რუსეთი არ არის დაინტერესებული ვინმეს შთანთქმით, – ამის შესახებ რუსეთის პრეზიდენტმა, ვლადიმირ პუტინმა ბელარუსის პრეზიდენტ ალექსანდრ ლუკაშენკოსთან მინსკში გამართულ ერთობლივ პრესკონფერენციაზე განაცხადა.

ჟურნალისტმა პუტინს კრემლის მიერ ბელარუსის შთანთქმის შესაძლებლობაზე დაუსვა შეკითხვა.

„რუსეთი არ არის დაინტერესებული ვინმეს შთანთქმით. უბრალოდ, ამაში მიზანშეწონილობა არ არის“, – განაცხადა პუტინმა.

რუსეთის პრეზიდენტის თქმით, „არაკეთილისმსურველები“ რუსეთისა და ბელარუსის ინტეგრაციული პროცესების შეფერხებას ცდილობენ.

„არაკეთილსინდისიერ გარე კრიტიკოსებს ან არ ესმით, რაზე საუბრობენ, ან სპეციალურად ლაპარაკობენ ამაზე, რათა შეცდომაში შეიყვანონ ხალხი, ვინც ამ საკითხს არ უღრმავდება. საქმე ეხება არა შთანთქმას, არამედ ეკონომიკური პოლიტიკის შეთანხმებას – ისევე, როგორც ეს კეთდება მრავალ სხვა საერთაშორისო გაერთიანებაში. ყველაფერი დანარჩენი ზედაპირული და სისულელეა. ეს არის ჩვენი არაკეთილისმსურველთა მცდელობები, შეაფერხონ ჩვენი ინტეგრაციული პროცესი. ამას ისინი აკეთებენ მხოლოდ იმისთვის, რომ არ მიიღონ მსოფლიო ბაზარზე ეფექტიანი და მათთვის საშიში კონკურენტები. სულ ეს არის“ , – აღნიშნა პუტინმა.

თავის მხრივ, ბელარუსის პრეზიდენტმა განაცხადა, რომ ბელარუსს არ შეუძლია, მარტომ დაიცვას თავისი დამოუკიდებლობა და სუვერენიტეტი.

„ახლა ჩვენ რუსეთის პრეზიდენტთან უსერიოზულესი განცხადება გავაკეთეთ. თავდაცვა და უსაფრთხოება. მოდით, გულწრფელად ვთქვათ: შეგვიძლია ჩვენ მარტოს, რუსეთის გარეშე ჩვენი დამოუკიდებლობის და სუვერენიტეტის დაცვა? არ შეგვიძლია. და რთულ პერიოდში მან უარი არ გვითხრა“, – აღნიშნა ლუკაშენკომ.

როგორც ლუკაშენკომ განაცხადა, 2020 წელს ბელარუსისთვის დამოუკიდებლობისა და სუვრენიტეტის წართმევა სურდათ, რუსეთმა კი ბელარუსს დახმარების ხელი გაუწოდა.

ამასთან, ლუკაშეკომ მადლობა გადაუხადა რუსეთის პრეზიდენტს „ეს-400“-ის და „ისკანდერის“ სარაკეტო კომპლექსების მიწოდებისთვის.

აღსანიშნავია, რომ შემაჯამებელ პრესკონფერენციაზე რუსეთის და ბელარუსის პრეზიდენტებმა უკრაინის ხსენებას თავი აარიდეს. ეს 2019 წლის შემდეგ ვლადიმერ პუტინის პირველი ვიზიტი იყო მინსკში.