რუსეთი უკრაინის ქარხნებიდან და პორტებიდან 600 მლნ დოლარის (500 მლნ ფუნტის) ფოლადს იპარავს. ამის შესახებ ფოლადის უმსხვილესი უკრაინული მწარმოებლის, „მეტინვესტის“ აღმასრულებელმა დირექტორმა, იური რიჟენკოვმა BBC-ის განუცხადა.

კომპანია „აზოვსტალის“ ქარხნის მფლობელია, რომელიც BBC-ის შეფასებით, ქალაქ მარიუპოლის განადგურების დროს უკრაინელი ჯარისკაცებისა და მშვიდობიანი მოსახლეობის უკანასკნელი თავშესაფარი იყო.

იური რიჟენკოვი ამბობს, რომ ფოლადი რუსეთში გადააქვთ და ყიდიან, რომლის ნაწილიც ომამდე დიდ ბრიტანეთსაც ჰქონდა შეძენილი და ბრიტანელი მომხმარებლებისთვის იყო განკუთვნილი. კრემლში ტელეკომპანიასთან კომენტარს არ აკეთებენ.

BBC-ის ცნობით, „მეტინვესტის“ სათაო ოფისი მარიუპოლშია, რომელიც „ვაჭრობისა და წარმოების ცენტრი იყო და რუსეთის, თითქმის სამთვიანი დაუნდობელი თავდასხმის შემდეგ, მაისში დაეცა“.

რიჟენკოვმა ტელეკომპანიას განუცხადა, რომ „აზოვსტალის“ ქარხანაზე შტურმის შედეგად 300 თანამშრომელი და თანამშრომლების 200 ნათესავი დაიღუპა. „აზოვსტალი,“ თავის შვილობილ ქარხანასთან, „ილიჩთან“ ერთად უკრაინის ფოლადის წარმოების 40%-ს შეადგენდა.

აღმასრულებელი დირექტორის მონაცემებით, ათასობით ტონა ფოლადი ევროპელ მომხმარებლებს, მათ შორის, ბრიტანელებს ეკუთვნით. რიჟენკოვის თქმით, საჯარო წყაროებისგან და კომპანიის ინფორმატორებისგან ცნობილია, რომ ფოლადი რუსეთში გააქვთ და შემდეგ შიდა ბაზრებზე ან აფრიკისა და აზიის ქვეყნებში ყიდიან.

„რასაც ისინი აკეთებენ, მხოლოდ ძარცვაა. ისინი არა მხოლოდ ჩვენს პროდუქციას, არამედ ამ პროდუქტების ნაწილს ევროპელ მომხმარებელს ჰპარავენ“, - აცხადებს რიჟენკოვი.

მისი თქმით, კომპანია ქურდობის რაც შეიძლება, მეტ ფაქტს აფიქსირებს და სამომავლო სამართლებრივი ზომების მისაღებად ემზადება. რიჟენკოვი იმედოვნებს, რომ „რაღაც მომენტში, რუსები არა მხოლოდ საერთაშორისო, არამედ სისხლის სამართლის სასამართლოების წინაშე წარდგებიან“.

BBC-მ კომენტარისთვის რუსეთის თავდაცვის სამინისტროს მიმართა, თუმცა უწყებას ბრალდებებისთვის არ უპასუხია.

რიდინგის უნივერსიტეტის საერთაშორისო სამართლის ექსპერტი, პროფესორი, მარკო მილანოვიჩი აცხადებს, რომ საქმის განხილვის მრავალი ვარიანტი არსებობს, თუმცა წარმატების პერსპექტივა ნაკლებად გარკვეულია. მისი თქმით, „რა სამართლებრივი გზაც არ უნდა აირჩიოს „მეტინვესტმა“, ეს მეტად რთული პროცესია და მიუხედავად იმისა, რომ ძარცვა ომის დროს საკმაოდ ხშირია, მძარცველ სახელმწიფოზე სასამართლო სარჩელები და მისგან კომპენსაციის მიღება მეტად იშვიათია“.

„შესაძლოა, ამ შემთხვევაში უკრაინულ მხარეს ფულზე მეტად სიმბოლური გამარჯვება უფრო მეტად სურდეს, რადგან ამ საქმეში რუსეთის დამნაშავედ ცნობა მართლაც დიდი საქმე იქნებოდა,“ - განუცხადა BBC-ის მარკო მილანოვიჩმა.

bpn.ge