთრებული სიახლეებით ხვდება, მაკა ღლიღვაშვილის თქმით „ლოპოტა სპა რეზორტის“ 5 კორპუსის რენოვაცია მოხდა. გარდა ამისა, სივრცეს ახალი აზიური რესტორანიც ემატება.
“მიმდინარე წლისთვის ფანტასტიური სიახლეები გავქვს, შარშან ჩვენ გავხსენით ახალი მეთხუთმეტე პრემიალური 51 ნომრიანი სასტუმრო, რომელმაც ნამდვილად გაამართლა და როგორც ქართველ, ასევე უცხოელ ტურისტებში დიდი პოპულარობით სარგებლობს.
წელს უკვე გავაკეთეთ ჩვენი 5 კორპუსის სრული რენოვაცია და დავსვით ისეთ სტანდარტზე, როგორც ჩვენი პრემიალური სასტუმროა და აქაც პრემიალური ნომრები, თავისი „დუპლექს“ „ჯუნიორ“ და „ლუქს“ ნომრებით იქნება. გარდა ამისა, ვხსნით ახალ რესტორანს, რომელსაც აქვს თავისი პატა პირადი ტბა, რომელიც მთის წყლთ ისვება. რესტორანს ექნება დიდი ტერასა და საკუთარი აუზი, რესტორანი იქნება აზიური კონცეფციის“, - აღნიშნა მაკა ღლიღვაშვილმა.
რა შეეხება ფასებს, მაკა ღლიღვაშვილის თქმით, გამომდინარე იქიდან, რომ ქვეყანაში ყველაფერი ძვირდება, ფასების დაკორექტირება 10%-ით მოუწიათ, თუმცა „ლოპოტა სპა რეზორტს“ ქართველი მომხმარებლებისთვის ფასდათმობები ხშირად აქვს.
“პანდემიის პერიოდში ფასები 20-20%-ით დაკლებული გვქონდა, შარშან უკვე, როცა საერთაშორისო ბაზრები გაიხსნა, ფასები ძველ ნიშნულს – 2019 წლის ფასებს დავუბრუნეთ, თუმცა ახლა, გამომდინარე იქიდან, რომ ყველაფერი ძვირდება, ყველა კატეგორიაში დაახლოებით ფასების 10%-ით გაზრდა მოგვიწია. ჩვენ ფასების კვტორიება ლარში გვაქვს გაკეთებული, თუმცა დოლარსაც ვუყურებთ. ჩვენთვის კურსი ძალიან მნშვნელოანია, რადგან საზღვარგარეთ კვოტირებას ვაკეთებთ დოლარში და ჩვენი მხრიდან მუდმივად ხდება დაკვირვება.
მაისი საშუალო სეზონია, ივნისიდან სექტემბრის ჩათვლით მაღალი სეზონია. თუმცა მიუხედავად ამისა საქართველოს მოსახლეობაზე ჩვენ ყოველთვის გვაქვს განსაკუთრებული შეთავაზებები. მიმდინარე შეთავაზება არის ის, რომ შაბათს თუ დამსვენებელი 2 ღამით დარჩება ჩვენთან მას, 20% იან ფასდაკლებას ვთავაზობთ“, - აღნიშნა მაკა ღლიღვაშვილმა.
„ლოპოტა სპა რეზორტმა“ ფუნქციონირება 2008 წელს 7–ნომრიანი საოჯახო სასტუმროთი დაიწყო ლოპოტას ტბის ნაპირზე. დღეს სასტუმრო კომპლექსი 232 ნოემრს მოიცავს და ერთ–ერთი მიმზიდველი ადგილია როგორც ადგილობრივი, ისე უცხოელი დამსვენებლებისთვის.
თაკო კვაჭანტირაძე